Daniel 11 - Quechua Ayacucho Bible 1987

¹ Media nacionniyoq Rey Dario gobiernayta qallarichkaptinmi payta kallpanchaspay waqaycharqani.

² Kunanmi ichaqa cheqap kaqta yachachisqayki: —Persia nacionpiqa gobiernanqa kimsa reykunaraqmi, paykunapa qepantañataqmi gobiernananpaq hatarinqa tawa kaq rey, chay reyqa kimsantin reykunamantapas aswan apu-apum kanqa. Chay reymi apullaña kasqanrayku ancha munaychakuqllaña kanqa hinaspam payqa llapallanta hatarichinqa Grecia nacionpa contranpi.

Norte lawpi hinaspa surlawpi reykunamanta

³ Chaymantañataqmi hatarimunqa guerrakunapi anchallaña peleaq rey, llumpay atiywan munaychakuspam imam munasqanta ruranqa

⁴ ichaqa chayna hatariruspan gobiernachkaptinñataqmi chay gobiernonqa rakinasqa kanqa tawa parteman. Chay reypa munaychakusqanqa manam qosqachu kanqa mirayninkunamanpas, chay gobiernonpas manataqmi kanqa ñawpaq tiemponpi hina ancha atiyniyoqchu. Chaynaqariki kanqa chay gobiernon wichichisqa kasqanraykum hinaspapas manaña mirayninmanta kaq runapa gobiernasqan kasqanraykum.

⁵ Surlawpi kaq reymi aswan-aswan atiyniyoq kanqa ichaqa paymantapas aswan atiyniyoqraqmi rikurirunqa guerrakunapi anchallaña peleaq reypa tropankunapa huk kaqnin jefen, chay tropakunapa jefenmi munaychakunqa hatu-hatun nacionpiraq.

⁶ Ichaqa watakunapa pasasqanman hinam paykunaqa iskayninku huk contratota ruranqaku, surlawpi kaq reypa warmi churinmi casarakunanpaq rinqa norte lawpi kaq reyman chaynapi chay contrato rurasqankuqa allin takyananpaq. Ichaqa chay warmi churinqa manam munaychakunqachu. Qosanpas mana munaychakusqanraykum mana takyanqachu. Chay reypa warmi churinqariki pusaqninkunapiwanmi traicionasqa kanqa, traicionasqataqmi kanqa taytan reypas chaynataq chay tiempopi warmi churinta yanapaqninpas.

⁷ Ichaqa chay warmipa huk kaqnin ayllunmi norte lawpi tropakunapa contranpi hatarirunqa, reypa murallasqa llaqtanman yaykuruspanmi paykunapa contranpi peleaspan lliwta vencerunqa.

⁸ Chaynapim chay warmipa ayllunqa Egipto nacionninman apakunqa chay vencerusqan reypa taytacha-mamachankunatapas, qori-qollqemanta alhajankunatapas, norte lawpi reywanqa manañam peleanqachu tumpa unayneqkama.

⁹ Chaywanpas norte lawpi kaq reymi hatarinqa surlawpi kaq reypa nacionninpa contranpi ichaqa mana imayoqmi nacionninman kutirikunqa.

¹⁰ —Ichaqa norte lawpi reypa churinkunam guerrapaq alistakuspanku hatarichinqaku nana-nanaq tropakunata, chaynapim paykunaqa lloqlla hinaraq mastarikunqaku, surlawpi reypa murallasqa llaqtanman chayanankukamam huktawan paykunaqa guerrawan rinqaku.

¹¹ Norte law tropakunapa chayamusqanwanmi surlawpi reyqa llupa-llumpayta piñakurunqa hinaspam lloqsinqa chay nana-nanaq tropakunawan peleaq hinaspam pasaypaqta vencerunqa.

¹² Chay nana-nanaq tropakuna vencerusqanwanmi surlawpi kaq reyqa llumpay-llumpayta hatunchakunqa ichaqa achka waranqa tropakunata wañurachispanpas manam payqa unaypaqchu munaychakunqa.

¹³ Norte lawpi reyñataqmi huktawan huñurunqa nana-nanaq ñawpaq tropakunamantapas aswan achkataraq, chaynapim payqa watakuna pasaruptin surlawman kutirinqa chay nana-nanaq allin armasqa tropankunawan.

¹⁴ —Hina chay tiempopim achkaq runakuna hoqarikurunqaku surlaw reypa contranpi, chay runakunawan kuskataqmi hoqarikurunqaku dañolla ruraq wakin llaqtamasikikunapas, chaynapim chay qanman qawachisqayqa cumplikunqa, ichaqa chay llaqtamasikikunaqa manam atinqakuchu imam munasqanku rurayta.

¹⁵ Norte lawpi reymá surlawpi murallasqa llaqtaman chayarunqa hinaspam chay murallapa qepanpi allpakunata huk hawaqllaman montonaruspa chay llaqtapi kaqkunata vencerunqa. Surlaw reypa tropankunaqa manamá atinqakuchu enemigon tropakuna imaynam harkayta, wakin akllasqa kallpasapa soldadonkunapas mana kallpayoqñam rikurirunqa.

¹⁶ Chaynaqa chay norte lawmanta hamuq reymi tukuy munasqanta rurakunqa chay vencerachikuq enemigonkunawan, manam pipas atinqachu paypa contranpi sayariytaqa. Chay reyqa Kuyayllapaq Allpapiña *f**yachakuspanmi munaychakunqa, paypaqa makillanpim kanqa chaypi kaqkunapas purmarachinanpaq.

¹⁷ Chay reyqa munanqataqmi surlawpi tukuy ima hapikuykuytapas, chaypaqmi surlawpi reywan huk contratota ruranqa, chay contrato allin lloqsinanpaqmi warmi churinwanpas casarachinqaraq chay surlawpi reyta, chaynataqariki ruranqa chay surlawpi reypa gobiernonta yanqacharunanpaqmi, chay tanteasqankunaqa manam cumplikunqachu.

¹⁸ Chay norte lawpi nacionniyoq reyqa munapayanqataqmi lamar qochapa patanpi llaqtakunatapas, chaypi *f**yachaqkunatapas guerrawanmi vencerunqa. Ichaqa chay reypa hatunchakuynintaqa chinkarachinqa tropakunapa huk kaqnin jefenmi hinaspam chay reypa penqay rurasqankunatapas hina kikillanman kutiykachinqa.

¹⁹ Chaynapim chay norte law reyqa kutikunqa nacionninpi murallasqa llaqtanmanña ichaqa kutichkaspanmi vencerachikuspan wañurunqa, payqa pasaypatañamá chinkarunqa.

²⁰ —Paypa rantinpi hatariq reyñataqmi impuesto cobraqta kachanqa gobiernonpa sumaq kaynin takyachinanpaq ichaqa manapas unay tiempopim chay reytaqa wañurachinqaku, manamá payqa wañunqa piñanakuypichu nitaq guerrapichu.

²¹ —Paypa rantinpiñataqmi rey kananpaq hatarinqa huk cheqnipay runa, ichaqa paytaqa manam reyta hinachu respetowan qawanqaku. Payqariki rikuriramunqa runakuna hawka kawsakuchkaptinkum, artellawanñam gobiernopa reynin rikurirunqa.

²² Payqa kallpasapallaña lloqlla hinam vencerunqapuni enemigonkuna hatariqtapas, paykunawan kuskam contratota ruraq kamachikuqpas wañuchisqa kanqa.

²³ Chay cheqnipay reyqa contrato ruraqmasinkunatapas engañarunqam, aslla qatiqniyoq kachkaspanpas payqa gobiernaqñam rikurirunqa.

²⁴ Hawka kawsakuq hinaspa tukuy imapa kasqan lawkunaman yaykuruspanmi ruranqa taytanpa hinaspa abuelonkunapapas mana rurasqankunata. Payqa soldadonkunamanmi aypunqa guerrawan tukuy ima qechusqanta, aypunqataqmi qori-qollqe salteasqankuta. Payqa tanteanqam murallasqa llaqtakunapa contranpipas ichaqa chay tanteasqankunaqa manam unaypaqchu kanqa.

²⁵ Sonqonpi hoqarikuspanmi kallpancharikuspa nana-nanaq tropankunawan rinqa surlaw reypa contranpi. Surlawpi reypas nana-nanaq kallpasapa tropankunawanmi alistakuykuspa guerraman yaykunqa ichaqa runakunapa traicionasqan kasqanraykum enemigonkunataqa mana venceyta atinqachu.

²⁶ Paytaqa mesanpi mikuqmasillankunam wañurachinqaku, paypaqariki nana-nanaq tropankunapas lloqllapa apasqan hinam rikurirunqa, achka-achkallañam soldadonkuna wañurunqa.

²⁷ Chay iskay reykunaqa mana allin ruranakuyllapi piensaspankum tiyaykunqaku huk mesallapi hinaspam ninakunqaku llullakunallata ichaqa yanqapaqmi chaykunataqa rimanakunqaku, manaraqmiki Diospa señalasqan tiempoqa chayamunqaraqchu.

²⁸ Chay norte lawmanta hamuq reyqa nacionninmanmi kutikunqa guerrapi qechusqan qori-qollqekunata aparikuspan, chayna kutistinmi payqa Diospa contratonpa contranpi hatarinqa, payqa imam munasqankunata ruraruspanmi nacionninman kutikunqa.

²⁹ Ichaqa señalasqa tiempo chayamuptinmi surlawman huktawan kutirinqa ichaqa chay kutipiqa manam puntapi hinachu vencenqa.

³⁰ Payqa intipa seqaykunan lawmanta buquekunapi hamuq tropakunawanmi harkasqa kanqa hinaspam hukmanyasqallaña ripukunqa. Diospa contratonpa contranpi llumpayllataña piñakuruspanmi millakuypaq kaqkunata ruranqa, huktawanmi payqa Diospa contrato rurasqan qepanchakuqkunata favorecenqa.

³¹ —Atiyniyoq kasqanraykum Diospa templonpi kaq amparakuna wasipipas millakuypaq kaqkunata ruranqa, harkakurunqam Diospaq sapa punchaw animalkuna wañuchinankutapas, chaypim churarunqaku purmachiq millakuypaq kaqtapas.

³² Diospa contraton qepanchakuqkunatam chay reyqa sumaq artellawanña rimaspan rantiypaq-rantirunqa, Diosninku reqsiq runakunam ichaqa kallpanchakuspa ruranqaku.

³³ Llapa runakunamanta allin yuyayniyoq kaqkunam yachachinqaku achka-achka runakunata ichaqa paykunapa wakinninkum tiempopa pasasqanman hina guerrapi ñakarispa kañasqa kanqaku, wakinñataqmi imallankutapas qechurachikuspan preso rinqaku.

³⁴ Ichaqa chayna ñakarichisqa kachkaspankum tumpallatapas yanapasqa kanqaku, achkallaña runakunam artellawanña rimaspa paykunaman hukllawakurunqa.

³⁵ Yachayniyoq wakin runakunapas humillachisqam kanqaku, chayna ñakarichisqaqa kanqaku metal chulluchisqa hina chuyanchasqa kanankupaqmi. Paykunaqa mana allinmanta rakisqa kaspankum mana huchayoqña kanqaku. Chaynaqariki tarikunqaku tukupay tiempo chayamunankamam, chaynam señalasqa kachkan cumplikunanpaq.

³⁶ —Norte nacionniyoq reymi ruranqa tukuy imam munasqanta, hatunchakuspanmi kaynata ninqa: “Ñoqaqariki kachkani llapallan dioskunapapas hawanpim” nispa. Payqa cheqap Diospa contranpipas admirakuypaq kaqkunatam rimanqa. Payqa tukuy imapim allinllaña lloqsinqa Diospa piñakuynin wichiykunankama. Diosqariki ruranqapunim imam tanteasqantaqa.

³⁷ Chay norte nacionniyoq reyqa manam kaqpaqpas hapinqachu abuelonkunapa diosnintapas, warmikunapa yupaychasqan diostapas nitaq mayqen diostapas. Payqariki hapikunqa llapallan dioskunamantapas aswan hatunpaqmi.

³⁸ Yupaychaspaqa-yupaychanqa murallasqa llaqtakuna yanapaq diostam, chay diostaqa manam reqsirqakuchu abuelonkunapas. Chay reyqariki chay diostam yupaychanqa qori-qollqewan, sumaq alhaja rumikunawan hinaspa achka valorniyoq kaqkunawan.

³⁹ Payqa mana yaykuy atina murallasqa llaqtakunatam vencenqa huklaw nacionniyoq runakunapa diosninpa yanapakuyninwan, premianqataqmi reyninkupaq chaskiq runakunatapas. Chay runakunata hatunchaspanmi achka runakunapi gobiernaq kanankupaqña churanqa, chakrakunatapas paykunamanqa yanapasqanmantam parteykarinqa.

⁴⁰ —Tukupay tiempo chayamuptinmi chay norte lawpi reytaqa guerrawan hapirunqa surlawpi kaq rey. Ichaqa chay norte lawpi reymi wayra para hinaraq mastarikunqa paypa contranpi. Chay norte nacionniyoq reyqariki pasanqa guerrapaq carretankunawanmi chaynataq sillada tropankunawanmi hinaspa nana-nanaq buquenkunawanmi, payqa chayarunqa nacionpi lloqlla kallpachkaq hinaraqmi.

⁴¹ Chay norte nacionniyoq reyqa yaykunqataqmi Kuyayllapaq Allpamanpas hinaspam wañurachinqa achka-achka runakunata, Edom nacionniyoq runakunawan Moab nacionniyoq runakunaqa paymantam ayqekunqaku, ayqekunqakutaqmi Amonpa mirayninmanta allin reqsisqa runakunapas.

⁴² Achka nacionkunapi munaychakuptinmi Egipto nacionpas mana lluptinqachu.

⁴³ Payqa hapikuykunqam chay Egipto nacionpa qori-qollqenkunatapas chaynataq ancha valorniyoq kaqkunatapas, Libia nacionniyoq runakunapas Cus nacionniyoq runakunapiwanmi paypa serviqninña rikurirunqaku.

⁴⁴ Ichaqa intipa qespimunan lawmantawan norte lawmantam uyarirunqa mancharikuypaq noticiakunata, piñakuyllawanñam lloqsinqa tukuy imatapas purmachinanpaq hinaspa achka-achka runakunata wañuchinanpaq.

⁴⁵ Chay reyqa sumaqllaña carpankunatam sayachinqa lamar qochamanta Diospaq sapaqchasqa Kuyayllapaq Moqoman riq ñanpi, ichaqa chayllapi wañunan tiempo chayaramuptinmi manaña pipas yanapanqachu.