Daniel 1 - Quechua Ayacucho Bible 1987

Babilonia llaqtapi Daniel tarikusqanmanta

¹ Juda nacionpa reynin Joacim kimsa watamanña gobiernachkaptinmi Babilonia nacionpa reynin Nabucodonosor hamurqa Jerusalen llaqtapa contranpi hinaspam llaqtapa muyuriqninpi campamentonta churarurqa.

² Juda nacionpa reynin Joacimtam Diospa templonpi kaq achka serviciokunatawan Señor qoykurqa Rey Nabucodonosorman hinaptinmi chay reyqa tukuy imata aparqa Sinar sutiyoq Babilonia nacionman, apasqan serviciokunatam churaykurqa taytachanpa kapuqninkuna waqaychana wasinman.

³ Chaymantam Rey Nabucodonosorqa palacionpi serviqninkunapa jefen Aspenazta kaynata kamachirqa: —Israelpa mirayninpi tarikuq reypa castankunatayá pusamuway, pusamuwaytaqyá ancha reqsisqa kamachikuqkunamanta

⁴ mozokunatapas. Paykunaqa kanqa allin qawapasllaña qarikunam, tukuy imapas yachaq hinaspa allin entiendeq qarikunam, paykunaqa kanqa palacioypi servikunankupaq hinamá. Paykunatayá yachachichunku kay Caldea lawpi rimaytawan libronchikkuna leeyta —nispa.

⁵ Rey Nabucodonosorqa kamachikurqataqmi: —Chay akllasqayki mozokunamanqa sapa punchawmi qonki ñoqapa mikunayta, tomanqakupas imam ñoqapa tomanay vinotataqmi. Kimsa wata yachachiptinkum serviqniykuna kanqa —nispa.

Danielwan kimsantin llaqtamasinkuna reypa palacionpi kasqankumanta

⁶ Judapa mirayninmanta chay akllasqa mozokunawanmi kachkarqa Daniel, Ananias, Misael hinaspa Azarias, paykunaqa karqa Judapa mirayninmi.

⁷ Paykunapa sutintam chay palaciopi servikuqkunapa jefen tikrarurqa. Danielpa sutinmi karqa Beltsasar, Ananiaspa sutinmi karqa Sadrac, Misaelpa sutinmi karqa Mesac, Azariaspa sutinñataqmi karqa Abed-nego.

⁸ Danielmi tukuy sonqonwan tantearurqa reypa mikuynin qosqankuta ama mikunanpaq hinaspa vino qosqankutapas ama tomananpaq. Diospa qayllanpi millakuypaq hina mana karunanpaqmi mana munarqachu chaykuna chaskiytaqa. Chayraykum Danielqa chay palaciopi serviqkunapa jefenta ruegakurqa chay mikuykunata ama qonanpaq.

⁹ Diospuni palaciopi serviqkunapa jefenta sonqochaykuptinmi Danielta llakipayarispan kuyapayarirqa.

¹⁰ Paymá Danielta nirqa: —Ñoqaqa manchakunim Reyniytaqa, paymi kamachiwarqa imam qamkunapa mikunaykichiktawan tomanaykichikta. Uyaykichik wakin wiñaymasikichik mozokunapa uyanmanta hukmanyasqata rey rikuruspanqa qamkunaraykuchá wañurachiwanqa —nispa.

¹¹ Hinaptinmi Daniel rimapayarqa chay jefepa churasqan mayordomota. Paytaqa churarqa Danielmanta, Ananiasmanta, Misaelmanta hinaspa Azariasmanta cuentallikunanpaqmi.

¹² Paytamá Daniel nirqa: —Ruegakuykim ñoqaykuta pruebawanaykikupaq, chunka punchawyá mikuchiwayku verdurakunallata hinaspayá yakullatataq tomasaqkupas.

¹³ Chaymantayá rikchayniykuta tupanachiy reypa mikunan mikuq mozokunawan hinaspañayá ñoqaykuwanqa ruray imam tanteasqaykiman hina —nispa.

¹⁴ Chaynapimá mayordomoqa imam mañakusqankuta uyariykuspan chunka punchaw pruebarqa.

¹⁵ Chunka punchaw pasaruptinmi chay mozokunapa rikchayninqa reypa mikuynin mikuq wakin mozokunapa rikchayninmantapas aswan allinraq karqa.

¹⁶ Chaynapim mayordomoqa apakuqña chay mozokunapaq reypa qosqan mikuytawan vinota hinaspam mozokunamanqa qoq verdurallataña.

¹⁷ Chay tawantin mozokunamanmi Dios qorqa yachaytawan allin yuyayniyoq kayta, chaynapim yacharqaku librokunapi kaqkunatawan tukuy ima yachaykunata. Danielqa entienderqataqmi llapa revelacionkunapa hinaspa mosqoykunapa imam ninantapas.

¹⁸ Reypa kamachisqanman hina mozokunata paypa ñawpaqninman pusanankupaq kimsa wataña cumplikuruptinmi chay palaciopi serviqkunapa jefen paykunata pusarqa Rey Nabucodonosorman.

¹⁹ Paykunawan rey rimaspanmi, ichaqa chay llapallan mozokunapiqa manam hukllatapas tarirqachu Danielta, Ananiasta, Misaelta hinaspa Azariasta hinaqa. Chaynapim paykunaqa akllasqa karqaku reypa serviqninña kanankupaq.

²⁰ Imapas yachay kaqkunamantawan entiendena kaqkunamanta rey tapuspanmi paykunata tarirqa nacionninpi brujokunamantapas hinaspa espiritistakunamantapas chunka kuti yachayniyoqtaraq.

²¹ Chaynapim Danielqa reyta servirqa Ciro sutiyoq reypa gobiernasqan punta watakama.