Cantares 8 - Quechua Ayacucho Bible 19871 Amalaya ñoqapa turiy rikuriruwaq. Amalaya mamaypa ñuñunwan uywasqa kawaq. Chayna kaptinqa callepich muchaykuykiman qamtaqa. Manach pipas despreciawanmanchu muchaykuptiyqa. 2 Hinaptinqa wasiymanmi pusaykiman. Mamaypa wasinmanmi yaykuchikiman. Hinaptinmi qamñataq yachachiwankiman. Hinaptinqa vinotach tomachikiman. Miski asnaqwan chaqrusqatach tomachikiman. Granadakunamanta aqatach tomachikiman. 3 *f**Ichoq brazonyá umaypi kachun. *f**Alleq brazonyá abrazawachun. Qarim nin: 4 Jerusalen llaqtapi doncellakuna, prometewaychik, kikinmanta munanankamayá kuyakuytaqa ama rikchachiychikchu. Jerusalen llaqtapi doncellakuna, prometewaychik, kikinmanta munanankamayá kuyakuytaqa ama hatarichiychikchu. Soqta kaq taki Doncellakunam nin: 5 ¿Pitaq chunniqmanta hamuq wak warmiqa? ¿Pitaq wak kuyay-yananman hapipakuykuspa hamuqqa? Manzana sachapa sikinpim rikchachirqayki. Chaypim dolorwan hapichikurqa qampa mamayki. Chaypim dolorwan hapichikuspa wachakusurqanki. Warmim nin: 6 Sonqoykipiyá marcasqata hina churaykuway. Brazoykipiyá marcasqata hina churaykuway. Wañuy hina llumpa-llumpay kallpayoqmi kuyakuyqa. Wañuq runaqa manam lloqsinmanchu sepulturamantaqa. Chaynam ñoqapas mana kachariymanchu kuyasqaytaqa. Lenguachkaq nina hinam cheqap kuyakuyqa. Tayta Diosmanta hamuq nina hinam kuyakuyqa. 7 Maynaña yakupas manam wañuchinmanchu kuyakuytaqa. Mayukunapas manam chinkachinmanchu kuyakuytaqa. Kuyakuyta tukuy kapuqninwan rantiy munaq runaqa, runakunapa llumpay asipayasqanmi kanqa. Warmikunapa turinkunam nin: 8 Kapuwachkankum panichayku ñoqaykupaqa. Ichaqa ñuñunpas chayraqmi wiñachkan paypaqa. ¿Imatataq rurasaqku yaykupakamuwaptinkuqa? 9 Sichum muralla kanman hinaptinqa hawanpich yapaykuymanku qollqemanta torrechakunata. Sichum punku kanman hinaptinqa cedromanta tablakunawancha tablearuymanku hawanta. Warmim nin: 10 Ñoqaqa kani muralla hinam. Ñuñuykunapas torrechakuna hinam. Hawkayachiqninmi kani ñoqaqa, chaynapaqmi qawawachkan kuyay-yanayqa. 11 Baal-hamon lawpim Salomonpa uvas huertan kapurqa. Chay uvas huertantam cuidaqkunaman qoykurqa. Cosecha tiempo chayamuptin qopunankupaqmi qoykurqa. Chunka hukniyoq kilo qollqeta qopunankupaqmi qoykurqa. 12 Salomon, qampaqyá kachun chunka hukniyoq kilo qollqeqa. Iskay kilo masnin qollqeñataqmi rurun cuidaqkunapaq kanqa. Ñoqapas kikiymi cuidakusaq uvas huertaytaqa. Qarim nin: 13 Huertakunapi tiyaq kuyasqalláy, amistadnikikunam uyarichkan voznikita. Uyariykachiwayá qampa voznikita. Warmim nin: 14 Utqamuyá kuyay yanalláy. Miski asnaq plantakunapa hawantayá luwichu hina kallpamuy. Miski asnaq plantayoq orqopi tarukacha hinayá kallpamuy. |