Cantares 7 - Quechua Ayacucho Bible 1987

Qarim nin:

¹ Kamachikuqpa warmi churin ¡mayna sumaqmi sandaliaykikunapi chakikikunaqa! Alhaja hinaraqmi kachkan qampa piernaykikunaqa. Alhaja ruraqpa cadenankuna hinaraqmi piernaykikunaqa.

² Kuyayllapaq puputikipas vino huntayoq ruyru taza hinam. Kuyayllapaq wiksaykipas montosqa trigo hinam. Amanqaykunapa chawpinpi montosqa trigo hinam.

³ Ñuñuykikunaqa mellizo uña luwichukuna hinam.

⁴ Kunkaykipas elefantepa waqonmanta rurasqa torre hinam. Ñawikikunapas Hesbon llaqtapi iskay estanquekuna hinam, Bat-rabim zaguanpa ladonpi iskay estanquekuna hinam. Senqaykipas Damasco llaqtaman qawaq Libano lawpi torre hinam.

⁵ Carmelo Orqo hinam kachkan umaykiqa. Grosella qaytu hinam kachkan chukchaykiqa. Reypa sonqontam suwan qaspa chukchaykiqa.

⁶ Kuyakusqalláy ¡mayna suma-sumaqmi kanki! ¡Mayna kuyayllapaqmi kanki!

⁷ Sayaynikiqa palmera sacha hinam. Ñuñuykikunaqa uvas sarta hinam.

⁸ Ñoqam nirqani palmera sachaman seqanaypaq hinaspa ruruyoq kallmanta pallakamunaypaq. Ñuñuykikunayá uvas sarta hina kachun. Samaynikiyá manzanakuna hina asnarichun.

⁹ Simikipas allin vino hinayá kachun. Kuyay-yanallayqa vinotayá tomaykuchun. Simintayá kirunkunapa chawpinta pasaykuchun.

Warmim nin:

¹⁰ Ñoqapam kuyay-yanayqa. Munallawanmi payqa.

¹¹ Kuyay-yanalláy, utqaymanyá hakuchik. Kuyay-yanalláy, campomanyá lloqsisunchik. Alheña waytakunapim tuta samasunchik.

¹² Tutapaytam uvas huertakunaman risunchik. Ikllimusqanta otaq mana ikllimusqantam qawamusunchik. Sisarusqanta otaq mana sisarusqantam qawamusunchik. Granadakuna waytarusqanta otaq mana waytarusqantam qawamusunchik. Chaypi kuyakuyniyta qomuptiymi kuyanakusunchik.

¹³ Mandragoras plantam miskillataña asnarichkan. Punkunchikpim tukuy gustoyoq frutakuna kachkan. Qaynapas-kunanpas pallasqa frutakunam kachkan. Kuyay-yanalláy chaykunaqa qampaq huñusqam kachkan.