Cantares 6 - Quechua Ayacucho Bible 1987

Doncellakunam nin:

¹ Llapallan warmikunamanta aswan buenamoza ¿maymantaq pasakun kuyay-yanaykiqa? ¿Maylawmantaq pasarqa kuyay-yanaykiqa? Qanwan kuskayá maskamusunchik paytaqa.

Warmim nin:

² Kuyay-yanayqa huertanmanmi rirqa. Miski asnaq plantakunapa kasqanmanmi rirqa. Payqa huertapi michimunanpaqmi rirqa. Amanqay waytakunata pallamunanpaqmi rirqa.

³ Ñoqaqa kani kuyay-yanaypam, payñataqmi ñoqapa. Amanqay waytakunapa chawpinpim michin payqa.

Pichqa kaq taki Qarim nin:

⁴ Kuyakusqalláy, qamqa sumaqllañam kanki. Tirza llaqta hina kuyayllapaqmi kanki. Jerusalen llaqta hina munayllapaqñam kanki. Banderayoq hina mana vencey atinam qamqa kanki.

⁵ Amañayá qawawayñachu qamqa. Sonqoytam suwaruwanki qamqa. Chukchaykikunaqa uraykamuchkaq cabrakuna hinam. Galaad Orqomanta uraykamuchkaq cabrakuna hinam.

⁶ Kiruykikunaqa ovejakuna hina lluchkay-lluchkaymi. Taqsakuna sitiomanta seqamuq ovejakuna hina yuraq-yuraqmi. Kiruykikunaqa rikchakun iskay wawayoqkama ovejakunamanmi. Kiruykikunaqa rikchakun mana qolloq ovejakunamanmi.

⁷ Sentidoykikunapas iskayman partisqa granada hina suma-sumaqmi. Veloykipa ukunpi sentidoykikunaqa ancha suma-sumaqmi.

⁸ Reypa warminkunam soqta chunka reinakuna. Reypa compañerankunam pusaq chunka warmikuna. Manaña yupay atinam doncella sipaskuna.

⁹ Doncella urpichallayqa sapachallanmi. Payqa mamanpa llumpa-llumpay kuyayninmi. Payqa wachakuqninpa aswan kuyayninmi. Doncellakuna qawaykuspam alabanku. Reinakunawan reypa compañerankunam alabanku.

Doncellakunam nin:

¹⁰ ¿Pitaq wak warmiqa inti qespimuchkaq hina rikurimuchkan? ¿Pitaq wak warmiqa killa hina kuyayllapaq qespimuchkan? Kancharichkaq inti hinam rikurimuchkan. Banderayoq hina mana vencey atinam hamuchkan.

Warmim nin:

¹¹ Ñoqaqa nogalniyoq huertamanmi rirqani. Wayqopi ikllimusqanta qawamuqmi rirqani uvas plantakunapa ikllimusqanta rikumunaypaq, granada sachakunapa waytarisqanta qawamunaypaq.

¹² Ichaqa qonqayllamantam sonqoypa munasqan cumplikururqa. Aylluykuna ukupi kamachikuqmi carretanman churaruwarqa.

Doncellakunam nin:

¹³ Kuyasqay Sulamit, kutikamuy, kutikamuy. Qawaykuytam munaykiku, kutikamuy, kutikamuy. ¿Imanasqataq munankichik ñoqa Sulamit sutiyoq qawayta? Munanikum Mahanaim llaqta fiestapi hina tusunaykita.