Cantares 5 - Quechua Ayacucho Bible 1987

Qarim nin:

¹ Panichalláy, huertaymanqa yaykuruniñam. Kuyay-yanalláy, huertaymanqa yaykuruniñam. Ñoqaqa huñuruniñam mirra sachapa weqentapas. Ñoqaqa huñuruniñam miski asnaq plantakunatapas. Panalpi mieltapas mikuruniñam. Vinotawan lechetapas tomaruniñam. Kuyasqay amigoykuna, mikukuychik, tomakuychik. Kuyasqay amigoykuna, munasqaykichikta tomaykuychik.

Doncellakunam nin: Tawa kaq taki Warmim nin:

² Ñoqam puñururqani ichaqa sonqoymi musyarqa. Kuyay-yanaymi punkuta takamuspa niwarqa: “Panichalláy, kuyay-yanalláy, umaymi sullawan nuyuy-nuyuy kachkan” nispa. “Doncella urpichalláy, chukchaykunam tuta sullawan nuyusqa kachkan” nispa.

³ Chaymi nirqani: “Pachaytam chustukuruniña ¿imapaqtaq kasqallan pachakusaq?” nispa. Chaymi nirqani: “Chakiykunatam mayllakuruniña ¿imapaqtaq kasqallan qachachasaq?” nispa.

⁴ Punkupa uchkuntam kuyay-yanay haywariykamurqa. Chaymi ñoqapa sonqoy payrayku hukmanyarurqa.

⁵ Kuyay yanayta kichanaypaqmi hatarirqani ñoqaqa. Chaymi makiykunamanta mirra perfume suturirqa. Dedoykunamantam punkupa cerrojonman suturirqa.

⁶ Yaykumunanpaq punkuta kichaykuptiymi manaña chaypichu kasqa, Paypa rimasqanta uyarisqaywanmi, sonqoy hukmanyarurqa. Payta maskaspaymi manaña tarirqanichu. Payta qayaptiypas manañam contestamuwarqachu.

⁷ Llaqta cuidaq guardiakunawanmi tuparurqani. Llaqtata muyuchkaptinkum tuparurqani. Chaymi maqaruwaspanku heridaruwarqaku. Muralla cuidaqkunam rebozayta qechuruwarqaku.

⁸ Jerusalen llaqtapi doncellakuna, prometewaychik. Kuyay-yanayta tarispaykichikqa paymanyá willaykuychik. Kuyakuymanta onqosqa kasqaytayá willaykuychik.

Doncellakunam nin:

⁹ Llapallan warmikunamanta aswan buenamoza ¿imanasqataq aswan allin kuyay-yanaykiqa? ¿Wakinmanta aswan allinchu kuyay-yanaykiqa? ¿Chaychum prometechiwankiku ñoqaykutaqa?

Warmim nin:

¹⁰ Kuyayllapaq mestizom kuyay-yanayqa. Waranqantin qarikunapipas suti reqsiyllam payqa.

¹¹ Qori-puro hina valorniyoqmi suma-sumaq umanpas. Chiwillo hina yanay-yanay qaspam chukchankunapas.

¹² Ñawinkunam yakupa patanpi iskay palomakuna hina kachkan. Lechewan bañasqa iskay palomakuna hinam kachkan. Paypa ñawinqa sumaq hapichisqa alhaja rumi hinam kachkan.

¹³ Paypa uyanqa miski asnaq waytayoq huerta hinam. Paypa uyanqa hatun miski asnaq plantakuna hinam. Siminpas mirra perfumeyoq puka wayta hinam.

¹⁴ Makinkunam berilo alhaja rumiyoq adornasqa qori anillokuna hina. Cuerponmi zafiro alhaja rumiyoq elefantepa waqon lluchkasqa hina.

¹⁵ Piernankunapas marmol rumimanta pilarkuna hinam. Qori-puropa hawanpi cimientasqa pilarkuna hinam. Rikchayninpas Libano law akllasqa cedrokuna hinam.

¹⁶ Siminmi ancha miskillaña. Tukuy imanmi munayllapaqña. Jerusalenpi doncellakuna, kuyay-yanayqa chaynam. Kuyakusqayqa chaynam.