Cantares 4 - Quechua Ayacucho Bible 1987

Qarim nin:

¹ Kuyakusqalláy ¡mayna kuyayllapaqmi qamqa kanki! Qamqariki ¡mayna suma-sumaqmi kanki! Qamqa palomakuna hina sumaqllaña ñawiyoqmi kanki. Chukchaykikunaqa uraykamuchkaq cabrakuna hinam. Galaad orqomanta uraykamuchkaq cabrakuna hinam.

² Kiruykikunaqa millwan rutusqa ovejakuna hina lluchkay-lluchkaymi. Taqsakuna sitiomanta seqamuq ovejakuna hina yuraq-yuraqmi. Kiruykikunaqa rikchakun iskay wawayoqkama ovejakunamanmi. Kiruykikunaqa rikchakun mana qolluq ovejakunamanmi.

³ Simikipas guindo qaytu hina suma-sumaqmi. Sentidoykikunapas iskayman partisqa granada hina suma-sumaqmi. Veloykipa ukunpi sentidoykikunaqa ancha suma-sumaqmi.

⁴ Kunkaykiqa Davidpa rurachisqan torre hinam. Kunkaykiqa armakuna warkuna torre hinam, waranqa harkachikuna arma warkuna hinam. Chaynam kunkaykimanta alhajaykikuna warkurayachkan. Llapallanmi valerosokunapa arman hina warkurayachkan.

⁵ Ñuñuykikunaqa luwichupa mellizo wawan hinam, amanqay waytakunapa chawpinpi mikuchkaq hinam.

⁶ Manaraq inti qespimuchkaptinmi mirrapa kasqan orqoman risaq. Manaraq llantuy pasaruchkaptinmi. inciensopa kasqan moqoman risaq.

⁷ Kuyasqalláy, qamqa lliw kuyayllapaqmi kanki. Kuyasqalláy, qamqa mana defectoyoqmi kanki.

⁸ Kuyay-yanalláy, Libano lawmantayá uraykusunchik. Kuyay-yanalláy, Libano lawmantayá ripukusunchik. Amana Orqopa puntanmantayá qawariykuy. Senir Orqopa puntanmantayá qawariykuy. Qamqa qawariykuy Hermon Orqopa puntanmantayá. Qamqa qawariykuy leonkunapa kasqan orqomantayá.

⁹ Sonqoytam suwaruwanki, panichalláy, sonqoytam suwaruwanki, kuyay-yanalláy. Huk qawariyllawanmi sonqoyta suwaruwanki. Kunkaykipi huk alhajallawanmi suwaruwanki.

¹⁰ Panichalláy ¡mayna sumaqmi kuyakuynikiqa! Kuyay-yanalláy ¡mayna sumaqmi kuyakuynikiqa! Vinomantapas aswan miskim kuyakuynikiqa. Olorkunamantapas aswan allinmi perfumekiqa.

¹¹ Kuyay-yanalláy, miel hinaraqmi qampa rimasqaykiqa. Miskillaña lechem simikipiqa kachkan. Miskillaña mielmi simikipiqa kachkan. Qampa pachaykim miskillataña asnarichkan. Libano Monte hinaraqmi asnarichkan.

¹² Panichalláy, cercosqa huerta hinam qamqa kanki. Kuyay-yanalláy, toqyaq yaku hina cercosqam qamqa kanki. Kuyay-yanalláy, wichqasqa pukyu hinam qamqa kanki.

¹³ Ikllirimuq granada huerta hinam qamqa kanki. Miskillataña ruruq granada hinam qamqa kanki. Chay huertaqa alheña waytayoqmi. Chay huertaqa nardo waytayoqmi.

¹⁴ Chaypiqa kachkanmi nardowan chiwanwaypas. Chaypiqa kachkanmi miski asnaq soqoswan canelapas. Kachkantaqmi inciensopaq llapallan sachakunapas. Kachkantaqmi mirra sachawan aloes plantapas. Kachkantaqmi miski asnaq allinnin plantakunapas.

¹⁵ Huertapi toqyaq yaku hinam qamqa kanki. Libano Orqomanta kallpaq yaku hinam qamqa kanki. Chay kallpaq yakuyuq pozo hinam qamqa kanki.

Warmim nin:

¹⁶ Norte law wayra, qamyá pukurikuy. Surlaw wayra, kaymanyá hamuy. Miski asnaqkunata cheqechinaykipaqyá pukurimuy. Huertaykimanyá hamuy, kuyay-yanalláy. miski rurunkunatayá mikuy kuyay-yanalláy.