Cantares 3 - Quechua Ayacucho Bible 1987

¹ Camaypim tutankuna maskarqani kuyasqayta. Maskaspaymi mana tarirqanichu kuyasqayta.

² Kunanqa hatarispayá muyuramusaq llaqtata. Callekunapiyá maskaramusaq kuyasqayta. Plazakunapiyá maskaramusaq kuyasqayta. Ichaqa manam tarimurqanichu kuyasqayta.

³ Llaqta cuidaq guardiakunawanmi tuparurqani. Llaqtata muyuchkaptinkum tuparurqani. Chaymi kuyasqaymanta tapukurqani.

⁴ Paykunamanta pasaruspaymi kuyasqayta tarirurqani. Tumpa ratollanmantam kuyasqayta tarirurqani. Hapiruspaymi mamaypa wasinman pusaykurqani. Wachakuwaqniypa cuartonmanmi pusaykurqani. Manaña kachaykuspaymi paytaqa pusaykurqani.

Qarim nin:

⁵ Jerusalen llaqtapi doncellakuna, campopi luwichukunaraykuyá prometewaychik. Campopi tarukakunaraykuyá prometewaychik. Kikinmanta munanankamayá kuyakuytaqa ama rikchachiychikchu. Kikinmanta munanankamayá kuyakuytaqa ama hatarichiychikchu.

Kimsa kaq taki Doncellakunam ninku:

⁶ ¿Pitaq wakqa chunniqmanta hamuchkan? Chutarikuq qosni hinam chunniqmanta hamuchkan. Mirrawan, inciensowan perfumasqallañam hamuchkan. Tukuy rikchaq olorwan perfumasqallañam hamuchkan. *f**Rantikuqpa olorninwan perfumasqallañam hamuchkan.

⁷ Chunniqmanta wak hamuqqa Salomonpa andasninmi. Wakqa soqta chunka soldadokunapa compañasqan andasninmi. Israel nacionniyoq valerosokunapa compañasqan andasninmi.

⁸ Chay soldadokunaqa llapallankum espadayoqkama kachkanku. Llapallankum peleanankupaq yachachisqakama kachkanku. Llapallankum weqawninkupi espadayoqkama kachkanku. Tutayaypi ima kaptinpas defiendekunankupaqmi listo kachkanku.

⁹ Rey Salomonmi andasta rurachikurqa. Libano law qeromantam rurachikurqa.

¹⁰ Sayaq adornonkunam karqa qollqemanta. Wasan takyachiqñataqmi karqa qorimanta. Tiyananmi grosella telawan forrasqa karqa. Ukuntam Jerusalenpi doncellakuna adornarqa. Kuyay sonqonkuwanmi paykunaqa adornarqa.

¹¹ Sion llaqtapi doncellakuna, lloqsimuychik. Lloqsimuspayá Rey Salomonta qawaychik. Mamanpa corona rurasqantayá qawaychik. Casarakunan punchawpaq coronantayá qawaychik. Kusikunan punchawpaq coronantayá qawaychik.