Cantares 2 - Quechua Ayacucho Bible 1987

Warmim nin:

¹ Saron lawpi chiwanway wayta hinam ñoqaqa kani. Qechwakunapi amanqay wayta hinam ñoqaqa kani.

Qarim nin:

² Kichkakunapa chawpinpi kaq amanqay wayta hinam kuyasqayqa. Chaynam doncellakunapa chawpinpi kachkan kuyasqayqa.

Warmim nin:

³ Monte sachakunapa chawpinpi manzana sacha hinam kuyay-yanayqa. Chaynam mozokunapa chawpinpi kachkan kuyay-yanayqa. ¡Mayna sumaqmi chay sachapa llantuyninpi tiyakuyqa! ¡Mayna miskim chay sachapa rurunkuna mikuyqa!

⁴ Payqariki convido wasimanmi pusawarqa ñoqataqa. Banderata hina sutillatam qawachiwan kuyakuynintaqa.

⁵ Kuyakuymanta onqosqa kasqayraykuyá kallpanchawaychik uvas pasaskunawan. Kuyakuymanta onqosqa kasqayraykuyá kallpanchawaychik manzanakunawan.

⁶ *f**Ichoq brazonyá umaypi kachun. *f**Alleq brazonwanyá abrazawachun.

Qarim nin:

⁷ Jerusalen llaqtapi doncellakuna, campopi luwichukunaraykuyá prometewaychik. Campopi tarukakunaraykuyá prometewaychik. Kikinmanta munanankamayá kuyakuytaqa ama rikchachiychikchu. Kikinmanta munanankamayá kuyakuytaqa ama hatarichiychikchu.

Iskay kaq taki Warmim nin:

⁸ Kuyay-yanaypa voznintaqa uyarichkaniñam. Ñoqapa kuyay-yanayqa hamuchkanñam. Orqokunapa hawantam pawamuchkan. Moqokunapa hawantam kallpamuchkan.

⁹ Kuyay-yanayqa luwichu hinam. Kuyay-yanayqa tarukacha hinam. Payqa perqapa qepanpiñam kachkan. Payqa ventanantam qawamuchkan. Payqa rejillasnintam wateqamuchkan.

¹⁰ Kuyay-yanaymi niwarqa: Kuyasqalláy, hatariyá. Sumaqchalláy, hakuchikyá.

¹¹ Poqoy tiempom pasarunña. Para tiempom tukurunña.

¹² Campopi waytakunam rikuriramunña. Takinapaq tiempom chayaramunña. Qoqñukunapa waqasqanpas campopim uyarikuchkanña.

¹³ Higos sachapa rurunkunam poqosqaña. Uvaspa sisanmi asnarin miskillataña. Kuyasqalláy, hatariyá. Sumaqchalláy, hakuchikyá.

¹⁴ Orqopa raqrankunapi pakakuq urpichalláy, qaqapa uchkunkunapi pakakuq urpichalláy, uyaykitayá rikuykachiway. Voznikitayá uyariykachiway. ¡Mayna sumaqmi qampa vozniki uyariykuyqa! ¡Mayna sumaqmi qampa uyayki rikuykuyqa!

Iskayninkum nin:

¹⁵ Uvas plantakuna dañaq atoqkunata hapimuychik. Uvaspa sisan dañaq atoqchakunata hapimuychik.

Warmim nin:

¹⁶ Kuyay-yanayqa ñoqapam, paypam kani ñoqaqa. Amanqay waytakunapa chawpinpim michin payqa.

¹⁷ Manaraq inti qespimuchkaptinyá kutikamuy yanalláy. Manaraq llantuy pasaruchkaptinyá kutikamuy yanalláy. Qaqakunapi purichkaq luwichu hinayá qamqa kay. Qaqakunapi purichkaq tarukacha hinayá qamqa kay.