Cantares 1 - Quechua Ayacucho Bible 1987

¹ Salomonpa qellqasqan sumaqllaña taki.

Punta kaq taki Warmim nin:

² Muchakuq simillaykiwanyá muchaykuway. Vinomantapas aswan miskim kuyawasqaykiqa.

³ Miskillatañam perfumekikunaqa asnarinqa. Tallisqa perfumepa asnariynin hinam sumaq sutikiqa. Chayraykum kuyasunki doncellakunaqa.

⁴ ¡Reynilláy, kallpayllayá qamqa pusakuway! ¡Reynilláy cuartoykimanyá qamqa pusakuway! Ñoqaykuqa sinchillatañam qanwan kusikusaqku. Kuyakuynikitam vinomantapas aswan masta reqsichisaqku. Chayraykum qamtaqa doncellakuna kuyasunki llapallanku.

Doncellakunam nin: Warmim nin:

⁵ Jerusalen llaqtapi *f**yachaq warmikuna, zambacha kaspapas ñoqaqa buenamozam kani. Cedar lawpi karpakuna hina zambacham ñoqaqa kani. Salomonpa telankuna hina sumaqcham ñoqaqa kani.

⁶ Zambacha kasqaytaqa amayá qawawaychikchu. Intipa yanayarachiwasqantaqa amayá qawawaychikchu. Zambachaqa kachkani inti yanayarachiwasqanraykum. Turiykuna contraypi piñakuruspankum uvas huerta cuidanaypaq churaruwanku ñoqataqa. Manam cuidarqanichu kikiypa uvas huertaytaqa.

⁷ Kuyakusqalláy, qamyá willaykullaway: ¿Maypitaq qamqa michinki ovejaykikunata? ¿Maypitaq chawpi punchawpi samachinki ovejaykikunata? ¿Imanasqataq ñoqaqa velowan tapasqa warmi hina puriyman? ¿Imanasqataq michiqmasikikunapa kasqanpiqa qamta maskaykiman?

Doncellakunam nin:

⁸ Warmikunamanta ancha buenamozam kanki qamqa. Maypi kasqanta mana yachaspaykiqa ovejakunapa yupinta qatipaspaykiyá lloqsiy. Cabrachaykikunatapas hatuskunapa waqtampiyá michiy.

Qarim nin:

⁹ Kuyakusqalláy, Rey Faraonpa carretan aysaq yegua hinam qamqa kanki. Chayna sumaq kaqwanmi qamtaqa tupachiki.

¹⁰ ¡Ima sumaqmi perlaskunawan adornasqa uyaykiqa! ¡Ima sumaqmi sumaq alhajakunawan adornasqa kunkaykiqa!

¹¹ Qorimanta collarkunatam rurapusqaykiku. Qollqewan adornasqatam rurapusqaykiku.

Warmim nin:

¹² Reymi mikunanpaq mesanpi tiyaykurqa. Chaymi perfume miskillataña asnarirqa.

¹³ Kuyay-yanayqa wayqachapi mirra planta perfume hinam. Ñunuykunapa chawpinpi tukuy tiempo kaq perfume hinam.

¹⁴ Kuyay-yanayqa En-gadi law uvas huertakunapi alheña wayta hinam.

Qarim nin:

¹⁵ Kuyakusqalláy ¡mayna kuyayllapaqmi qamqa kanki! Qamqariki ¡mayna suma-sumaqmi kanki! Qamqa palomakuna hina sumaqllaña ñawiyoqmi kanki.

Warmim nin:

¹⁶ Kuyay-yanalláy, buenmozom qamqa kanki. Kuyay-yanalláy, kuyapasmi qamqa kanki. Camanchikmi kachkan miski asnaq qorakunamanta.

Qarim nin:

¹⁷ Wasinchikpa vigankunam kachkan cedro sachamanta. Techonchikpa tablankunam kachkan cipres sachamanta.