Apocalipsis 9 - Quechua Ayacucho Bible 1987

¹ Pichqa kaq angel cornetillanta tocaykuptinñataqmi lucerota rikurqani cielomanta kay pachaman wichiykamuqta, chay Lucerom uku pachapa llaventa chaskirqa.

² Chay uku pachata kichaykuptinmi qosniriramurqa hatu-hatun hornomanta hina, chay qosnim tutayarachirqa intitawan cielota.

³ Chay qosnimanta aqarway urukuna lloqsiramuspanmi kay pachaman mastarikurqa, chaykunaqa kasqa atoq-atoqkuna hina kachukuqmi.

⁴ Chaykunataqmi kamachisqa karqa kay pachapi qorakunata, imapas verde kaqkunata hinaspa sachakunata mana mikunanpaq, kamachisqaqa karqa Diospa *f**sellonwan urkunpi mana marcasqa runakunallata kachunanpaqmi.

⁵ Kamachisqaqa karqa manataqmi runakuna wañuchinanpaqchu aswanqa pichqa killantin kachuspa ñakarichinallanpaqmi. Chay kachusqankupa nanayninqa karqa atoq-atoqpa kachukuynin hinam.

⁶ Chay punchawkunaqa runakunam wañuyta maskanqa ichaqa manam tarinqakuchu, wañuyta munaspankupas manam wañunqakuchu.

⁷ Chay aqarwaykunaqa kasqa guerrapaq alistasqa caballokuna hinam. Umanpim kasqa qorimanta corona hina, uyanñataqmi kasqa runapa uyan hina.

⁸ Chukchanmi kasqa warmipa chukchan hina, kirunñataqmi kasqa leonpa kirun hina.

⁹ Qasqonku harkaqñataqmi kasqa fierromanta harkachikuna hinaraq, raprankupa qapariyninñataqmi kasqa caballokunapa aysasqan guerraman riq carretakuna hinaraq.

¹⁰ Chupankuñataqmi kasqa atoq-atoq hina kachukuq, chaynaqa karqa chaywan kachuspa runakunata pichqa killa ñakarichinanpaqmi.

¹¹ Chay aqarway urukunaqa kamachiqniyoqmi karqaku, chay kamachiqninqa karqa uku pachapi munaychakuq angelmi, chay angelpa sutinmi karqa *f**hebreo rimaypi Abadon, *f**griego rimaypiñataq Apolion, chay sutiqa “chinkachiq” ninanmi.

¹² Pasarurqam chay angelpa punta kaq “¡Ay!” nisqanqa. Ichaqa hamuchkanmi iskay sasachakuykunaraq.

¹³ Soqta kaq angel cornetillanta tocaykuptinñataqmi uyarirqani qayakuyta. Chay qayakuymi uyarikamurqa Diospa qayllanpi qori *f**altarpa hawanpi tawa waqrachakunapa chawpinmanta.

¹⁴ Chaymi cornetillayoq qanchis kaq angelta nirqa: —Kachariy Eufrates Mayupa patanpi watasqa tawa angelkunata —nispa.

¹⁵ Hinaptinmi kachaykurqa chay tawan angelkunata chaynapi llapa runakunamanta kimsa kaq partenta wañuchinanpaq. Paykunam chay horapaq, chay punchawpaq, chay killapaq hinaspa chay watapaq alistasqa karqaku.

¹⁶ Uyarisqayman hinaqa caballopi sillasqa soldadokunam karqa iskay pachak waranqa kuti waranqa.

¹⁷ Revelacionniypimá Chuya Espiritu qawachiwarqa caballokunapi sillasqakunata. Paykunaqa qasqontam harkachikusqa nina hina puka harkachikunawan, azul harkachikunawan hinaspa qellu harkachikunawan. Caballokunaqa kasqa leon hina umayoqkunam, chay caballokunapa siminmantam lloqsimurqa nina, qosni hinaspa azufre.

¹⁸ Runakunapa kimsa kaq partenmi wañururqa chay caballokunapa siminmanta lloqsimuq kimsa castigowan otaq ninawan, qosniwan hinaspa azufrewan.

¹⁹ Chay caballokunapa kallpanqa kasqa siminpiwan chupanpim. Chay chupankunaqa kasqa culebrakuna hina umayoqmi, chaywanmi kachukuq.

²⁰ Chay castigokunamanta lluptiq runakunapas manataqmi wanakurqakuchu mana allinkuna rurayninkumantaqa. Manamá wanakurqakuchu demoniokuna adoraymanta nitaq qorimanta, qollqemanta, broncemanta, rumimanta hinaspa kullumanta taytacha-mamachakuna adoraymantapas. Chay taytacha-mamachakunaqa manam rikukunchu, manam uyarikunchu, manataqmi purinchu.

²¹ Chay runakunaqa manataqmi wanakurqakuchu runakuna wañuchisqankumantapas, layqakusqankumantapas, huchapakusqankumantapas nitaq suwakusqankumantapas.