Apocalipsis 7 - Quechua Ayacucho Bible 1987

Israel ayllukunapi señalasqa kaqkunamanta

¹ Chaymantam rikurqani tawa angelkunata kay pachapa tawan esquinankunapi sayachkaqta, paykunam wayrata harkachkasqa kay pachamanpas, lamar qochamanpas chaynataq ima sachamanpas mana wayramunanpaq.

² Rikurqanitaqmi huk angeltapas intipa qespimunan lawmanta hamuchkaqta, payqa kawsaq Diospa señalanan *f**sellontam hapichkasqa. Chaymi kay pachatawan lamar qochata dañananpaq kaq atiyniyoq tawa angelkunata qaparispan chay angel nirqa:

³ —Diospa serviqninkunata urkunpi *f**sellowan manaraq markachkaptiykuqa amaraqyá dañaychikchu allpatapas, lamar qochatapas nitaq sachakunatapas.

⁴ Chaymi uyarirqani llapallan Israel ayllukunamanta señalasqakunaqa pachak tawa chunkan tawayoq waranqa kasqanta.

^5-8 Chunka iskayniyoq waranqam karqa Judá ayllumanta, chunka iskayniyoq waranqakamataqmi karqa Ruben ayllumantapas, Gad ayllumantapas, Aser ayllumantapas, Neftaliy ayllumantapas, Manasés ayllumantapas, Simeon ayllumantapas, Leviy ayllumantapas, Isacar ayllumantapas, Zabulon ayllumantapas, Josey ayllumantapas chaynataq Benjamin ayllumantapas.

Yuraq pachawan achkallaña pachasqakunamanta

⁹ Chaymantam rikurqani achkallaña runakunata llapallan nacionkunamanta, ayllukunamanta, castakunamanta hinaspa tukuy rikchaq rimayniyoqkunamanta. Paykunaqa sayachkasqaku hatun tiyanapa ñawpaqninpim hinaspa *f**Carneropa qayllanpim. Achka-achkallaña kaptinkum mana pipas yupayta atirqachu. Yuraq pachawan pachasqakama kaspam sapakama hapirqaku palmerapa kallmanta.

¹⁰ Llapallankum qayaykachakurqaku: Salvacionninchikqa tiyananpi tiyaq Diosninchikmantam hinaspa *f**Carneromantam.

¹¹ Llapallan angelkunam sayachkasqaku Diospa tiyananpa, *f**ancianokunapa hinaspa tawa animalkunapa muyuriqninpi. Chay angelkunam Diospa tiyananpa ñawpaqninpi qonqoranpa kumuykuspanku payta adorarqaku:

¹² ¡Amén! Yachayniyoq kasqanraykuyá Diosninchikta hatunchasunchik hinaspa adorasunchik. Atipayninmantawan kallpanmantayá wiña-wiñaypaq graciasta qosunchik hinaspa yupaychasunchik. Amén.

¹³ Hinaptinmi huknin *f**anciano tapuwarqa: —¿Pikunataq kay yuraq pachayoqkunaqa? ¿Maymantataq hamurqaku? —nispa.

¹⁴ Ñoqañataqmi nirqani: —Señorlláy, qanmi yachanki —nispa. Chaymi payñataq niwarqa: —Paykunaqa hatu-hatun ñakariymanta hamuqkunam hinaspa pachankutapas taqsaspa *f**Carneropa yawarninwan yuraqyachiqkunam.

¹⁵ Chayraykum paykunaqa Diospa tiyananpa ñawpaqninpi kachkanku hinaspam tuta punchaw payta servichkanku templonpi. Tiyananpi tiyaq Diosñataqmi karpa hina harkaykunqa.

¹⁶ Paykunaqa manañam yarqaymantapas, yakumantapas kanqakuñachu, nitaqmi intipas nitaq ima rupaypas rupanqañachu.

¹⁷ Diospa tiyananpa chawpinpi kaq *f**Carnerom paykunataqa harkanqa ovejakunata michichkaq hina, paykunataqa kawsachikuq yakukunamanmi, pusanqa. Waqasqanku weqenkutapas Diosñam pichanqa.