Apocalipsis 6 - Quechua Ayacucho Bible 1987

Qanchis sellokunamanta

¹ Revelacionniypi qanchis *f**sellomanta punta kaq sellota *f**Carnero kichaykuptinmi chay tawa animalpa huknin rayo hina qaparirqa: —Hamuy —nispa.

² Rikurqanitaqmi huk yuraq caballotapas. Sillakuqninmi kasqa flechanayoq. Payman coronata qoykuptinkum lloqsirqa vencestin aswanraq vencenanpaq.

³ Iskay kaq *f**sellota *f**Carnero kichaykuptinñataqmi iskay kaq animal nirqa: —Hamuy —nispa.

⁴ Hinaptinmi lloqsiramurqa huknin caballo, chay caballoqa kasqa pukam. Sillakuqninmanmi atiyta qoykurqaku kay pachamanta hawkayayta qechunanpaq chaymi llapa runakuna wañuchinakurqaku. Paymanqa qorqakutaqmi hatun espadatapas.

⁵ Kimsa kaq sellota *f**Carnero kichaykuptinñataqmi kimsa kaq animal nirqa: —Hamuy —nispa. Hinaptinmi qawarispay rikururqani huk yana caballota, sillakuqninmi hapichkasqa huk balanzata.

⁶ Chaymi tawa animalkunapa chawpinmanta qayakamurqa: —Huk kilo trigom jornalpa chanin qollqepaq. Kimsa kilo cebadam jornalpa chanin qollqepaq. Ichaqa amam usuchinkichu aceitetawan vinotaqa —nispa.

⁷ Tawa kaq *f**sellota *f**Carnero kichaykuptinñataqmi tawa kaq animal qayakamurqa: —Hamuy —nispa.

⁸ Hinaptinmi qawarispay rikururqani qellu caballota, sillakuqninpa sutinmi kasqa Wañuy, qepan qatiqñataqmi kasqa wañusqakunapa kasqanpi munaychakuq. Paymanmi atiyta qoykurqaku kay pachapa tawa kaq parten runakunata guerrawan, yarqaywan, onqoywan hinaspa kay pachapi monte animalkunawan wañuchinanpaq.

⁹ Pichqa kaq *f**sellota *f**Carnero kichaykuptinñataqmi *f**altarpa sikinpi rikururqani Diospa palabranta willakusqankurayku wañuqkunata.

¹⁰ Paykunam qaparispa nirqaku: —Chuya kaq hinaspa prometesqaykikuna cumpliq Señor ¿haykapikamataq wañuchiwasqankumanta mana juzgankichu hinaspa mana vengakunkichu kay pachapi *f**yachaqkunata? —nispa.

¹¹ Sapakamaman yuraq pachakunata qoykuspam nirqaku: —Asllatapas suyaykuychikraqyá Cristota serviqmasikichik wawqe-panikuna qamkuna hina wañuchisqa kanankukama —nispa.

¹² Soqta kaq *f**sellota *f**Carnero kichaykuptinñataqmi karqa hatun temblor. Intim tutayarurqa luto pacha hina, enteron killañataqmi rikurirurqa yawar hina.

¹³ Cielopi lucerokunapas kay pachamanmi wichiykamurqa wayra taspiptin llullu higos wichichkaq hina.

¹⁴ Cielokunapas papel wankusqa hina chinkaruptinmi orqokunawan islakunapas maymi kasqanmanta kuyuchisqa karurqa.

¹⁵ Kay pachapi hatun kamachikuqkunapas pakakururqakum machaykunapi, orqokunapi hinaspa qaqakunapa chawpinpi, pakakururqataqmi hatunchakuqkunapas, apukunapas, capitankunapas, atiyniyoqkunapas, llapallan sirvientekunapas chaynataq libre kaqkunapas.

¹⁶ Paykunam orqokunatawan qaqakunata nirqaku: —Tiyananpi tiyaq Diosmantawan *f**Carneropa piñakuyninmanta pakaykuwanaykikupaqyá tuñiykamuy.

¹⁷ Castigananku hatu-hatun punchawmi chayaramun. ¡Piraq chaytaqa aguantanman! —nispa.