Apocalipsis 22 - Quechua Ayacucho Bible 1987

¹ Hinaptinmi huk angel qawaykachiwarqa kallpaq chuyay-chuyay mayuta. Chay yakuqa kasqa Cristal hina chuyay-chuyaymi, chayqa lloqsimusqa Diospa hinaspa *f**Carneropa tiyananmantam.

² Chay llaqtapa callenpa chawpinpiñataqmi mayupa kaylaw-waklawninpi wiñarqa Kawsay qokuq Sacha. Watapim rurusqa chunka iskayniyoq kutita. Killan-killanmi chay sachaqa rurusqa. Rapinkunañataqmi kasqa nacionkuna hampikunankupaq.

³ Manañam chaypiqa kanqañachu ñakasqakunapas. Diospa hinaspa *f**Carneropa tiyananñam chaypiqa kanqa hinaptinmi serviqninkunañataq servinqaku.

⁴ Paykunaqa Diospa uyantam qawanqaku, urkunkupiñataqmi paypa sutin kanqa.

⁵ Chay llaqtapiqa manam kanqañachu tutapas, chaypi *f**yachaqkunaqa manam necesitanqakuñachu achkitapas nitaq intitapas. Señor Diosllañam paykunataqa achkinqa, hinaptinmi wiña-wiñaypaq gobiernanqaku.

Jesucristopa kutimuynin hichpamusqanmanta

⁶ Chaymantam angel niwarqa: —Kay palabrakunaqa confiakunapaq cheqappunim. Willakuqninkunaman yachachiq Señor Diosmi kachamurqa angelninta chaylla pasaqkunamanta serviqninkunaman qawachinanpaq.

⁷ —¡Chayllam hamusaq! ¡Mayna kusisqam kay libropi qellqasqaman hina Diospa willakusqan kasukuqkunaqa!

⁸ Ñoqa Juanmi kaykunata rikuspay uyarirqani. Kaykunata rikuykuspaymi hinaspa uyariykuspaymi qawachiwaqniy angelpa qayllanpi qonqorakuykurqani adoranaypaq.

⁹ Hinaptinmi payñataq niwarqa: —Ama qonqorakuychu ñoqaqa qampapas, wawqe-panikikunapapas, Diosmanta willakuqkunapapas chaynataq kay libropi qellqasqa kaqkuna kasukuqkunapapas serviqmasillanmi kani. Adoraspaqa-adoray Diosllatayá —nispa.

¹⁰ Niwarqataqmi: —Kay libropi qellqasqa Diospa willakuynintaqa amayá wichqaychu, ñam hichpamuchkanña chaykunapa pasakunan tiempoqa.

¹¹ Mana allin ruraqqa mana allintaraqyá rurachun, millakuypaq ruraqqa millakuypaqtaraqyá rurachun, allin ruraqñataqyá allintaraq rurachun, Diosllapaqña kawsaqpas Diosllapaqñayá kawsachun —nispa.

¹² —Arí, chayllam hamusaq, apamuchkanim premiotapas, chaytaqa sapakamamanmi qosaq rurasqanman hina.

¹³ Ñoqam kani qallariypas, tukupaypas, punta kaqpas chaynataq qepa kaqpas.

¹⁴ Mayna kusisqam pachan taqsakuqkunaqa, paykunaqa punkunta llaqtaman yaykuspam mikunqaku Kawsay Qokuq Sachapa rurunta.

¹⁵ Ichaqa hawapim qepanqaku allqo hina kawsaqkunaqa, brujokunaqa, huchapakuqkunaqa, runa wañuchiqkunaqa, taytacha-mamacha adoraqkunaqa hinaspa llullakuqkunaqa.

¹⁶ —Ñoqa Jesusmi kachamurqani angelniyta kaykunata iñiqkunaman willananpaq. Ñoqaqa kani sachapa sapin hina Rey Davidpa castanmi, ñoqataqmi kani achikyay luceropas.

¹⁷ Chuya Espirituwan Carneropa novianmi nin: —Hamuy —nispa. Uyariqpas nichun: —Hamuy —nispa. Pipas yakunayachikuqqa hamuspayá kawsachikuq yakuta tomachun mana imallapaq.

¹⁸ Kay libropi qellqasqaman hina Diospa revelasqan llapallan uyariqkunamanmi nini: Pipas kaykunaman yapaptinqa Diosmi paymanpas yapanqa kay libropi qellqasqa kaq hatun castigokunata.

¹⁹ Pipas kay qellqasqakunamanta qechuptinqa, chay qechuqpa tupaqnintam Diospas qechunqa Kawsay Qokuq Sachamanta, chuya llaqtamanta hinaspa kay libropi qellqasqa kaqkunamanta.

²⁰ Kaykunamanta willakuqmi nin: —Arí, chayllam hamusaq —nispa. Amén. ¡Hamuy Señor Jesus!

²¹ Señor Jesusyá favorecesunkichik llapallaykichikta. Amén.