Apocalipsis 19 - Quechua Ayacucho Bible 1987

¹ Chaykunapa qepantam hanaq pachapi achka runakuna qaparirqa: ¡Aleluya! Diosllanchikmantam hamun salvacionqa. Payllamantam hamun kanchariyninwan atiyninqa.

² Payqa cheqap allin arregloman hinam llumpay huchallikuq chuchumikata castigarqa. Chay warmiqariki huchapakuyninwanmi kay pachata qanracharurqa. Serviqninkuna wañuchisqanmantam Diospuni vengakurun chay warmitaqa.

³ Huktawanmi nirqaku: —¡Aleluya! Chay llaqtaqa wiña-wiñaypaqmi qosninqa —nispa.

⁴ Hinaptinmi iskay chunka tawayoq *f**ancianokunapiwan chay tawa animalkuna qonqorakuykuspanku adorarqaku tiyananpi tiyaq Diosta: —¡Amén! ¡Aleluya! —nispa.

⁵ Hinaptinmi tiyananmanta nimurqa: Llapallan serviqninkunaqa Diosninchiktayá alabaychik. Payta manchakuqkunaqa taksapas-hatunpas paytayá alabaychik.

Hanaq pachapi casamientomanta

⁶ Uyarirqanitaqmi achka runakunapa voznintapas achka yakukunapa qapariyninta hina hinaspa rayokunapa tunrururuyninta hina, paykunam nirqaku: ¡Aleluya! Tukuy atipayniyoq Señor Diosninchikmi gobiernachkan.

⁷ Llumpa-llumpay kusikuywanyá alabasunchik *f**Carneropa casarakuynin chayaramusqanrayku chaynataq novianpas listollaña kasqanrayku.

⁸ Noviaqa yuraq-yuraq linowan pachasqam kachkan. Yuraq-yuraq linoqa Diosllapaqña kawsaqkunapa sumaq kawsakuyninmi kachkan.

⁹ Hinaptinmi angelñataq niwarqa: —Qellqay kayta: “Mayna kusisqam *f**Carneropa casarakuyninman qayasqakunaqa” nispa. Angelqa niwarqataqmi: —Kaykunaqa Diospa cheqap rimarisqankunam —nispa.

¹⁰ Adoranaypaq *f**angelpa qayllanman qonqorakuykuptiymi payñataq niwarqa: —Ama qonqorakuychu ñoqaqa qampapas chaynataq Jesusmanta willakuq wawqe-panikikunapapas Diosta serviqmasillanmi kani. Adoraspaqa-adoray Diosllatayá. Jesusmanta cheqap willakuqqa Diospa revelasqantam yachachin —nispa.

Yuraq caballopi sillakuqmanta

¹¹ Chaymantam rikurqani hanaq pacha kicharayachkaqta, chaypim rikurirurqa huk yuraq caballo, sillakuqninpa sutinmi kasqa Confiakuna hinaspa Cheqap. Payqa allin arregloman hinam juzganpas hinaspa peleanpas.

¹² Paypaqa ñawinpas kasqa kancharichkaq nina hinam, umanpiñataqmi kasqa achka coronakuna. Paypiqa kasqam qellqasqa sutinpas, chaytaqa payllam reqsisqa.

¹³ Payqa kachkasqa yawarwan chapusqa pachayoqmi, sutinñataqmi kasqa “Diospa Simin” niq.

¹⁴ Hanaq pachapi kaq tropakunam qatirqa yuraq caballokunapi yuraq-yuraq lino pachayoqkama.

¹⁵ Paypa siminmantam lloqsimurqa ñawchi espada chaywan nacionkunata vencenanpaq. Payqa nacionkunatam kamachinqa fierromanta tawnawan hina. Vinota rurananpaq uvasta saruchkaq hinam “Tukuy Atipayniyoq Diospa piñakuynin” sutiyoq vinota ruranqa.

¹⁶ Pachanpipas chaynataq piernanpipas kayna qellqasqam kasqa: “REYKUNAPAPAS REYNIN, SEÑORKUNAPAPAS SEÑORNIN” niq.

¹⁷ Rikurqanitaqmi huk angeltapas intipi sayachkaqta. Paymi llapallan alton pawaq animalkunata qayarqa kaynata: —Huñunakuspayá Diospa convidonman hamuychik,

¹⁸ reykunapa, capitankunapa, valeroso runakunapa, caballokunapa, sillakuqkunapa, llapallan librekunapa, sirvientekunapa, taksakunapa hinaspa hatunkunapa aychanta mikunaykichikpaq —nispa.

¹⁹ Hinaptinmi Manchakuypaq Animalta rikururqani kay pachapi reykunatawan. Paykunaqa huñunasqa kachkasqa tropantinmi caballopi sillakuqpa contranpi hinaspa tropankunapa contranpi peleanankupaq.

²⁰ Manchakuypaq Animalmi Llulla Willakuqpiwan presochasqa karurqaku, chay Llulla Willakuqmi Manchakuypaq Animalpa qayllanpi *f**milagrokunataraq ruraspan engañarqa chay animalpa marcan chaskiqkunata, engañarqataqmi chay Animalpa imagennin adoraqkunatapas. Chay Manchakuypaq Animalqa Llulla Willakuqpiwanmi kawsachkaqlla wischusqa karqaku azufreyoq rupachkaq qochaman.

²¹ Wakinninkuñataqmi caballopi sillakuqpa siminmanta lloqsimuq espadawan wañuchisqa karqaku, hinaptinmi alton pawaq llapallan animalkuna saksarurqaku paykunapa aychanwan.