Apocalipsis 16 - Quechua Ayacucho Bible 1987

Castigopaq tazonkunamanta

¹ Templomantam huk hatun qayakuyta uyarirqani, qanchis angelkunamanmi kaynata nimurqa: —Rispayá allpa pachaman tallimuychik Diospa piñakuyninwan huntasqa qanchis tazonkunamanta.

² Punta kaq angelmi kay pachaman talliykamurqa tazonninmanta. Hinaptinmi Manchakuypaq Animalpa marcan marcayoq hinaspa imagennin adoraq runakunapi rikurirurqa uta hina nanachikuqllaña onqoy.

³ Iskay kaq angelpas tazonninmantam talliykurqa lamar qochaman, hinaptinmi wañusqa yawar hina lamar qochapi yaku rikurirurqa chaymi yakupi kawsaq tukuy rikchaq animalkunapas wañururqa.

⁴ Kimsa kaq angelpas tazonninmantam talliykurqa mayukunapa hawanmanwan pukyukunapa hawanman hinaptinmi yawaryarurqa.

⁵ Hinaptinmi yakupi munaychakuq angel nirqa: Señorlláy, chaynata juzgaspaykiqa allintapunim rurachkanki. Qamqa kunanpas, ñawpaqpas chuya Diosmi kanki.

⁶ Chay juzgasqayki runakunaqa qamllapaqña kawsaqkunatam wañuchirqaku. Qanmanta willakuqkunapa yawarnintam chaqchurqaku. Chayna rurasqankumantam paykunamanpas yawarta upyarachinki. Imam chaskinankutamá paykunamanqa qoykunki.

⁷ Uyarirqanitaqmi *f**altarmanta kayna nimuqtapas: Arí, Tukuy Atipayniyoq Señor Diosnilláy, qamqariki allintapunim hinaspa cheqaptapunim juzganki.

⁸ Tawa kaq angelpas tazonninmantam talliykurqa intiman hinaptinmi intiman atiy qosqa karqa rupayninwan runakunata rupananpaq.

⁹ Hinaptinmi llapallan runakuna ancha rupaywan rupasqa rikurirurqaku, ichaqa manam wanakurqakuchu nitaqmi Diostapas alabarqakuchu, paykunaqa aswanraqmi kay castigokuna apachimuq Diostapas tukuy mana allinta nispanku kamirqaku.

¹⁰ Pichqa kaq angelpas tazonninmantam talliykurqa Manchakuypaq Animalpa tiyananman hinaptinmi gobiernasqan tutayarurqa, chaymi runakunañataq nanaywan qallunkuta kachukurqaku.

¹¹ Ichaqa chaywanpas manam wanakurqakuchu mana allin rurayninkumantaqa, paykunaqa aswanraqmi hanaq pachapi kaq Diosta kamirqaku, chaynataqa kamirqaku nanaypi kasqankuraykum chaynataq uta hina onqoyniyoq kasqankuraykum.

¹² Soqta kaq angelpas tazonninmantam talliykamurqa hatun Eufrates Mayuman, hinaptinmi chay mayu chakirurqa, chakirusqaqa intipa qespimunan lawmanta hamuq reykuna chayninta chimpanankupaqmi.

¹³ Hinaptinmi rikurqani *f**Dragonpa siminmantawan Manchakuypaq Animalpa siminmanta hinaspa Llulla Willakuqpa siminmanta kimsa mana allin espiritukuna kayra hina lloqsimuqta.

¹⁴ Chaykunaqa kasqa demoniokunapa espiritunkunam. Milagrokunata ruraspankum lloqsirqaku kay pachapi llapallan reykuna huñuq, huñumurqakuqa tukuy atiyniyoq Diospa punchawninpi guerrapi peleanankupaqmi.

¹⁵ —Ñoqaqa qonqayllatam suwa hina kutiramusaq. Mayna kusisqam rikchaspa pachan waqaychaqkunaqa, paykunaqa manam qalallachu purinqaku nitaqmi penqayninkutapas rikuchikunqakuchu.

¹⁶ Chay espiritukunam reykunata huñururqa *f**hebreo rimaypi Armagedonwan sutichasqa sitiopi.

¹⁷ Qanchis kaq angelpas tazonninmantam talliykamurqa wayraman, hinaptinmi hanaq pachapi kaq templopi Diospa tiyananmanta huk kaqnin sinchita qaparimurqa: —Rurasqañam —nispa.

¹⁸ Chaymi llipyaykuna, qapariykuna hinaspa rayokuna karurqa, hatu-hatun temblormi kay pachata taspirqa, chayna temblorqa manam karqachu kay pachapi runakuna kasqanmantapunipas.

¹⁹ Hinaptinmi chay hatun llaqta kimsaman partikururqa, tuñirurqataqmi kay pachapi llaqtakunapas. Diosmi yuyarirurqa hatu-hatun Babilonia llaqtamanta vino upyachichkaq hina piñakuyninwan castigananpaq.

²⁰ Llapallan islakunam ayqerqa hinaptinmi orqokunapas chinkarurqa.

²¹ Cielomantam chayamurqa tawa chunka kilo llasaq runtu para llapa runakunapa hawanman hinaptinmi runakunañataq Diosta kamirqaku, kamirqakuqa hatu-hatun castigo runtu para kacharimusqanmantam.