Apocalipsis 15 - Quechua Ayacucho Bible 1987

Angelkunamantawan qanchis qepa kaq castigokunamanta

¹ Hanaq pachapim huktawan rikurqani ancha admirakuypaq kaqta: Qanchis angelkunam kachkasqa qanchis qepa kaq castigoyoqkama, chay castigokunawanmi tukururqa Diospa piñakuynin.

² Rikurqanitaqmi ninawan chaqrusqa cristal kaqlla lamar qochatapas. Rikurqanitaqmi Manchakuypaq Animaltawan imagennintapas chaynataq marcantawan sutinpa numeron venceqkunatapas, paykunaqa sayachkasqa chay cristal kaqlla lamar qochapa patanpim Diospa qosqan arpantinkama.

³ Paykunam takirqaku Diosta serviq Moisespa takintawan *f**Carneropa takinta: Tukuy atipayniyoq Señor Diosnillayku, hatu-hatun admirakuypaqmi tukuy rurasqaykikunaqa. Nacionkuna munaychakuq Reynillayku, allinpunim hinaspa cheqappunim ñannikikunaqa.

⁴ Señorllayku ¿pitaq qamtaqa mana manchakusunkimanchu? ¿Pitaq qamtaqa mana alabasunkimanchu? Qamllapunim chuyaqa kanki, llapallan nacionkuna hamuspam adorasunki. Allin rurasqaykikunatam qawaykachikunki.

⁵ Chaymantam kicharikuqta rikururqani hanaq pachapi kaq templota otaq chunkantin kamachikuykuna waqaychana karpata.

⁶ Chay templomantam lloqsiramurqa qanchis angelkuna qanchis castigoyoqkama, paykunaqa kasqa linomanta sumaq kancharichkaq pachayoqmi hinaspa qorimanta chumpiwan qasqonkupas watasqakamam.

⁷ Tawan animalkunapa hukninmi qanchis angelkunaman qoykarirqa qorimanta tazonta, chay tazonkunaqa kasqa wiña-wiñaypaq kawsaq Diospa piñakuyninwan huntasqam.

⁸ Hinaptinmi temploman huntarirqa qosniy, chayqa karqa Diospa achkiriyninmanta hinaspa atiyninmanta lloqsimuqmi. Chaymanqa manam pipas yaykuyta atirqachu qanchis angelkunapa apasqan qanchis castigokuna tukurunankama.