Apocalipsis 12 - Quechua Ayacucho Bible 1987

Warmimantawan Dragon sutiyoq animalmanta

¹ Hanaq pachapim rikururqani hatun señalta: Warmim pachawan hina intiwan pachasqa kachkasqa hinaspam saruchkasqa killata, umanpiñataqmi kachkasqa chunka iskayniyoq lucerokunamanta corona.

² Chay warmi wiksayakuruspanmi nanaywan qayaykachakurqa wachakunanpaq.

³ Yapatawanmi rikururqani hanaq pachapi huk señalta: *f**Dragon sutiyoq hatun puka animalmi kachkasqa qanchis umayoq, chunka waqrayoq, sapa umankunapim kachkasqa huk corona.

⁴ Chupanwan aysaspam cielomanta wischuykamurqa kay pachaman kimsa kaq parten lucerokunata. *f**Dragon sutiyoq animalñataqmi sayachkarqa wachakuywan kaq warmipa ñawpaqninpi, chaypiqa sayachkarqa naceruptillan wawachanta mikurunanpaqmi.

⁵ Chay warmim wachakururqa qari wawata. Paymi kamachinqa fierro tawnawan hina hatun atiyninwan llapallan nacionkunata. Chay wawata qechuruspam tiyananpi tiyaq Diosman aparqaku.

⁶ Warmiñataqmi Diospa alistapusqan chunniqman ayqekurqa chaypi waranqa iskay pachak soqta chunkan punchaw uywasqa kananpaq.

⁷ Chaymantam hanaq pachapi hatu-hatun guerra karurqa. Miguelmi angelninkunapiwan pelearqa dragon sutiyoq animalpa contranpi. *f**Dragonpas angelninkunapiwanmi pelearqa.

⁸ Ichaqa vencerachikuptinkum hanaq pachapiqa manaña sitio karqachu paykunapaq.

⁹ Chaynapimá chay hatun *f**dragonqa wischumusqa karqa. Payqariki diablowan hinaspa *f**Satanaswan sutichasqa ñawpaqmantaraq kaq culebram. Paymi llapallan kay pachapi runakunata engañachkan, paymá kay pachamanpas wischumusqa karqa angelninkunapiwan.

¹⁰ Chaymantam hanaq pachapi huk kaqnin qaparirqa: —Kunanmi chayaramuwanchik Diosmanta salvacion, chayaramuntaqmi Diospa atiyninpas, munaychakuyninpas chaynataq Cristopa munayninpas. Wawqe-paninchikkunapa contranpi tuta punchaw Diosman acusaq diabloqa ñam wischurachikamunña hanaq pachamanta.

¹¹ Wawqe-paninchikkunaqa vencerqaku *f**Carneropa yawarninwanmi hinaspa willakusqanku palabrawanmi, paykunaqa manamá wañuytapas manchakurqakuchu.

¹² Chaynaqa cielokuna, kusikuychikyá, kusikuychiktaqyá chaypi *f**yachaqkunapas. ¡Ay! imaynaraq kanqa kay pachapi kaqkunaqa! Diabloqa piñasqallañam uraykaramun qamkunaman, payqariki yachachkanmi pisi tiempoyoqllaña kasqanta —nispa.

¹³ *f**Dragon sutiyoq animalñataqmi kay pachaman wischusqa kasqanta qawakuykuspan qari wawa wachakuq warmita qatikacharqa.

¹⁴ Hinaptinmi warmiman qoykurqaku condorpa rapran hina iskay raprakunata, chaytaqa qoykurqaku culebrapa qayllanmanta maymi kasqan chunniqman pawarikunanpaqmi, hinaptin chaypi kimsa wata parten uywasqa kananpaq.

¹⁵ Culebrañataqmi siminmanta wischurqa mayu hina achka-achka yakuta chay warmita aparunanpaq.

¹⁶ Ichaqa allpam yanaparqa warmita, kicharikuykuspanmi millpururqa *f**Dragonpa wischusqan mayu hina yakuta.

¹⁷ Hinaptinmi Dragonqa warmipa contranpi piñakuruspan pasarqa mirayninkunapa contranpi peleaq otaq Diospa kamachikuynin kasukuqkunapa hinaspa Jesuspi iñiqkunapa contranpi peleaq.