Apocalipsis 10 - Quechua Ayacucho Bible 1987

Angelmantawan librochamanta

¹ Rikurqanitaqmi huk atiyniyoq angelta hanaq pachamanta uraykamuqta, payqa kasqa puyuwan pachasqam hinaspa umanpi chirapayoqmi. Uyanpas achkirirqa inti hinaraqmi, chakinkunañataqmi kasqa ninamanta pilarkuna hinaraq.

² Kichasqa librochata hapiykuspanmi *f**alleq chakinta churaykurqa lamar qochapa hawanman, *f**ichoq chakintañataqmi churaykurqa allpaman.

³ Leon hina qapariptinmi qanchis rayokuna toqyamurqa rimachkaq hina.

⁴ Chay qanchis rayokuna rimaramuptinmi qellqanaypaqña kachkarqani, ichaqa hanaq pachamantam yapatawan qayamuwarqa: —Qanchisnintin rayokunapa nisqantaqa amaraqyá willakuychu nitaq qellqaychu —nispa.

⁵ Lamar qochapiwan allpapi sayaq angelñataqmi cielo lawman alleq makinta hoqarirqa.

⁶ Wiña-wiñaypaq kawsaqraykum otaq cielokunapas, kay pachapas, lamar qochapas chaynataq chaykunapi kaq tukuy imapas unanchaqraykum jurarqa kaynata: —Manam unamunqañachu.

⁷ Aswanqa qanchis kaq angelpa cornetillan tocanan tiempo chayaramuptinmi Diospa pakasqa kaqninkuna cumplikunqa, chaynaqa karqa serviqnin willakuqkunaman nisqanpi hinam.

⁸ Hanaq pachamanta uyarisqay qayakuymi yapamanta nimuwarqa: —Rispaykiyá chay kicharayaq librochata chaskimuy lamar qochapiwan allpapi sayaq angelpa makinmanta —nispa.

⁹ Angelman librochata mañaq riptiymi payñataq niwarqa: —Chaskiwaspayki mikuy kay librochata, simikipim kanqa miel hina miskillaña, wiksaykipiñataqmi kanqa qatqellaña —nispa.

¹⁰ Angelpa makinmanta librochata chaskiykuspay mikuruptiymi simiypiqa karqa miel hina miskillaña, mikuruptiyñataqmi wiksaypi qatqeyarurqa.

¹¹ Hinaptinmi niwarqa: —Yapatawanmi willakunayki achkallaña runakunamanta, nacionkunamanta, tukuy rikchaq rimayniyoqkunamanta hinaspa reykunamanta —nispa.