Amós 9 - Quechua Ayacucho Bible 1987

Diospa Castigonmantaqa mana pipas lluptinanmanta

¹ Tayta Diostam rikurqani altarpa waqtanpi sayachkaqta, paymi niwarqa: Pilarpa puntanta waqtay cimientonkuna kuyurinankama. Pakipakuruspa runakunapa hawanman wichimunankama. Puchuqkunatam guerrawan wañuchisaq, lluptiyta munaspapas, ayqeyta munaspapas manam hukllapas atinqachu.

² Uku pachapiña pakakuptinkupas chaymantam horqoramusaq. Cielomanña seqaruptinkupas chaymantam uraykachimusaq.

³ Carmelo Orqopa puntanpi pakakuptinkupas maskamuspaymi hapiramusaq. Lamar qochapa ukunpiña pakakuwaptinkupas kachuramunanpaqmi culebrata kachaykusaq.

⁴ Enemigonkupa preso apasqan kaptinkupas guerrata chayachispaymi paykunata wañurachisaq. Castiganaypaqmi paykunamanta yuyarisaq. Mana favorecenaypaqmi yuyarisaq.

⁵ Llapallan Kamachiq Señor Dios llapchaykuptinmi kay pachapas kuyurinqa. Chaypi *f**yachaq llapallan runakunam waqanqa. Imaynam Nilo Mayu masyakunraq-menosyanraq chaynam allpapas hoqarikunraq-kutiykunraq.

⁶ Tayta Diosmi *f**yachananta hanaq pachapi unancharqa. Cielokunawanmi kay pachata taparqa. Lamar qochata puyuyachispanmi allpaman parachimun. Payqa Llapallan Kamachiqwan sutichasqam.

⁷ Tayta Diosmi kaynata nin: Israelpa mirayninkunaqa Cus nacion runakunawan iguallam kankichik. Egipto nacionmantam pusamurqaykichik. Creta islamantapas Filistea runakunatam pusamurqani. Kir lawmantañataqmi Aram castakunata pusamurqani.

⁸ Huchapi kawsaq runakunapa gobiernonta qawaspanmi Tayta Dios nin: Kay pachamantam chinkarachisaq chay gobiernotaqa. Manam pasaypaqtachu chinkarachisaq Jacobpa castankunataqa. Chaynatam ñoqa Tayta Dios nini.

⁹ Trigota harneropi suysuptinkum mana pasanchu chullachallapas, chaynam huklaw nacionkunapi taqruchisaq Israelpa castankunatapas.

¹⁰ Runaykunamanta llapallan huchallikuqkunam guerrapi wañunqaku. “Manam imapas pasawasunchikchu” niqkunam guerrapi wañunqaku. “Manam ima castigopas chayamuwasunchu” niqkunam guerrapi wañunqaku.

Israel nacion huk kutitawan hatarichisqa kananmanta

¹¹ —Davidpa hatun gobiernonqa kachkan tuñichisqa wasi hinam, chaytam huktawan hatarichisaq chay tiempopi. Perqapi uchkukunata hinam allichasaq, ñawpaq tiempopi kasqanman hinam rurasaq.

¹² Chaynapim Israelpa mirayninkunaqa Edom casta runakunapa puchuq allpantaña dueñochakunqa, dueñochakunqataqmi ñoqapa kaq llapallan nacionkunatapas. Ñoqa Diosmi rimarqani, rimasqaytaqa cumplisaqpunim.

¹³ Hamuchkanmi tiempo trigotapas manaraq cosechayta tukuchkaptinku chakrakuna yapunaña kananpaq. Uvastapas manaraq saruyta tukuchkaptinku trigo tarpuyña kananpaq. Moqokunapi hinaspa waqtakunapim vinopas achkallaña kaspan mayu hinaña puririnqa.

¹⁴ Chaynaqa Israel runaykunatam preso pusasqa kasqankumanta kutichimusaq. Tuñichisqa llaqtankuta hatarichispankum chaypi *f**yachanqaku. Uvas huertakunata ruraspankum vinotapas tomanqaku. Huertakunapi plantaspankum rurunkunata mikunqaku.

¹⁵ Allpankupim paykunataqa kawsachisaq. Qosqay allpamantaqa manañam horqosqachu kanqaku. Chaynatam ñoqa Tayta Dios nini.