Amós 8 - Quechua Ayacucho Bible 1987

Canastapi poqosqa fruta qawasqanmanta

¹ Señor Dios qawachiwaptinmi rikurqani huk canastapi poqosqa frutakunata.

² Paymi tapuwarqa: —Amos ¿imatataq qawachkanki? —nispa. Chaymi ñoqañataq nirqani: —Huk canastapi poqosqa frutakunatam —nispa. Hinaptinmi Tayta Dios niwarqa: —Israel runaykunaqa castiganaypaqmi listoña kachkan. Huchankumantaqa manam pampachasaqñachu.

³ Chay punchawpiqa palaciokunapipas manam takinqakuñachu aswanqa qaparispam waqanqaku. Achka runakunam wañunqaku. Ayakunatam wischunqaku tukuy hinastinpi, chaynaqa upallallayá kaychik. Chaynatam Tayta Dios nin.

Israel nacion juzgasqa kananpaq tiempon hichpamusqanmanta

⁴ —Wakchakunata llapallan sarukuykuqkuna, nacionnikichikpi wakchakunata tukuruqkuna, kaytayá llapallaykichik uyariychik:

⁵ Qamkunam ninkichik: “Amalaya pasarunmanña llullu killa punchawpi Dios adorana tiempo chaynapi trigonchikta rantikunanchikpaq. Amalaya samana punchaw pasarunmanña precionta wicharirachispa kawsayninchikta *f**rantikunanchikpaq hinaspa mana cabal pisaq balanzawanpas engañananchikpaq” nispa.

⁶ Ninkichiktaqmi: “Wakchakunataqa aswanraqyá wakchayachisunchik sirvienteña kanankukama. Chaynatayá rurasun *f**usutallanmanta debewaptinchikpas. *f**Rantikusunmi trigopa tamollantañapas” nispa.

⁷ Jacobpa yupaychasqan Tayta Diosmi kikinrayku juraspan nirqa: Paykunapa mana allin rurasqankunataqa manam haykapipas qonqasaqchu.

⁸ Tukuy kaykunata rurasqankuraykum allpapas kuyurinqa. Chaypi *f**yachaq llapallan runakunam waqanqa. Imaynam Nilo Mayu masyakunraq-menosyanraq, chaynam allpapas hoqarikunqaraq-kutiykunqaraq.

⁹ Yapamantam Señor Dios nin: Chay punchawpim doce horapi intita wañurachisaq. Punchawraq kachkaptinmi kay pachata tutayarachisaq.

¹⁰ Fiestaykichikkunatam tikrarusaq wañuqkunamanta waqayman. Takikichikkunatam tikrarusaq aya takiman. Llapallaykichiktam lutochisqaykichik. Llakimantam chukchaykichikta chutakunkichik. Mamanmi waqan sapallan wawan wañukuptin. Chaynatam waqaykachisqaykichik. Llakipa hapisqallanñam kankichik.

¹¹ Señor Diosmi nin: Hamuchkanmi tiempokuna, chay punchawkunapim kay pachapi *f**yachaqkunaman yarqayta apachimusaq. Chayna yarqayqa kanqa manam mikuymanta yarqachikuychu. Yakunayayqa kanqa manam yakumanta yakunayaychu aswanqa nisqaykuna uyariymantam.

¹² Runakunam purinqaku llutanpi. Lamar qocha patan-patanmi qellqayta maskanqaku. Norte lawmanta intipa qespimunankamam maskanqaku, chaywanpas manam tarinqakuchu.

¹³ Sumaq doncellakunam, allin sayaq mozokunam yakumanta chay punchaw desmayanqaku.

¹⁴ Samaria llaqtapi taytacha-mamachakunarayku juraqkuna, Dan llaqtapi runakuna, Beerseba llaqtapi runakuna, taytacha-mamachakunaraykum jurankichik. Manaña hatarinaykichikkamam urmarunkichik.