Amós 5 - Quechua Ayacucho Bible 1987

Diospa qayakuyninmanta

¹ Israel castakuna, uyariychik. Aya taki takipusqaytayá uyariychik.

² Israel nacionqa sumaq doncella hinam. Wichiykusqanraykum manaña haykapipas hatarinqañachu. Wichiykuptinmi manaña hatarichiqnin kanchu.

³ Israel castankuna, Señor Diosninchikmi nin: Waranqa soldadokunata huk llaqta guerraman kachaptinqa kawsaqkunam kutimunqa pachakllaña. Pachak soldadokunata huk llaqta guerraman kachaptinqa kawsaqkunam kutimunqa chunkallaña.

⁴ Israel castakunatam Tayta Dios nin: Ñoqaman hamuspaqa kawsankichikmi.

⁵ Betel llaqtapi taytachamanqa amayá riychikchu. Gilgal llaqtapi taytachamanqa amayá yaykuychikchu. Beerseba llaqtapi taytachamanqa amayá pasaychikchu. Betel llaqtaqariki purmachisqam kanqa.

⁶ Kawsanaykichikpaqyá hamuychik Tayta Diosman. Mana chayqa paymi kachaykamunqa ninata Israel nacionman. Betel llaqtapim mana pipapas wañuchiy atinan kanman.

⁷ ¡Ay, imaynaraq kankichik! Qamkunam allin arreglayta mana allinman tikrarunkichik. Allin kasukuytam yanqacharunkichik.

^8-9 Suchuwan sutichasqa lucerokunata unanchaq Tayta Diosmi, Yutuwan sutichasqa lucerokunata unanchaq Tayta Diosmi manchakuypaq tutayayta achikyarachin. Punchawtam ancha-anchata tutayarachin. Lamar qochata puyuyarachispanmi allpaman parachin. Amparakuna wasikunatam tuñirachin. Allin murallakunatam purmarachin.

¹⁰ ¡Ay, imaynaraq kankichik! Wakchakuna defiendeytam cheqninkichik. Cheqap testigokunatam wischupakunkichik.

¹¹ Chakra runakunata cargochaspam trigonpi cobrakunkichik. Labrasqa rumikunawanmi wasita rurarunkichik. Ichaqa chaypiqa manam yachankichikchu. Uvas plantakunatam tarupunkichik ichaqa chaypa rurunmanta kaq vinotaqa manam mallinkichikchu.

¹² Mana kasukusqaykichikkunatam yachani. Tukuy rikchaq huchaykichikkunatam qawani. Allin runakunapa contranpim sayarinkichik. Juzgadopi wakchakuna pierdenankupaqmi qollqeta chaskinkichik.

¹³ Chayraykum allin yachayniyoq runaqa upallakun. Chay tiempoqa mana allin kasqanraykum upallakun.

¹⁴ Allin kaqtayá qamkunaqa ruraychik. Kawsanaykichikpaqa amayá mana allintachu ruraychik. Chaynata ruraptikichikqa: “Llapallan Kamachiq Tayta Diosmi ñoqaykuwan kachkan” nispa nisqaykichikpas cheqapmi kanqa.

¹⁵ ¡Allin rurayta kuyaychik, mana allin rurayta cheqniychik! Juzgadopiqa allintayá arreglaychik. Ichapas Llapallan Kamachiq Tayta Diosqa kuyapayarikunman. Israel castakunapa puchuqninmanta kuyapayarikunman.

¹⁶ Llapallan Kamachiq Señor Diosmi nin: Tukuy plazakunapim waqanqaku. Tukuy callekunapim “Ay, ay” ninqaku. Chakra runakunatam wañuqmanta waqanankupaq qayamunqaku. Aya taki takiqkunatam pusamunqaku.

¹⁷ Castiganaypaq hamuptiymi llapallan uvas huertakunapi waqallanqaku. Chaynatam Tayta Dios nin.

¹⁸ ¡Ay, imaynaraq kankichik Tayta Diospa punchawnin chayamunanta munaqkuna! Manam yachankichikchu imaynam chay punchaw kanantaqa. Chay punchawkunaqa tutayanqam, manam achkiychu kanqa.

¹⁹ Leonmanta ayqeq runam ukumariwan tuparun. Wasinman yaykuqtapas perqaman tawnapakuykuptinmi culebra kachurun. Chaynapunim qamkunatapas pasasunkichik.

²⁰ Tayta Diospa punchawninqa tutayanqam, manam achkiychu kanqa. Yana manka hina tutam kanqa. Manam imaniraqllatapas achkinqachu.

²¹ Cheqnispam despreciowan qawani adorawanaykichikpaq fiestaykichikta. Manam munanichu sutiypi hatun huñunakuykuna rurasqaykichikta.

²² Manam munanichu animalkunata wañuchispa kañapuwasqaykichikta. Manam munanichu kawsaykunamanta ofrendakuna qowasqaykichikta. Ñoqawan allinlla kasqaykichikmanta wira animalkuna wañuchipuwasqaykichiktaqa manam rikuytapas atinichu.

²³ Qamkunaqa amañayá takiychikchu. Arpaykichikpas amañayá waqachunchu. Manañam uyariyta munaniñachu.

²⁴ Allin arreglokuna rurasqaykichikqa sumaq kallpachkaq mayu hinayá kachun. Allin rurasqaykichikpas mana chakiq mayu hinayá kachun.

²⁵ Israel castakuna, chunniqpi tawa chunka wata kaspaykichikqa animalkunatam mana kañapuwarqankichikchu. Kawsaymanta ofrendatam mana ofrecewarqankichikchu.

²⁶ Kunanqariki Sicut sutiyoq taytachaykichikta hinaspa Quiyun sutiyoq taytachaykichikta aparikuspach purinkichik. Chay taytachakunataqa qamkunam rurakurqankichik.

²⁷ Chayraykum presota pusachisqaykichik Aram nacionpa waklawninmanraq. Chaynatam Tayta Dios nin. Payqa Llapallan Kamachiqwan sutichasqam.