Amós 1 - Quechua Ayacucho Bible 1987

Nacionkunata Tayta Dios juzgananmanta

¹ Uziasmi karqa Juda nacionpa reynin, Joaspa churin Jeroboamñataqmi karqa Israel nacionpa reynin, paykunapa gobiernasqan punchawkunapim iskay wataraq temblorpaq faltachkaptin Israel naciontaqa imam pasananmanta Amos willakurqa, payqa karqa Tecoa lawpi michiqkunapa hukninmi. Tayta Diospa revelasqantamá kaynata nirqa:

² Sion Moqomantam, Jerusalen llaqtamantam rayo toqyachkaq hina Tayta Dios qaparimunqa. Pampapi pastokunapas qawirunqam. Carmelo Orqopas chakirunqam.

³ Tayta Diosmi kaynata nin: Damasco llaqtapi *f**yachaqkunatam achka-achka huchanmanta castigasaqpuni, Galaad lawpi yachaqkunatam ñakarichirqaku. Fierro waqtanakunawanmi trillarqaku.

⁴ Ñoqapunim Rey Hazaelpa wasinta kañaykusaq, Rey Ben-hadadpa palacionkamam ruparachisaq.

⁵ Damasco zaguanpa trancantam pakiparusaq. Bicat-aven Qechwapi reytam wañurachisaq. Bet-edenpi kamachikuqkunatam chinkarachisaq. Kir runakunawanmi Aram nacionpi *f**yachaqkunata presochasqata pusachisaq.

⁶ Tayta Diosmi kaynata nin: Gaza llaqtapi *f**yachaqkunatam achka-achka huchanmanta castigasaqpuni. Llaqtantin runakunatam presota pusarqaku. Edom nacionpi kaqkunamanmi qoykurqaku.

⁷ Gaza llaqtapa murallankunatam kañaykusaq. Reypa palaciontam ruparachisaq.

⁸ Asdod llaqtapa reynintam wañurachisaq. Ascalonpi kamachikuqkunatam chinkarachisaq. Lliw atiyniywanmi Ecron llaqtata castigasaq. Filistea nacionpi puchuqkunatam wañurachisaq. Chaynatam Tayta Dios nin.

⁹ Tayta Diosmi kaynata nin: Tiro llaqtapi *f**yachaqkunatam achka-achka huchanmanta castigasaqpuni. Edom nacionniyoq runakunapa makinmanmi llaqtantin runakunata qoykurqaku. Amistadninkunawan juramentasqankutam qonqarurqaku.

¹⁰ Chaymi Tiro llaqtapa murallankunata kañaykusaq, Ñoqam chaypi palaciokunatapas ruparachisaq.

¹¹ Tayta Diosmi kaynata nin: Edom nacionpi *f**yachaqkunatam achka-achka huchanmanta castigasaqpuni. Espada makintinmi mana kuyapayarikuspa Israel ayllunkuta qatikacharqaku. Piña-piñallañam munasqankuta rurarunku. Cheqnikuyninkupas mana tukuriqmi karqaku.

¹² Chaymi Teman llaqtata kañaykusaq. Bosra llaqtapi palaciokunatam ruparachisaq.

¹³ Tayta Diosmi kaynata nin: Amonpa mirayninkunatam achka-achka huchanmanta castigasaqpuni. Galaad lawpi allpankutam hapikuykurqaku. Chaypaqmi wiksayoq warmikunapa wiksallantapas tallirurqaku.

¹⁴ Raba llaqtapa murallankunatam kañaykusaq. Reypa palacionkunatam ruparachisaq. Guerrapi peleaqkuna qaparichkaptinmi rupanqa. Cornetillakunata tocachkaptinkum rupanqa.

¹⁵ Reynintam presochasqata pusanqaku. Kamachikuqkunapas presotaqmi rinqaku. Chaynatam Tayta Dios nin.