Abdías 1 - Quechua Ayacucho Bible 1987

Edom nacion penqaypi kasqanmanta

¹ Kay willakuytaqa Edom nacionpaqmi Abdias revelacionninpi Señor Diosmanta chaskirqa: Tayta Diosmi nacionkunaman kachachkan willakuqta. Uyarirqanikum paypa kayna nisqanta: Qamkunaqa chay nacionpa contranpiyá hatariychik. Paykunapa contranpiyá guerrawan hatarisunchik.

² Edom naciontam Tayta Dios nin kaynata: Wakin nacionkunamantapas taksachallatañam qamtaqa rurarusqayki. Wakin nacionkunamantapas mana allin ñawiwan qawanatañam rurarusqayki.

³ Hatunchakuq kaynikim engañarusunki. Qaqakunapa raqrankunapim *f**yachanki. Sonqoykipipas kaynataraqmi ninki: “¿Pitaq kaymantaqa uraykachiwanman?” nispayki.

⁴ Anka hinaña altoman hoqarikuptikipas, lucerokunapiña *f**yachanaykita churaptikipas chaymantam ñoqaqa uraykachimusqayki. Chaynatam ñoqa Tayta Dios nini.

⁵ Suwakuqkuna qanman hamususpaykiqa, salteaqkuna tutan hamususpaykiqa ¿manachum kamaqllata suwakurunmanku? Uvas pallaqkuna yaykumususpaykiqa ¿manachum maskapakuqkunapaq puchuykachinmanku? Pasaypaqtam wakchayarachisunki enemigoykikunaqa.

⁶ Maynatam Esaupa mirayninkunataqa suwarusunkichik. Pakasqa alhajaykichikkunatam suwarusunkichik.

⁷ Llapallan contrato ruraqmasikichikkunapas qarqorusunkichikmi nacionnikichikmantapas. Engañarusunkichikmi amistadnikichikkunapas. Qamkunapa contraykichikpi sayariruspam paykunaqa vencerusunkichikpas. Mikuqmasikichikkunallam wichiykachisunkichik toqlla churasqankumanpas. “Mana entiendeqmi paykunaqa” nisparaqmi-nisunkichikpas.

⁸ Ñoqa Tayta Diosmi nini kaynata: Edom castakuna castiganay punchawpiqa yachayniyoq runankunatapas chinkarachisaqmi. Esau castakunapa *f**yachanan orqokunapi entiendeq runakunatapas chinkarachisaqmi.

⁹ Teman llaqtapi valeroso soldadokunapas manchakuymantam katkatatanqaku. Esau castakunapa *f**yachanan orqokunapiqa sapakamam wañuchisqa kanqaku.

Edom castakunapa huchanmanta

¹⁰ Aylluykichik Jacobpa mirayninkunatam ñakarichirqankichik, chayraykum qamkunaqa penqayllapi kankichik.

¹¹ Enemigokuna Jerusalenpa kapuqninkunata suwakuptinkum qamkunaqa qawaylla-qawakurqankichik. Huklaw nacionniyoqkuna llaqtapa zaguanninta yaykuptinmi qamkunaqa qawaylla-qawakurqankichik. Suwakuspa suerteaptinkum qamkunapas paykuna hinaraq karqankichik.

¹² Aylluykichikpa mirayninkunapa ñakarisqan punchawpiqa amamiki qawayllaqa-qawakuwaqchikchu karqa. Juda castakunapa purmasqan punchawpiqa amamiki kusipayawaqchikchu karqa. Paykunapa sasachakuynin punchawpiqa amamiki alabakuwaqchikchu karqa.

¹³ Runaykunapa llaqtanpa punkuntaqa amamiki yaykuwaqchikchu karqa ñakarisqanku punchawpiqa. Castigasqa kasqanmantaqa amamiki penqawaqchikchu karqa ñakarisqanku punchawpiqa. Runaykunapa imapas kapuqninkunataqa amamiki llapchawaqchikchu karqa ñakarisqanku punchawpiqa.

¹⁴ Ñankunapa pallqaqninkunapi suyaspaqa amamiki ayqeqkunataqa wañuchiwaqchikchu karqa. Chay sasachakusqanku punchawpiqa amamiki puchuqkunataqa qoykuwaqchikchu karqa.

Nacionkuna castigasqa kananmanta

¹⁵ Ñam hichpaykamuchkanña lliw nacionkunata ñoqa Tayta Diospa castiganay punchawqa. Imaynam rurasqaykichikman hinam qamkunawanpas rurasqa kanqa. Imam rurasqaykichikman hinam qamkunamanpas pagasqa kanqa.

¹⁶ Sapaqchakusqay moqopim tomachkaq hina kusikurqankichik qamkunaqa. Tomachkaq hinataqmi lliw nacionkunaqa sapa kutilla ñakarinqaku. Paykunaqa millpuypaq-millpuspam pasaypaqtaña chinkarunqaku.

Israel nacion hatunchasqa kasqanmanta

¹⁷ Sion Moqom ichaqa ñoqallapaña sapaqchasqa kanqa. Chayman ayqekuspam wakinkunaqa salvasqa kanqa. Jacob castakunaqa huktawanmi chakrankuta dueñochakunqa.

¹⁸ Jacob casta runakunaqa nina hinañam rikurirunqaku. Josey casta runakunaqa lenguachkaq ninamanñam rikchakunqaku. Esau casta runakunaqa qopa hinañam rikurirunqaku. Rupachisqam kanqaku paykunaqa. Chinkachisqam kanqaku paykunaqa. Manañam pipas puchunqachu Esaupa castankunamantaqa. Ñoqa Tayta Diosmi nini chaynata.

¹⁹ Neguev lawpi *f**yachaqkunapas Esau orqokunatam dueñochakuykunqaku. Waqtakunapi yachaqkunapas Filistea runakunapa yachanantam dueñochakuykunqaku. Paykunaqa dueñochakuykunqakutaqmi Efrain castakunapa chakrankunatapas. Paykunaqa dueñochakuykunqakutaqmi Samaria lawpi chakrakunatapas. Benjamin castakunaqa dueñochakunqakutaqmi Galaad lawpi chakrakunatapas.

²⁰ Israelpa mirayninkunamanta preso pusasqakunapas dueñochakuykunqakum Canaan allpakunata. Sarepta llaqtakamam paykunaqa dueñochakunqa. Jerusalenmanta Safaradman preso pusasqakunapas Neguev lawpi llaqtakunatam dueñochakuykunqa.

²¹ Sion Moqomanmi seqanqaku libraq runakunaqa. Esau orqokunapim gobiernanqaku paykunaqa. Paykunapiqa Tayta Diosmi munaychakunqa.