2~Samuel 9 - Quechua Ayacucho Bible 1987

Mefiboset sutiyoq runata David favorecesqanmanta

¹ Davidmi nirqa: —¿Saulpa castanmanta pillapas puchurqachu payta Jonatanrayku favorecenaypaq? —nispa.

² Saulpa familianpam karqa sirvienten Siba sutiyoq. Paytam Davidpa kasqanman qayachimurqaku. Siba hamuruptinmi rey tapurqa: —¿Qamchu Siba kanki? —nispa. Chaymi Sibañataq nirqa: —Arí, ñoqam kani —nispa.

³ Hinaptinmi rey tapurqa: —¿Saulpa castanmanta kachkanraqchu pipas Diosrayku favorecenaypaq? —nispa. Chaymi Siba nirqa: —Kachkanraqmi Jonatanpa churin, payqa iskay chakin suchuyasqam kallan —nispa.

⁴ Chaymi rey tapurqa: —¿Payqa maypitaq kachkan? —nispa. Hinaptinmi Sibañataq nirqa: —Payqa Amielpa churin Maquirpa wasinpim kachkan Lodebar llaqtapi —nispa.

⁵ Hinaptinmi Rey David payta pusachimurqa Lodebar llaqtapi *f**yachaq Amielpa churin Maquirpa wasinmanta.

⁶ Saulpa willkan otaq Jonatanpa churin Mefi-bosetmi Davidpa kasqanman chayaramuspan paypa qayllanpi qonqoranpa pampaman kumuykurqa. Chaymi Davidñataq nirqa: —¡Mefi-boset! —nispa. Chaymi payñataq nirqa: —Ñoqam kani —nispa.

⁷ Hinaptinmi Davidñataq nirqa: —Ama manchakuychu. Ñoqam taytayki Jonatanrayku qamta favorecespa abueloyki Saulpa llapallan allpanta kutichipusqayki, qamñataqmi tukuy tiempo ñoqawan kuska mikunki —nispa.

⁸ Mefi-bosetmi kumuykuspa nirqa: —¿Pitaq ñoqaqa kallani? ¿Manachu ñoqaqa kani wañusqa allqo hina mana valeq? —nispa.

⁹ Saulpa ñawpaq sirvienten Sibata rey qayachimuspanmi nirqa: —Saulpa chaynataq llapallan castankunapa kapuqninkunatam lliwta qoykuni patronniki Saulpa willkan Mefi-bosetman.

¹⁰ Qanmi llamkapunki chakrankunata churikikunawan hinaspa sirvientekikunawan, cosechankichikmá patronnikipa familiankuna mantienekunanpaq. Patronnikipa willkan Mefi-bosetmi ichaqa mikunqa ñoqawan kuska tukuy tiempo —nispa. Sibapa churinkunam karqa chunka pichqayoq, sirvientenkunañataqmi karqa iskay chunka.

¹¹ Sibam reyta nirqa: —Qam Señor Reypa tukuy kamachiwasqaykita hinam ñoqaqa rurasaq —nispa. Mefi-bosetmi reypa churin hina reywan kuska mikurqa.

¹² Mefi-bosetpam huk taksa churin karqa Micaia sutiyoq. Sibapa wasinpi llapallan *f**yachaqkunam Mefi-bosetpa sirvienten karqaku.

¹³ Mefi-bosetmi ichaqa yacharqa Jerusalen llaqtapi reywan kuska mikusqanrayku. Payqariki karqa iskaynin chakin suchuyasqam.