2~Samuel 4 - Quechua Ayacucho Bible 1987

Is-boset sutiyoq reyta wañuchisqankumanta

¹ Hebron llaqtapi Abnerpa wañurusqanmanta Saulpa churin Is-boset yacharuspanmi pasaypaqta hukmanyarurqa, mancharikurqakutaqmi Israel casta llapallan runakunapas.

² Saulpa churin Is-bosetpam karqa iskay runankuna, paykunaqa karqa salteaq runakunapa kamachiqninmi. Hukninpa sutinmi karqa Baana hukninpañataq Recab. Iskayninkum karqaku Benjamin ayllumanta kaq runakuna, paykunaqa karqa Beerot llaqtayoq Rimonpa churinkunam. Beerot llaqtaqa karqa Benjamin ayllu runakunapam.

³ Benjamin ayllu runakunapamá karqa Beerot llaqtayoq runakuna Gitaim llaqtaman lluptikuchkaptinkupas. Beerot llaqtayoqkunaqa chay Gitaim llaqtapimá *f**yacharqaku forastero hina kay libro qellqasqa kasqan tiempokama.

⁴ Saulpa churinmi karqa Jonatan, Jonatanpa churinñataqmi karqa Mefi-boset. Mefi-boset pichqa watayoqllaraq kachkaptinmi Saulpa hinaspa Jonatanpa wañukusqanku noticia Jezreel llaqtamanta chayaramurqa. Chay wawata uywaq warmi hoqariykuspa lluptichichkaptinmi warma wichiykurqa, chayraykum wistuña karqa.

⁵ Beerot llaqtayoq Rimonpa iskay churin Recabwan Baanam rirqaku Is-bosetpa wasinman hinaspam chayarurqaku chawpi punchaw rupaypi, Is-bosetñataqmi puñuchkarqa.

⁶ Wasipi tiyaq warmipas trigo akllasqanpi puñuruptinmi Recabwan wawqen Baana yaykururqaku wasiman.

⁷ Is-bosetñataqmi caman hawanpi puñukuchkasqa. Chaymi wañurachispa umanta kuchururqaku, tukuy tuta Araba sutiyoq qechwanta apaspankum

⁸ Davidman Hebron llaqtapi qoykurqaku. Paytam nirqaku: —Reyllayku, kayqaya wañuchiy munasuqniki enemigoyki Saulpa churin Is-bosetpa umanqa. Kunanmi qanmanta Tayta Dios vengakurun Saultawan mirayninkunata —nispa.

⁹ Chaymi Beerot llaqtayoq Rimonpa churin Recabtawan wawqen Baanata David nirqa: —Tukuy sasachakuymanta libraqniy kawsaq Tayta Diosraykum jurani:

¹⁰ Huk runam allin willakuy apamuwasqanta creespan Saulpa wañusqanmanta willawarqa chaymi chay willawasqanmanta merecesqanta qospay Siclag llaqtapi wañurachirqani.

¹¹ Qamkunaqa mana allin ruraqkuna kasqaykichikraykum wasinta yaykuspa allin ruraq runata camanpi wañurachimurqankichik. Chaynaqa ¿manachum vengakusqaykichik? ¿manachum kay pachamantapas chinkarachisqaykichik? —nispa.

¹² Chaypunilla runankunata David kamachiptinmi chay iskaynin runakunata wañurachirqaku. Makinkunatawan chakinkunata kuchuruspankum Hebron llaqta estanquepa waqtanpi warkururqaku. Is-bosetpa umantañataqmi pamparurqaku Hebron llaqtapi kaq Abnerpa sepulturanpi.