2~Samuel 3 - Quechua Ayacucho Bible 1987

¹ Saulpa castankunam unay tiempo pelearqaku Davidpa castankunawan. David aswan-aswan kallpanchakuptinmi Saulpa castankunañataq hukmanyarqaku.

Hebron llaqtapi naceq Davidpa churinkunamanta

² Hebron llaqtapi David kachkaptinmi nacerqa churinkuna: Piwi churinmi karqa Amnon. Paymi karqa Jezreel llaqtayoq Ahinoampa wawan.

³ Amnonpa sullkanmi karqa Quileab. Paymi karqa Carmel llaqtayoq Nabalpa viudan Abigailpa wawan. Quileabpa sullkanmi karqa Absalon. Paymi karqa Gesur nacion rey Talmaipa churin Maacapa wawan.

⁴ Absalonpa sullkanmi karqa Adonias. Paymi karqa Haguitpa wawan. Adoniaspa sullkanmi karqa Sefatias. Paymi karqa Abitalpa wawan.

⁵ Sefatiaspa sullkanmi karqa Itream. Paymi karqa Davidpa huknin warmin Eglapa wawan. Chay churinkunaqa nacerqa Hebron llaqtapi David kachkaptinraqmi.

Davidwan Abner contrato rurasqanmanta

⁶ Saulpa castankunawan Davidpa castankuna guerrapi kachkaptinkum Abner aswan-aswan reqsisqa rikurirurqa Saulpa castankunapi.

⁷ Saulpam karqa Rizpa sutiyoq compañeran. Paymi karqa Aja sutiyoq runapa churin. Chaymi Abnerta Is-boset nirqa: —¿Imanasqataq kakurqanki taytaypa compañeranwan? —nispa.

⁸ Chaymi Is-bosetpa nisqanwan Abner sinchita piñakuruspan nirqa: —¿Ñoqaqa allqochu karqani Juda castawan hukllawakunaypaq? Ñoqaqa favorecerqanim taytayki Saulpa familiankunataqa chaynataq amistadninkunatapas. Manataqmi qamtapas Davidpa makinmanchu qoykurqayki. ¿Hinaptinchu kunanñataq kay warmiwan huchallikusqaypaq tumpawanki?

⁹ Diosyá sinchita castigawachun Tayta Diospa jurasqanman hina Davidwan mana ruraptiyqa.

¹⁰ Saulpa castanmanta gobiernasqanta qechuspaymi Davidtaña gobiernananpaq churasaq Israel castapipas chaynataq Juda castapipas, gobiernanqaqa Dan llaqtamanta Beerseba llaqtakamam —nispa.

¹¹ Abnerta manchakusqanraykum Is-bosetqa mana imatapas contestarqachu.

¹² Abnerñataqmi runankunata kacharqa Davidman kaynata nimunankupaq: —¿Pipataq kay nacionqa? Contratotayá rurasunchik. Ñoqaqa yanapasqaykim lliw Israel nacion qampaq kananpaq —nispa.

¹³ Chaymi David nirqa: —Allinmi, qanwanqa rurasaqmi contratota ichaqa ñoqaman hamuspaykiqa Saulpa warmi churin Micaltam pusamuwanki, mana chayqa manam uyayta rikuwaqchu —nispa.

¹⁴ Davidqa Saulpa churin Is-bosetmanpas runankunatam kacharqa kaynata nimunankupaq: —Warmiy Micalta kutichipamuway. Paytaqa casaranaypaqmi rantirqani pachak Filistea runakunapa qari kayninpa qarachanwan —nispa.

¹⁵ Hinaptinmi Laispa churin Paltielmanta otaq qosanmanta Micalta qechurachimuspan Is-boset pusachirqa.

¹⁶ Qosan Paltielmi ichaqa waqastin payta qatirqa Bahurim llaqtakama. Chaypim Paltielta Abner kamachirqa: —Kutiy —nispa. Hinaptinmi Paltielqa kutikurqa.

¹⁷ Israel casta ancianokunawan Abner rimaspanmi nirqa: —Unayñam munachkankichik qamkunapa reynikichik David kananta.

¹⁸ Chaynaqa kunanyá reynikichikpaq churaychik. Tayta Diosmi Davidman prometespan nirqa: “Serviqniy Davidwanmi Filistea runakunamanta chaynataq llapallan enemigonkunamanta Israel casta runaykunata librasaq” nispa.

¹⁹ Benjamin castakunawanpas Abner rimaruspanmi rirqa Hebron llaqtaman, payqa rirqa Israel castakunapa tukuy ima tanteasqantawan Benjamin casta llapallan runakunapa tukuy ima tanteasqanta Davidman willamunanpaqmi.

²⁰ Abnermi iskay chunka runankunawan Davidpa kasqan Hebron llaqtaman chayarurqa. Davidmi convidota rurachirqa Abnerpaqwan paywan hamuqkunapaq.

²¹ Abnermi Davidta nirqa: —Reynilláy, kunanmi Israel casta llapallan runakunata qanman huñuramusaq chaynapi contratota ruranaykichikpaq, qanmi tukuy munasqaykipi gobiernanki —nispa. Abnerta David aviaruptinmi hawkalla pasakurqa.

Abnerta Joab wañuchisqanmanta

²² Davidpa tropankunam Joabpiwan chay ratopi chayaramurqaku salteamunankupaq tropa-tropa risqankumanta, paykunaqa chayamurqaku enemigonkumanta qechumusqankuta achkallataña apamustinmi. Abnerqa manañam Davidwanchu karqa Hebron llaqtapi. Abnerta David aviaruptinmi payqa pasakurqaña hawkalla.

²³ Joabmá chayaramurqa llapallan tropankunawan. Joabmanmi willaykurqaku kaynata: —Nerpa churin Abnermi reyman hamururqa, pay aviaruptinmi pasakurqa hawkalla —nispa.

²⁴ Chaymi reyman rispan Joab nirqa: —¿Imatataq kayta rurarunki? Abner qawaqniki hamuchkaptinqa ¿imanasqamá hawkallataqa kachaykurqanki?

²⁵ ¿Manachu yachanki Nerpa churin Abnerqa engañasunaykipaq hamusqanta? Payqariki hamurqa mayman risqaykitapas chaynataq imam rurasqaykitapas yachananpaqmi —nispa.

²⁶ Davidwan Joab rimasqanmanta lloqsiramuspanmi runankunata kacharqa Abnerta haypanankupaq. Davidpa mana yachasqantam Sira sutiyoq pozomantaña kutirachimurqaku.

²⁷ Abner Hebron llaqtaman kutiramuptinmi Joab pusarurqa llaqtapi zaguanpa ukulawninpi sapallankupi rimanankupaq. Chaypim Abnerta wiksanpi tuksiruspa wañurachirqa wawqen Asael wañurachisqanmanta vengakuspa.

²⁸ David yacharuspanmi nirqa: —Nerpa churin Abner wañurachisqa kasqanmantaqa ñoqapas chaynataq gobiernoypas Tayta Diospa ñawpaqninpim wiñaypaq mana huchayoq kaniku.

²⁹ Joabyá lliw castankunapiwan castigasqa kachun. Familianpipas amayá faltachunchu flujowan ñakariqpas, lepra onqoyniyoqpas, tawnallawan puriq wistupas, guerrapi wañuqpas otaq mikuymanta muchuqpas —nispa.

³⁰ Joabmá wawqen Abisaipiwan Abnerta wañurachirqaku, chaynataqa rurarqaku Gabaon lawpi peleachkaptinku wawqenku Asaelta Abner wañurachisqanraykum.

³¹ Davidmi Joabtawan paywan kaq llapallan runankunata kamachirqa: —Llikipakuychik pachaykichikta hinaspa lutokuspa waqaychik Abnerpa ayanpa ñawpaqninpi —nispa. Rey Davidmi rirqa chakanapi kaq ayapa qepanta.

³² Hebron llaqtapi Abnerta pamparuptinkum rey qaparispa waqarqa sepulturapa waqtanpi, waqarqataqmi llapallan runakunapas.

³³ Abnermanta aya takita rey takispanmi nirqa: Abner ¿imanasqataq mana yuyayniyoq hina wañurunki?

³⁴ Makikikunaqa manam chaqnasqachu karqa. Chakikikunapas manam cadenasqachu karqa. Mana allin runakunapa wañuchisqan hinam wañurunki. Llapallan runakunapas paymantam huktawan waqarqaku.

³⁵ Punchawllaraq kachkaptinmi mikuykunanpaq Davidta ruegamurqaku, Davidñataqmi juraspan nirqa: —Diosyá sinchita castigawachun tantata otaq imatapas manaraq inti seqaykuchkaptin mikuruptiyqa —nispa.

³⁶ Llapallan runakunam cuentata qokururqaku chay imam rurasqanmanta, chay rurasqanqa agradonkupaqmi karqa.

³⁷ Israel casta llapallan runakunam chay punchaw cuentata qokururqaku Nerpa churin Abner wañusqanmantaqa Rey Davidqa inocente kasqanta.

³⁸ Reymi serviqninkunata nirqa: —Yachasqaykichikpi hinapas kunanmi Israel nacionpi hatun atiyniyoq kamachikuq wañurun.

³⁹ Chaymi aceitewan tallisqa rey kachkaspaypas mana kallpayoq hina kachkani Sarviapa kay wawankuna ñoqamanta aswan atiyniyoq kasqankurayku. Tayta Diosyá pagapuchun mana allin ruraqmanqa mana allin rurasqanman hina.