2~Samuel 2 - Quechua Ayacucho Bible 1987

Juda lawpi gobiernananpaq Davidta churasqankumanta

¹ Chaykuna pasaruptinmi Tayta Diosta David tapurqa: —¿Riymanchu Juda lawpi huk kaqnin llaqtaman? —nispa. Chaymi Tayta Dios nirqa: —Riyá —nispa. Hinaptinmi David tapurqa: —¿Mayqan llaqtamantaq risaq? —nispa. Hinaptinmi Tayta Dios nirqa: —Hebron llaqtaman —nispa.

² Hinaptinmi David rirqa Hebron llaqtaman, paywantaqmi rirqaku iskaynin warminkunapas otaq Jezreel llaqtayoq warmin Ahinoampas chaynataq Carmel llaqtayoq Nabalpa viudan Abigailpas.

³ Pusarqataqmi puriqmasin runakunatapas familiantinta, paykunam *f**yacharqaku Hebron law llaqtakunapi.

⁴ Chaymi Juda casta runakuna hamuruspanku Davidta aceitewan tallirqaku Juda lawpi gobiernananpaq. Davidmanmi willaykurqaku Galaad lawpi Jabes llaqtayoqkuna Saul pampaykusqankumanta.

⁵ Chaymi runankunata David kacharqa Galaad law Jabes llaqtapi kaqkunaman kaynata nimunankupaq: —Tayta Diospa bendecisqanmi qamkunaqa kankichik reyninchik Saulta kuyapayarispa pampaykusqaykichikmanta.

⁶ Kunanyá Tayta Dios cheqaptapuni kuyapayarisunkichik. Ñoqapas kay rurasqaykichikmantam allinta rurasqaykichik.

⁷ Kallpanchakuspayá qarinchakuychik Saul wañuruchkaptinpas Juda casta runakunam aceitewan talliwarqaku gobiernanaypaq —nispa.

Israel nacionpi kikinkupura peleasqankumanta

⁸ Saulpa llapallan tropankunapa kamachiqninmi otaq Nerpa churin Abnermi Saulpa churin Isboset sutiyoq runata pusarqa Mahanaim llaqtaman.

⁹ Paytam Galaad lawpi, Aser casta runakunapa *f**yachanan lawpi, Jezreel lawpi, Efrain casta runakunapa yachanan lawpi, Benjamin casta runakunapa yachanan lawpi hinaspa lliw Israel nacionpi gobiernananpaq churarqa.

¹⁰ Tawa chunka watanpim Saulpa churin Isbosetqa Israel nacionpi gobiernayta qallaykurqa, chaypim iskay wata gobiernarqa. Juda casta runakunam ichaqa Davidta reyninkupaq chaskirqa.

¹¹ Qanchis wata soqta killanmi Juda castakunapi David gobiernarqa Hebron llaqtapi.

¹² Nerpa churin Abnerñataqmi Mahanaim llaqtamanta Gabaon llaqtaman lloqsirqa Saulpa churin Is-bosetpa tropankunawan.

¹³ Sarviapa wawan Joabmi Davidpa tropankunapiwan Hebron llaqtamanta lloqsirqaku hinaspam Gabaon estanquepa waqtanpi paykunawan tupanakurqaku. Abnerpa tropankunam karqa estanquepa waklawninpi, Joabpa tropankunañataqmi karqa estanquepa kaylawninpi.

¹⁴ Chaymi Joabta Abner nirqa: —Mozo soldadonchikkuna lloqsispankuyá peleachunku llapallanchikpa qayllanchikpi —nispa. Chaymi Joabñataq nirqa: —Allinmi —nispa.

¹⁵ Hinaptinmi lloqsirqaku Benjamin castamanta otaq Saulpa churin Is-bosetpa partenmanta chunka iskayniyoq mozokuna, Davidpa tropankunamantapas chunka iskayniyoq mozokunam lloqsirqa.

¹⁶ Chaymi peleaqmasinwan umamanta sapakama hapinakuruspa espadankuwan tuksinakururqaku waqtankupi, chaynapim llapallanku wañururqaku. Chayraykum “Helcat-hazurim” nispa suticharqaku chay lugarta. Chay lugarqa kachkan Gabaon lawpim.

¹⁷ Chay punchawpi llumpa-llumpayta pelearuptinkum Davidpa tropankuna vencerurqa Abnertawan Israel casta tropakunata.

¹⁸ Chaypim kachkarqaku Sarviapa kimsa qari wawankuna otaq Joab, Abisai hinaspa Asael. Chay Asaelmi karqa purunpi luwichu hina kallpaq.

¹⁹ Asaelmi Abnerpa qepallanta qatirqa *f**alleqmanpas *f**ichoqmanpas mana muyurispan.

²⁰ Chaymi Abner qepanta qawarispan nirqa: —¿Manachu qamqa kanki Asael? —nispa. Hinaptinmi payñataq nirqa: —Arí, ñoqam kani —nispa.

²¹ Chaymi payta Abner nirqa: —Amaña qatiwaychu aswanqa *f**alleq lawman otaq *f**ichoq lawman muyurispa hapiy huk kaqnin mozo soldadota hinaspayki qechuy llapa imankunata —nispa. Asaelmi ichaqa hinalla qatirqa.

²² Chaymi Abnerñataq yapatawan nirqa: —Asuriy, ama qatiwaychu, yanqataq wañurachikiman, hinaspaqa ¿ima uyaywantaq wawqeki Joabmanqa rikuriyman? —nispa.

²³ Asael mana asuriyta munaptinmi lanzapa qepanwan wiksanpi Abner tuksirurqa wasanta lloqsinankama. Hinaptinmi Asaelqa wikapakuruspa hina chayllapi wañururqa. Asaelpa wañurusqanman haykam chayamuqkunam chaypi sayarurqaku.

²⁴ Joabpiwan Abisaimi ichaqa Abnerta qatirqaku hayparunankupaq. Intim seqaykururqa Gabaon law chunniqman riq ñanpi otaq Gia sutiyoq sitiopa ñawpaqninpi kaq Ama sutiyoq moqoman chayaykuchkaptinku.

²⁵ Benjaminpa mirayninkunañataqmi huñunakururqaku Abnerwan hinaspam huk tropalla churakururqaku huk kaqnin moqopa puntanpi.

²⁶ Abnermi Joabta qayaspan nirqa: —¿Tukuy tiempochu wañuchinakuyllapi kasun? ¿Manachu yachanki llumpay llakillapi kananchikta? ¿Haykapikamataq runaykikunataqa mana kamachinkichu wawqenkuta amaña qatikachanankupaq? —nispa.

²⁷ Chaymi Joabñataq nirqa: —Kawsaq Diosrayku juraspam niki, qampuni mana rimariykamuptikiqa runaykunaqa sapakamam wawqenta qatikachanmanku karqa achikyanankama —nispa.

²⁸ Joab cornetata tocaykuptinmi lliw runankuna sayarurqaku, manañam Israel castamasinkunataqa qatikacharqakuchu nitaqmi mastaqa pelearqakuñachu.

²⁹ Abnermi runankunawan rirqaku tukuy tuta Araba sutiyoq qechwanta hinaspam Jordan Mayuta chimparuspanku rirqaku Bitron lawninta Mahanaim llaqtaman chayanankukama.

³⁰ Abnerta qatikachasqanmanta Joab kutiramuspanmi llapallan tropankunata huñururqa chaymi Davidpa tropankunamanta faltarurqa Asaelwan chunka isqonniyoq soldadokuna.

³¹ Davidpa tropankunañataqmi Abnerpa tropankunata otaq Benjamin casta soldadokunata wañurachirqaku kimsa pachak soqta chunkan runakunata.

³² Asaelpa cuerponta Belen llaqtaman apaspankum chaypi pamparurqaku taytanpa sepulturanpi. Joabmi tropankunawan tukuy tuta rispan achikyarurqa Hebron llaqtapi.