2~Samuel 1 - Quechua Ayacucho Bible 1987

Saulpa wañukusqanta David yacharusqanmanta

¹ Saulpa wañukusqanpa qepantam Amalec casta runakuna vencerusqanmanta David kutimuspa iskay punchawña Siclag llaqtapi kachkarqa.

² Kimsa kaq punchawmantam Saulpa campamentonmanta huk runa hamurqa llumpay llakisqa, pachankunapas llikisqa hinaspa allpallaña umayoq. Davidpa kasqanman chayaramuspanmi qayllanpi qonqoranpa pampaman kumuykurqa.

³ Chaymi David tapurqa: —¿Maymantataq hamuchkanki? —nispa Chaymi payñataq nirqa: —Israel tropapa campamentonmantam lluptiramuni —nispa.

⁴ Hinaptinmi David tapurqa: —¿Imataq pasakun? ¡Ama hina kaspayá willaykullaway! —nispa. Hinaptinmi chay runañataq nirqa: —Peleasqankumanta soldadokuna lluptiruspam achkallaña wañurunku. Saulwan churin Jonatanpas wañurunmi —nispa.

⁵ Chay willaqnin mozotam David nirqa: —¿Imaynanpitaq yachanki Saulpas chaynataq Jonatanpas wañurusqanta? —nispa.

⁶ Chaymi payñataq nirqa: —Gilboa Moqopi kachkaspaymi qonqaymanta Saulta rikururqani lanzanpi tawnapakusqata, rikurqanitaqmi carretakunawan caballopi sillasqakunapas payta haypaykuchkaqtaña.

⁷ Qepanta qawarimuspanmi rikuramuwaspa qayamuwarqa. Chaymi noqañataq nirqani: “¿Imanantaq?” nispa.

⁸ Chaymi niwarqa: “Qamqa ¿pitaq kanki?” nispa. Hinaptinmi ñoqañataq nirqani: “Ñoqaqa kani Amelec casta runam” nispa.

⁹ Paymi niwarqa: “Ama hina kaspaykiyá asuykamuspa wañurachiwayña, herido kaspaypas kawsachkaniraqmi” nispa.

¹⁰ Chaymi asuykuspay wañurachirqani wañuy patanpiña kasqanta yachaspay. Umanpi coronatawan brazonpi brazaletetaqa qanmanmi apamurqayki.

¹¹ Davidmi llumpay llakisqa kaspan pachanta llikiparqa, hina chaynallatam rurarqa paywan kaqkunapas.

¹² Llumpayllataña waqaspankum ayunarqaku tardeykuqkama Saulpa hinaspa churin Jonatanpa wañukusqanmanta. Waqarqakutaqmi Tayta Diospa runankuna vencesqa kasqanmantapas chaynataq Israel casta runakuna guerrapi wañusqankumantapas.

¹³ Willaqnin mozotam David nirqa: —¿Maymantataq qamqa kanki? —nispa. Chaymi payñataq nirqa: —Ñoqaqa kani Amalec casta forasterom —nispa.

¹⁴ Davidmi nirqa: —¿Imanasqamá manaqa manchakurqankichu Tayta Diospa nombrasqan rey wañuchiytaqa? —nispa.

¹⁵ Chaymi huk kaqnin runata qayaykuspan David nirqa: —Anchuykuspa wañuchiy —nispa. Hinaptinmi asuykuspan wañurachirqa.

¹⁶ Wañunanpaq kachkaptinmi Davidñataq nirqa: —Wañuchisqaykimantam huchayoq kanki, qampunim nirqanki: “Tayta Diospa nombrasqan reytam wañuchirqani” nispa.

Saulmantawan Jonatanmanta David aya takita takisqanmanta

¹⁷ Saulpa hinaspa churin Jonatanpa wañukusqanmantam David kay aya takita takirqa.

¹⁸ Judapa mirayninkunaman yachachinanpaqmi “Flechana Arma” sutiyoq kay aya takita kamachikurqa. Kay aya takiqa Jazerpa libronpi qellqasqam kachkan.

¹⁹ Israel castakuna, qamkunamanta sumaq kaqmi moqokunapi wañurun. ¡Imaynamá valeroso soldadokunaqa wichirun!

²⁰ Gat llaqtapi ama willakuychikchu. Ascalon llaqtapa callenkunapi ama willakuychikchu chaynapi Filistea warmikuna ama kusikunankupaq, chaynapi Dios mana reqsiq warmikuna kusikuymanta ama pawaykachananpaq.

²¹ Gilboa Moqokuna, qampa hawaykimanqa sullapas amañayá chayamuchunchu. Gilboa Moqokuna, qampa hawaykimanqa parapas amañayá chayamuchunchu. Gilboa Moqokuna, allin wiñachiq chakrakunapas amañayá kachunchu. Chaypim valeroso soldadokunapa harkachikunanpas wischusqa karqa.

²² Jonatanpa flechankunaqa wañuqkunapa yawarninpim chapusqapuni karqa. Valeroso soldadokunapa wirankunapim chapusqapuni karqa. Saulpa espadanmi wañuqkunapa yawarninpi chapusqapuni karqa. Valeroso soldadokunapa wirankunapim chapusqapuni karqa.

²³ Saulwan Jonatanqa kuyachikuqmi karqaku. Saulwan Jonatanqa waylluchikuqmi karqaku. Kawsaspapas manam rakinakurqakuchu. Wañuspapas manam rakinakurqakuchu. Ankakunamantapas aswan pawaqmi karqaku. Leonkunamantapas aswan kallpasapam karqaku.

²⁴ Israel casta warmikuna, waqaychik Saulmanta. Waqaychik guindo pachawan pachachisuqnikichikmanta. Waqaychik kuyayllapaq pachawan pachachisuqnikichikmanta. Waqaychik qori alhajawan pachaykichik adornaqmanta.

²⁵ ¡Imaynatam valeroso soldadokuna peleopi wichirun! Chaynam yachanaykichik moqokunapi Jonatanpas wañusqa karun.

²⁶ Jonatan wawqelláy, llumpaytam qamqa llakirachiwanki. Ñoqapaqqa mayna kuyaypaqmi karqanki, warmikunapa kuyakuyninmantapas aswan mastam kuyawarqanki.

²⁷ ¡Imaynatam valeroso soldadokuna wichirun! ¡Imaynatam guerrapi peleana armakunapas tukurun!