1~Samuel 9 - Quechua Ayacucho Bible 1987

Saulwan Samuel tupasqankumanta

¹ Benjaminpa castan ukupim karqa huk valeroso qari. Paypa sutinmi karqa Cis. Cisqa karqa Abielpa churinmi, Abielñataqmi karqa Zerorpa churin, Zerorñataqmi karqa Becoratpa churin, Becoratñataqmi karqa Afiapa churin.

² Cispa churinmi karqa Saul sutiyoq buenmozo joven. Israelpa miraynin runakunapiqa manam pipas karqachu pay hina buenmozoqa. Hatunsu kasqanraykum runakunaqa Saulpa hombrollanman haypaq.

³ Huk punchawmi taytan Cispa china asnonkuna chinkarurqa chaymi payqa churin Saulta nirqa: —Huk kaqnin sirvientenchikwan riy asnokuna maskaq —nispa.

⁴ Chaymi Saul pasarqa Efrain orqokunaman, chay lawmantañataqmi pasarqa Salisa sutiyoq lawman ichaqa manam tarirqachu chay asnokunata. Chaylawmantañataqmi pasarqa Saalim sutiyoq lawman ichaqa chaypipas manamá tarirqachu. Pasarqataqmi Benjamin casta runakunapa allpan lawmanpas ichaqa manamá tarirqachu.

⁵ Chaymi Zuf casta runakunapa *f**yachanan lawman Saul chayaruspan riqmasin sirviententa nirqa: —Haku kutikusunchikña, seguroch taytayqa asnonkunamantapas mastaqa ñoqanchikmantaña llakikuchkan —nispa.

⁶ Hinaptinmi chay sirvientenñataq nirqa: —Kay llaqtapim kachkan Diospa runan, paytaqa lliwmi respetanku. Paypa imapas rimarisqanqa chay nisqanman hinam sucedekunpuni. Hakuchikyá paypata, ichapas payqa niykuwachwanchik maymanmi rinanchikpaq —nispa.

⁷ Chaymi Saul nirqa: —Hakuchikyá. Ichaqa ¿imatamá apasunchik chay runamanqa? Alforjanchikpiqa manam puchunñachu ima tantallapas. Chaynaqa ¿imatamá qoykuchwanchik chay runamanqa? —nispa.

⁸ Huktawanmi Saulta sirvienten nirqa: —Kapuwachkanmi qollqechay, chaytachiki qoykusaq Diospa runanmanqa chaynapi maymanmi rinanchikpaqpas willaykuwananchikpaq —nispa.

⁹ Ñawpa watakunam Israel casta runakuna Diosta tapukuq rispankuqa niqku kaynata: “Hakuchik qawaqpata” nispanku. Diosmanta willakuqwan kunan sutichasqanchiktam ñawpaqtaqa sutichaqku qawaqwan.

¹⁰ Chaynaqa Saulmá sirviententa nirqa: —Allinmi chay nisqaykiqa, hakuwá —nispa. Chaynapimá iskayninku rirqaku Diospa runanpa kasqan llaqtaman.

¹¹ Llaqtaman riq wichayta richkaspankum tuparurqaku yakuman hamuq sipaskunawan. Paykunatam tapurqaku: —¿Kaypichu kachkan qawaq? —nispa.

¹² Chaymi sipaskunañataq nirqa: —Arí, kaypim kachkan ichaqa waklawchapiraqmi tarikun. Utqaymanyá riychik. Payqa hamurqa kunan punchaw animalkunata Diosman moqopi ofrecenanpaqmi.

¹³ Chaynaqa llaqtaman chayaruspaykichikyá apurawman maskaychik manaraq moqoman pasakuchkaptin. Chay santuariopim payqa mikunqa. Runakunaqa manam mikunqakuchu pay chayanankama. Paymá Diosman graciasta qonqa chay animalkunapa aychanmanta. Chaymantañam convidoman hamuqkunapas mikunqaku. Chaynaqa pasaychikyá, kunanpunim tarirunkichik —nispa.

¹⁴ Chaymi paykuna llaqtaman seqarqaku. Chay llaqtaman yaykuchkaptinkuñam Samuelqa hamuchkasqa paykuna lawman. Payqa lloqsimuchkarqa moqoman rinanpaqmi.

¹⁵ Saul chayamunanpaq huk punchaw faltachkaptinraqmi, Samuelta Tayta Dios kaynata nirqa:

¹⁶ —Paqarinmi kunan horatapuni Benjaminpa casta runakunapa allpanmanta kachamusqayki huk runata. Paytam aceitewan tallispa nombranki Israel runaykunapa kamachiqnin kananpaq. Paymi runaykunata libranqa Filistea runakunamanta. Runaykunapa mañakuwasqantam uyariykuni —nispa.

¹⁷ Chaynaqa Saulta Samuel rikuruptinmi Tayta Dios nirqa: —Paymi chay nisqay runaqa. Paymi runaykunata gobiernanqa —nispa.

¹⁸ Chaymi llaqtapa zaguan punkunpiña kachkaptinku Saul asuykuspan Samuelta nirqa: —Ama hina kaspaykiyá reqsiykachillaway qawaqpa wasinta —nispa.

¹⁹ Chaymi Samuelñataq nirqa: —Ñoqam kani kunanqa hakuchikyá moqoman chaypi mikumunanchikpaq. Paqarin achikyaqmanñam willasqayki tukuy tapuwasqaykita hinaspañam aviasqayki.

²⁰ Kimsa punchawña chinkaq china asnoykikunamantaqa amaña llakikuyñachu, ñam tarirunkuña. Israel casta runakunapa llumpayllaña munasqankuqa kachkan qanwan aylluykikunam —nispa.

²¹ Chaymi Saul nirqa: —¿Imaynataq chayqa kanman? Ñoqaqariki kani Benjamin ayllumanta kaqmi, chay aylluqariki kaniku Israel wakin ayllukunamantapas aslla kaqmi. Chaywanpas ñoqapa familiayqa manam Benjaminpa wakin castankuna hina ancha reqsisqachu. Hinaptinqa ¿imanasqamá chaykunataqa niwanki, taytáy? —nispa.

²² Hinaptinmi Saultawan chay sirviententa Samuel pusaykurqa corredor ukuman hinaspam convidoman riqkunapa chawpinpi allin sitiopi paykunata tiyaykachirqa. Chaypiqa tarikurqaku yaqa kimsa chunka runakunam,

²³ Samuelmi yanukuqta nirqa: —Apamuy sapaqlla churachisqay aychata —nispa.

²⁴ Chaymi yanukuqqa enteron piernan aychata horqoykamuspan Saulman qoykurqa. Hinaptinmi Samuel nirqa: —Kaytam qampaq sapaqllata churarqani chaynaqa mikuykuyá. Qampaqmá sapaqllata churachirqani kay runakunaman convidasqay punchawpi —nispa. Chaynapimá chay punchawqa Saul mikurqa Samuelwan.

²⁵ Hinaspam moqomanta uraykamurqa llaqtaman hinaptinmi Saulpaq camata alistapurqaku wasipa hawanpi hinaptinmi Saulqa chaypi puñurqa.

²⁶ Paqarinnintinmi yaqa achikyaqtaña Saul puñuchkaptinraq Samuel qayarqa: —Hatariyña avianaypaq —nispa. Hatariruptinmi Samuelwan kuska lloqsirqaku.

²⁷ Llaqtapa cantontaña uraykuchkaptinkum Samuel nirqa Saulta: —Sirvientekita rimapayay puntachkananpaq —nispa. sirvienten puntaruptinmi Samuelñataq Saulta nirqa: —Qamqa suyaykuyraq tumpata. Imam Diospa niwasqantam qanman willanay kachkan —nispa.