1~Samuel 8 - Quechua Ayacucho Bible 1987

Reyniyoq kanankupaq Israel runakuna mañakusqankumanta

¹ Samuelmi machuyaruspanña Israel casta runakunapa jefen kanankupaq churarqa churinkunata.

² Piwi churinpa sutinmi karqa Joel. Joelman qatiqñataqmi karqa Abias. Paykunam jefe karqaku Beerseba llaqtapi.

³ Ichaqa chay churinkunaqa manam taytanku Samuel hinachu allinta kawsarqaku. Aswanqa apuyayta kuyaruspankum regalokunata chaskikuqku. Ima asuntotapas manam allichaqku imam kaqninpichu.

⁴ Chaymi Israel casta runakunapa llapallan ancianonkuna huñunakuruspanku rirqaku Rama llaqtaman chaypi Samuelwan tupanankupaq.

⁵ Paykunam Samuelta nirqaku: —Qamqa machuyarunkiñam. Churikikunaqa manam qam hina allintachu kawsanku. Chaynaqa churapuwaykuyá huk reyta chaynapi huklaw nacionkunapi hina huk reyña gobiernaqniyku kananpaq —nispa.

⁶ Chayna mañakusqankuqa manam Samueltaqa gustarqachu. Chaymi Samuel Tayta Diosta mañakurqa.

⁷ Hinaptinmi Tayta Diosñataq Samuelta nirqa: —Uyariyá runakunapa tukuy ima mañakususqaykita, manam qamtachu qepanchakusunkiqa aswanqa ñoqatam. Manam munankuchu paykunapa reynin kanayta.

⁸ Egipto nacionmanta horqomusqay punchawmantapunim kunankama tukuy imata contraypi rurarqaku, chaynallatam qanwanpas kunan rurachkanku. Arí, ñoqamanta karunchakuruspankumá taytacha-mamachakunataña adorachkanku.

⁹ Chaynaqa uyariyá paykunapa mañakususqaykita. Ichaqa puntatayá paykunapa contranpi willay imakunam gobiernaqninku reypa costumbren kananmanta.

¹⁰ Chaymi rey mañakuq runakunaman Samuel willarqa Tayta Diospa tukuy ima nisqanta.

¹¹ Diospa nisqantamá Samuel kaynata nirqa: —Reyniyoq kaptikichikqa kaykunam paypa costumbren kanqa: Churikichikkunata hapirispam wakinta churanqa caballokunapa chutasqan carretakunapi peleanankupaq, wakintañataq caballokunapi sillakuspa peleanankupaq, wakintañataq kikinpa carretanpa ñawpaqninta kallpanankupaq.

¹² Wakintañataqmi churanqa waranqa soldadokunapa kamachiqnin kananpaq chaynataq pichqa chunka soldadokunapa kamachiqnin kananpaqpas. Qamkunatañataqmi churasunkichik chakrankunapi yapuq kanaykichikpaq, cosechankuna rutuq kanaykichikpaq chaynataq armakuna ruraq kanaykichikpaq hinaspa carretankunapa piezankunapas ruraq kanaykichikpaq.

¹³ Warmi churikichikkunatapas apanqam perfumekunata ruranankupaq, yanukunankupaq chaynataq tantatapas ruranankupaq.

¹⁴ Reyqa hapikuykunqamá allinnin chakraykichiktapas, allinnin uvas chakraykichiktapas chaynataq allinnin aceituna sacha huertaykichiktapas. Chay chakrakunatam qoykunqa serviqninkunaman.

¹⁵ Sapa chunka costal granomantataqmi reymanqa qonkichik huknin costal granota, qonkichiktaqmi uvas plantaykichikmantapas. Chay qosqaykichiktam reyqa qonqa palacionpi serviqninkunaman chaynataq gobiernonpi yanapaqninkunamanpas.

¹⁶ Reyqa qechusunkichikmi qaripas-warmipas sirvientekichikkunata chaynataq qamkunamanta kaq mozokunatapas. Llamkachikunanpaqmi qechusunkichiktaq allinnin asnoykichiktapas.

¹⁷ Sapa chunkamantam reymanqa qonkichik huknin ovejaykichikta. Cheqaptaqariki kikikichikpunim kankichik paypa serviqninqa.

¹⁸ Chay punchawkunapim chay nombrasqaykichik reyrayku qayakamuwankichik ichaqa ñoqa Tayta Diosqa manam uyarisqaykichikchu —nispa.

^19-20 Chaynata Samuel niptinpas runakunataqa manam imapas qokurqachu aswanmi paykunaqa kaynataraq nirqaku: —Manam imananchu. Huklaw nacionkuna hina reyniyoq kaytam ñoqaykuqa munaniku, payña asuntoykutapas arreglanantam munaniku. Munanikuqa reyña gobiernawaspanku guerrapipas kamachiwanankutam —nispa.

²¹ Chaynaqa Samuelmá runakunapa lliw nisqanta uyarispan Tayta Diosman willarqa.

²² Chaymi Tayta Dios nirqa: —Mañakusqankuta uyarispayá akllapuy huk reyta —nispa. Chaymi Samuelqa Israel casta runakunata kamachirqa maymi llaqtankuman kutikunankupaq.