1~Samuel 6 - Quechua Ayacucho Bible 1987

Filistea runakuna Diospa baulnin kutichisqankumanta

¹ Tayta Diospa baulninmi karqa qanchis killapuni Filistea runakunapa allpanpi.

² Filistea runakunam qayachirqaku sacerdotekunatawan adivinokunata hinaspam tapurqaku: —¿Imatataq rurasunchik Tayta Diospa baulninwanqa? ¿Imaynatataq kutichichwanchik maymi kasqanmanqa? —nispa.

³ Chaymi paykunañataq nirqaku: —Israel casta runakunapa Diosninpa baulninta kutirichispaqa amamá apankichik mana imayoqtachu. Aswanqa pagaychikyá huchallikusqaykichikmanta ofrendata. Chayraqmi sanoyankichik hinaspam yachankichiktaq imanasqam castigoqa qamkunamanta mana karunchakusqanta —nispa.

⁴ Chaymi Filistea runakunañataq nirqaku: —Hinaptinqa ¿imatataq huchallikusqaykumanta pagasaqku? —nispa. Chaymi paykunañataq nirqa: —Qoychikyá chupuman rikchakuq pichqa qori alhajakunata, chaynataqa qonkichik Filistea runakunapa pichqa kamachiqnin kasqanraykum. Qoychiktaqyá ukuchaman rikchakuq pichqa qori alhajakunatapas. Qamkunaqariki kamachiqnikichikkunawan kuskam ñakarichkankichik hina chay castigollata.

⁵ Chaynaqa ruraychikyá chupuman rikchakuqta chaynataq chakraykichik tukuq ukuchakunaman rikchakuqtapas. Hinaspayá Israel casta runakunapa Diosninta alabaychik, icharaqpas chaynapi qamkunatapas, taytachaykichiktapas hinaspa chakraykichiktapas mana castiganmanchu.

⁶ Amayá qamkunaqa kaychik Egipto nacion runakuna hinachu otaq reyninku Faraon hinachu. Paykunam rumi sonqo runakuna karqaku chaymi Israel casta runakunapa Diosnin castigaptinña rinankupaq paykunata kachaykurqa.

⁷ Chaynaqa ruraychikyá huk mosoq carretata hinaspayá manaraq yugo watana iskay vacata hapispaykichik chayman chay carretata wataychik. Chay vacakunaqa kanqa uñayoq vacakunam. Ichaqa uñankunataqa amam kacharinkichikchu mamanta qatinanpaq, chay uñankunataqa kutichinkichik wasimanmi.

⁸ Chay carretamanyá churaychik Tayta Diospa baulninta. Chaypa waqtanmanñataqmi huk cajapi churankichik huchaykichikmanta pagasqaykichik qori alhajakunata. Chaykunata churaykuspam carreta chutaq vacakunata aviarunkichik.

⁹ Qamkunam qawankichik, sichum maymi kananman chay carreta wicharinqa Bet-semes llaqtaman riq ñanninta hinaptinqa tukuy chay mana allinkunawan castigawaqninchikqariki Israel casta runakunapa Diosninmi. Mana chayna kaptinqa yachasunchiktaqmi kay castigoqa paymanta mana hamusqanta, seguropas desgraciallach karqa —nispa.

¹⁰ Hinaptinmi chay runakuna chaynata rurarqaku. Uñayoq iskay vacakunata hapispankum carretaman watarurqaku. Uñankunatañataqmi wasipi wichqarurqaku.

¹¹ Hinaspam Tayta Diospa baulninta churarqaku chay carretaman, churarqakutaqmi chay huknin cajatapas. Chay huknin cajapim kachkarqa ukuchaman rikchakuq qori alhajakuna chaynataq chupuman rikchakuq qori alhajakunapas.

¹² Vacakunam derechollata waqastin pasarqaku Bet-semes llaqtaman riq ñanninta. Manam muyurqachu *f**ichoq lawman nitaq *f**alleq lawmanpas. Filistea runakunapa kamachiqninkunañataqmi carretapa qepanta qatirqaku Betsemes llaqtapa linderonkama.

¹³ Bet-semes llaqtayoq runakunam qechwapi trigota rutuchkarqaku. Paykunam qawarispanku rikururqaku baulta hinaspam anchallataña kusikurqaku.

¹⁴ Chay carretamá Bet-semes llaqta lawpi Josueypa chakrankunaman chayaruspan chaypi sayarurqa. Chaypim karqa huk hatu-hatun rumi. Hinaptinmi chay Bet-semes llaqtayoqkuna chay carretata yantapaq chitqarurqaku. Chay vacakunatañataqmi lliwta kañaspa Tayta Diosman ofrecerqaku.

¹⁵ Leviypa castankunam Tayta Diospa baulninta uraykachirqaku. Uraykachirqakutaqmi chay qori alhaja waqaychasqanku cajatapas hinaspam chay hatun rumipa hawanman churaykurqaku. Chay punchawmi Bet-semes llaqtayoqkuna Tayta Diosman ofrecerqaku kañana ofrendakunata, kañarqakutaqmi animalkunatapas chaynataq wakin ofrendakunatapas.

¹⁶ Filistea runakunapa pichqantin kamachiqninkuna chayta qawaykuspankum hina chay punchawlla Ecron llaqtaman kutikurqaku.

¹⁷ Chay chupuman rikchakuq qori alhajakunata ofreceq Filistea llaqtakunam karqa pichqa: huknin qori alhajam karqa Asdod llaqtamanta, hukninñataq Gaza llaqtamanta, hukninñataq Ascalon llaqtamanta, huninñataq Gat llaqtamanta hinaspa hukninñataq Ecron llaqtamanta. Chaynaqa huchankumantamá Tayta Diosman pagarqaku chupuman rikchakuq pichqa qori alhajakunata.

¹⁸ Ukuchaman rikchakuq qori alhajakunapas karqa chay pichqantin kamachikuq Filistea runakunapa llapallan llaqtankuman hinam. Chay llapallan llaqtakunawan yupasqam karqa murallasqa llaqtakunapas chaynataq mana murallasqa taksa llaqtachakunapas. Kay libro qellqasqa kasqan punchawkamapas chay hatu-hatun rumiqa hinallaraqmi testigo hina kachkan. Chay rumipa hawanmanmá churarqaku Tayta Diospa baulninta. Chayqa karqa Bet-semes llaqtayoq Josueypa chakranpim.

¹⁹ Bet-semes llaqtayoq runakunam qawaykurqaku Tayta Diospa baulninpa ukunta chaymi pay wañurachirqa chay llaqtapi wakin runakunata. Wañurachirqaqa qanchis chunka qarikunatam. Tayta Dios wañuywan castigaruptinmi chaypi *f**yachaqkuna llumpayta waqarqaku.

²⁰ Chaymi Bet-semes llaqtayoqkuna nirqaku: —¿Piraq sayaykunman chuya Tayta Diospa ñawpaqninpiqa? ¿Pikunapa kasqanmanraq rinqa ñoqanchikmanta pasaspanqa? —nispa.

²¹ Willakuqkunatam kacharqaku Quiriat-jearim llaqtapi *f**yachaqkunaman: —Filistea runakunam kutirachimunku Tayta Diospa baulninta chaynaqa hamuspayá apaychik —nispa.