1~Samuel 5 - Quechua Ayacucho Bible 1987

Diospa Baulnin Filistea runakunapa llaqtanpi kasqanmanta

¹ Filistea runakunam Diospa baulninta qechuruspanku Eben-ezer sitiomanta aparqaku Asdod llaqtaman.

² Hinaspam Señor Diospa baulninta apaykurqaku Dagon sutiyoq taytachankupa templonman. Chaypim churarqaku Dagon sutiyoq taytachankupa waqtanpi.

³ Paqarinnintin punchawmi Asdod llaqtayoq runakuna tutapayta hatarispan rirqaku hinaspam taytachanku Dagonta tarirurqaku Tayta Diospa baulninpa ñawpaqninpi pakcharayachkaqta. Chaymi taytachanku Dagonta churarqaku maymi kasqanman.

⁴ Chay punchawpa paqarinninmanmi tutapayta hatarispa huktawan hamurqaku. Hinaspam Dagontaqa huktawan tarirurqaku Tayta Diospa baulninpa ñawpaqninpi pakcharayachkaqta. Ichaqa chay taytachanku Dagonpa umanñataqmi iskaynin makinpiwan qorusqaña kachkasqa punku pasaykunapi. Taytacha Dagonpaqa cuerpollanñam puchurusqa.

⁵ Chayraykum Asdod llaqtapi Dagonpa wasinman yaykuq sacerdotekunaqa mana sarunkuchu punku pasaykunata. Chaynallatam ruranku llapallan chayman yaykuqkunapas, kay libro qellqasqa kasqan punchawkama.

⁶ Chaymantam Tayta Diosqa Asdod llaqtayoqkunata sinchillataña castigarqa. Manchakuymi yaykururqa Asdod llaqtayoqkunaman chaynataq vecinonkunamanpas. Paykunatam chupupakuy onqoywan hapirachirqa.

⁷ Chaymi Asdod llaqtayoqkuna chaykunata qawaykuspanku nirqaku: —Israel runakunapa Diosninpa baulninqa amapuniña ñoqanchikwanqa kachunchu. Chay Diosmi llumpayta castigawachkanchik. Castigachkantaqmi taytachanchik Dagontapas —nispa.

⁸ Chaymi Asdod llaqtayoq runakunaqa Filistea runakuna ukupi kamachikuqkunata qayachimurqaku hinaspam paykunata tapurqaku: —¿Imatataq rurasunchik Israel casta runakunapa Diosninpa baulninwan? —nispanku. Chaymi paykunañataq nirqaku: —Aparuychik Gat llaqtaman —nispa. Chaymi Israel casta runakunapa Diosninpa baulninta Gat llaqtaman aparqaku.

⁹ Ichaqa chay llaqtaman aparuptinkum paykunata anchallataña Tayta Dios chaqwarachirqa. Chay llaqtapi *f**yachaqkunatam taksamanta hatunkama chupupakuy onqoywan hapirachirqa.

¹⁰ Chaymi Filistea runakunaqa Diospa baulninta aparachirqaku Ecron llaqtamanña. Ichaqa Diospa baulnin Ecron llaqtaman chayaruptinmi Ecron llaqtayoqkuna qaparirqaku kaynata: —¡Llapallanchikta wañurachiwananchikpaqmi aparamuwanchik Israel casta runakunapa Diosninpa baulninta! —nispa.

¹¹ Tukuy chay llaqtakunapi llumpaysuta Dios castigasqanraykum chaqwallapiña llapa runakuna tarikurqaku wañuy patanpi hinaña. Chaymi qayachirqaku Filistea runakuna ukupi llapallan kamachikuqkunata hinaspam nirqaku: —Apaychik kaymanta Israel casta runakunapa Diosninpa baulninta. Kutichiychik maymi kasqanman chaynapi ama llapallanchikta wañurachiwananchikpaq —nispa.

¹² Chay llaqta runakunapa qaparisqanqa chayarqa cielokamaraqmi. Wañuymanta lluptiqkunapas chupupakuy onqoywanmi hapirachikurqaku.