1~Samuel 4 - Quechua Ayacucho Bible 1987

¹ Hinaptinmi Samuelñataq willaq Israel casta llapallan runakunaman. Chay tiempopim Filistea runakuna huñunakururqaku Israelpa castankunawan guerrapi peleanankupaq chaymi Israelpa castankuna peleaq lloqsispanku karpankuta sayachirqaku Eben-ezer sutiyoq lugarpa hichpanpi. Filistea runakunañataqmi karpankuta sayachirqaku Afec sutiyoq lawpi.

Diospa baulninta Filistea runakuna qechurusqanmanta

² Filistea runakunam kinrayninman chutarikurqaku Israel casta runakunawan peleanankupaq. Peleayta qallaykuptinkum Israel casta runakunata Filistea runakuna vencerurqa. Chay peleasqanku pampapim wañurachirqaku tawa waranqa runakunata Israel castamanta.

³ Chaymi Israel casta tropakuna campamentoman kutiykuptinku ancianokuna nirqaku: —¿Imanasqataq Tayta Diosqa Filistea runakunawanqa vencerachiwanchik? Rispanchikyá Silo llaqtamanta aparamusunchik Tayta Diospa contrato rurasqan baulta chaynapi chawpinchikta rispan enemigonchikkunamanta salvawananchikpaq —nispa.

⁴ Chaynapim Silo llaqtaman runakunata kacharqaku. Chay llaqtamantam apamurqaku Llapallan Kamachiq Tayta Diospa contrato rurasqan baulta. Chaypim payqa tiyan querubin sutiyoq angelkunapa chawpinpi. Eliypa churin Ofniwan Fineespas compañarqakum Diospa contrato rurasqan baulta.

⁵ Tropakunapa campamentonman Tayta Diospa contrato rurasqan baul chayaruptinmi Israelpa castankuna kusikuymanta qaparirqaku allpapas yachapayanankama.

⁶ Filistea runakunañataqmi sinchi qapariyta uyariruspanku tapunakurqaku: —¿Imanasqataq sinchillataña qaparichkanku Hebreo casta runakunapa campamentonpiqa? —nispa. Chaymantañam yacharurqaku Tayta Diospa contrato rurasqan baulninta campamentoman aparamusqankuta.

⁷ Chaymi Filistea runakunaqa mancharikuspanku nirqaku: —¡Diosmi chayaramun campamentonkuman! ¡Imaynaraq kasunchik, ñawpaqtaqa manam kaynachu karqa!

⁸ ¡Imaynaraq kasunchik! ¿Piraq librawasunchik chay atiyniyoq Diosninkumantaqa? Chay Diosninkuqariki chunniqpipas tukuy rikchaq castigowanmi Egipto nacion runakunata castigarqa.

⁹ ¡Chaynaqa Filistea runakuna, kallpanchakuspa, qarinchakuspa peleaychik! ¡Hebreo casta runakunam serviwarqanchik, yanqañataq ñoqanchikpas paykunapa serviqnin rikuriruchwan! ¡Chaynaqa qarinchakuspayá peleasunchik! —nispa.

¹⁰ Filistea runakunamá peleaspanku vencerurqaku Israel casta runakunata. Paykunam lluptikurqaku karpankuman. Chaypi wañuqkunam karqaku achkallay-achkasu. Israel castamanta chakiwan puriq tropakunam wañururqaku kimsa chunka waranqa runakuna.

¹¹ Filistea runakunamá Diospa contrato rurasqan baulnintapas qechururqaku. Eliypa churin Ofnitawan Fineestapas iskaynintam wañurachirqaku.

¹² Ichaqa Benjaminpa ayllunmanta guerrapi peleaq huk qarim kallpaspan chay punchawlla Silo llaqtaman chayarurqa. Chayarurqaqa pachanpas llikipasqa hinaspa umanpas allpallañam.

¹³ Chayaruptinmi sacerdote Eliyqa uyan-uyanlla ñanpa patanpi tiyachkasqa sillanpi. Paymi llumpay preocupasqa kachkarqa Diospa contrato rurasqan baulmanta. Chay kallpamuq runamá llaqtanman chayaruspan willaykurqa imam pasakusqanmanta hinaptinmi lliw llaqtantin runakuna qaparispa waqarqaku.

¹⁴ Chay qaparisqankuta uyarispanmi Eliyñataq nirqa: —¿Imanasqataq chaynatañaqa qaparichkanku? —nispa. Hinaptinmi chay runa utqayllamanña rispan Eliyman willarqa.

¹⁵ Eliymi karqa isqon chunka pusaqnin watayoqña chaymi manaña rikukuytapas atirqachu puyuyasqa ñawiyoq kasqanrayku.

¹⁶ Chay runam sacerdote Eliyta nirqa: —Chayraqmi chayaramuni guerramanta. Kunanmi ayqekamurqani peleasqay lugarmanta —nispa. Chaymi Eliy tapurqa: —¿Imataq pasakun taytáy? —nispa.

¹⁷ Hinaptinmi chay willakuqñataq nirqa: —Israel casta runakunam lluptikunku Filistea runakunamanta. Chaynataqmi runakunapas achkallaña wañurunku. Churiki Ofniwan Fineespas iskayninkum wañurunku, Diospa baulnintapas Filistea runakunam qechurunku —nispa.

¹⁸ Diospa baulninmanta willaykuptinmi sillamanta Eliy wichiykurqa. Wichiykurqaqa qepan lawmanmi zaguan punkupa ladonpi chaymi llasaq cuerpo machuña kasqanrayku kunkanta pakiruspan wañukurqa. Payqa tawa chunka watapunim Israel casta runakunapa jefen karqa.

¹⁹ Llumchuynintañataqmi wachakuy hapirurqa. Chay llumchuyninqa karqa Fineespa warminmi. Paymi wiksayoq kaspan onqonan hichpapiña kachkarqa. Diospa baulnin qechusqa kasqantam uyarirurqa, uyarirurqataqmi suegronpa hinaspa qosanpa wañukusqantapas chaymi kallpanchakuykuspan wachakururqa.

²⁰ Wañunayachkaptinmi payta yanapaqninkuna nirqaku: —Ama manchakuychu, qari wawatam wachakurunki —nispa. Paymi ichaqa manaña imatapas nirqachu nitaqmi musyakurqañachu

^21-22 wawantam suticharqa Icabodwan: “Tayta Diospa atiyninmi Israel casta runakunamanta chinkarun” nispa. Chaynataqa nirqa Diospa baulnin qechusqa kasqanraykum chaynataq suegronpiwan qosan wañukusqanraykum.