1~Samuel 3 - Quechua Ayacucho Bible 1987

Samuelta Tayta Diospa qayasqanmanta

¹ Samuelmi warmallaraq kachkaspan sacerdote Eliyta yanapaspan Tayta Diosta servirqa. Chay tiempokunapim Tayta Diosqa manaña ancha pitapas rimapayarqachu imam munasqanmanta. Manam pimanpas imatapas revelarqañachu.

² Huk tutam sacerdote Eliy puñuchkarqa cuartonpi. Paymi ñawsayayta qallaykuspan manaña qawakuytapas atirqañachu.

³ Samuelñataqmi puñuchkarqa Tayta Diospa templonpi, chaypim kachkarqa Diospa baulninpas, mecheropas hinallaraq ratachkaptinmi

⁴ Tayta Dios qayarqa: —Samuel —nispan. Chaymi Samuelñataq nirqa: —¿Imata? —nispa.

⁵ Chaymi Eliypa kasqanman kallpaspan nirqa: —Taytay ¿imapaqtaq qayamuwarqanki? —nispa. Hinaptinmi Eliyñataq nirqa: —Manam ñoqaqa qayamurqaykichu. Kutispaykiyá puñukamuy —nispa. Chaymi Samuel kutirispan huktawan siriykurqa.

⁶ Ichaqa Tayta Diosmi huktawan Samuelta qayarqa: —¡Samuel! —nispa. Chaymi Samuel hatarispan rirqa Eliypa kasqanman hinaspam nirqa: —Taytáy ¿imapaqtaq qayamuwarqanki? —nispa. Hinaptinmi Eliyñataq nirqa: —Manam ñoqaqa qayamurqaykichu, churilláy, kutispayá puñukamuy —nispa.

⁷ Samuelqa manaraqmi reqsirqachu Tayta Diosta. Arí, kikin Diospas manaraqmá imatapas paymanqa rimapayarqaraqchu.

⁸ Ichaqa Tayta Diosmi Samuelta qayarqa kimsa kaq kutipi hinaptinmi Samuel rirqa Eliypa kasqanman hinaspam nirqa: —Taytáy ¿imapaqtaq qayamuwarqanki? —nispa. Chaymi Eliy musyarurqa warmallaraq Samueltaqa Tayta Dios qayamusqanta.

⁹ Chaymi Samuelta Eliy nirqa: —Kutikuspayki puñukamuy. Yapatawan qayamusuptikiqa kaynatam ninki: “Rimapayaykuwayá Dios Taytalláy, kay serviqnikiqa uyarichkaykim” nispa. Chaynata niptinmi Samuelqa kutikuspan kaqlla puñuykurqa.

¹⁰ Chaymi Tayta Dios hamuspan sayaykurqa hinaspam puntakunata hina qayarqa: —¡Samuel! ¡Samuel! —nispan. Chaymi Samuelñataq nirqa: —Rimapayaykuwayá, Dios Taytalláy, kay serviqnikiqa uyarichkaykim —nispa.

¹¹ Chaymi Tayta Dios nirqa: —Israel runakuna ukupim rurasaq huk hatun castigota, chay castigomanta lliw uyariqkunapas muspaypi hinaraqmi rikurirunqaku.

¹² Chay punchawpim cumplisaqpuni sacerdote Eliyman tukuy ima nisqayta. Arí, paytam nirqani familianpa contranpi imam ruranayta.

¹³ Nirqaniñamá familiantapas wiñaypaq castiganaymanta. Arí, churinkuna ñakawachkaptinpas payqariki manam corregirqachu.

¹⁴ Chayraykum jurarqani Eliypa familianpa contranpi. Chay mana allin rurasqanmantaqa manam haykapipas pampachasqachu kanqa animalkunataña wañuchipuwaptinpas nitaq kawsay ofrendakunata qowaptinpas —nispa.

¹⁵ Chaymantam Samuelqa waqtapakamurqa achikyanankama. Hinaspam kicharqa Tayta Diospa templonpa punkunkunata. Samuelmi manchakurqa imam uyarisqankunata sacerdote Eliyman willaykuyta.

¹⁶ Ichaqa Eliymi Samuelta qayaspan nirqa: —Yaw Samuel —nispan. Chaymi payñataq nirqa: —¿Imata taytay? —nispa.

¹⁷ Chaymi sacerdote Eliy tapurqa: —¿Imatataq Tayta Dios nisurqanki? Ama pakawaspayá willaykuway. ¡Diosyá llumpayta castigasunki imapas nisusqaykita pakawaptikiqa! —nispan.

¹⁸ Hinaptinmi Samuel willarqa lliwta mana imatapas pakaspan. Hinaptinmi Eliyñataq nirqa: —¡Payqa Tayta Diosmi! ¡Rurachun imam munasqanman hinayá! —nispa.

¹⁹ Samuel wiñaptinmi Tayta Dios yanaparqa. Cumplirqamá Samuelman tukuy ima nisqanta.

²⁰ Chaymi Israelpa llapallan castan runakuna Dan llaqtamanta qallaykuspa Beerseba llaqtakama yacharqaku Samuelqa Tayta Diosmanta cheqaptapuni willakuq kasqanta.

²¹ Yapatawanmi Tayta Dios rikurirqa Silo llaqtapi. Chaypimá Samuelman willaq imapas rimapayay munasqanta.