1~Samuel 2 - Quechua Ayacucho Bible 1987

Diosta Ana alabasqanmanta

¹ Anam mañakuspan takirqa: Dios Taytalláy, qamraykum sonqoypi kusikuchkani. Qamllapim ñoqaqa kallpanchakuchkani. Enemigoykunapa contranpim rimariymanña. Librawasqaykiraykum kunanqa kusikuchkaniña.

² Dios Taytalláy, ¡qam hina chuyaqa manam pipas kanchu! ¡Qam hinaqa manam pipas kanchu! ¡Qam hina harkaykuwaqniyqa manam pipas kanchu!

³ Amayá pipas rimachunchu hatun tukuspaqa, amayá pipas alabakuchunchu llumpaytaqa. Tayta Diosqariki tukuy ima yachaq Diosmi. Payqa runapa tukuy ima rurasqanta controlaq Diosmi.

⁴ Payqa kallpasapakunapa flechanankuna pakipaqmi. Mana kallpayoq runakunata kallpanchaqmi.

⁵ Saksaruspa puchupakuqkunam kunanqa parten tantallapaqña llamkachkanku. Yarqaymanta kaqkunam, kunanqa saksasqaña kachkanku. Mana wachakuqkunapas, qanchis wawayoqñam kachkanku. Achka wawayoq kaqkunañataqmi wayta hina chakisqaña kachkanku.

⁶ Tayta Diosllam pitapas wañurachinman chaynataq kawsarichinmanpas. Payllam wañuqkunapa kasqanman wischuykunman chaynataq horqomunmanpas.

⁷ Tayta Diosllam pitapas wakchayachinman chaynataq apuyachinmanpas. Payllam pitapas urmachinman chaynataq sayarichinmanpas.

⁸ Diosllam wakchatapas hatarichin pampapi urmasqanmanta. Payllam limosna mañakuqtapas sayarichin uchpapa kananmanta. Hinaspam ancha reqsisqa runakunawanña tiyaykachin. Hinaspam reqsisqa runakunapa tiyananpiña tiyaykachin. Tayta Diospam kay pacha takyachiq pilarkunaqa, chaykunapa hawanpim kay pachata churaykurqa

⁹ Paymi waqaychan chuyanchasqan runakunataqa. Ichaqa tutayaypim chinkarachinqa mana allin ruraqkunataqa. Manam pipas vencenmanchu kikinpa kallpallanwanqa.

¹⁰ Tayta Diosmi pasaypaqta tukurunqa, contranpi sayariqkunataqa. Paykunapa contranpim cielomanta kachaykamunqa rayokunata. Tayta Diosmi juzganqa kay pachapi llapallan runakunata. Qonqam atiyta akllakusqan reymanpas. Kallpanchanqam aceitewan tallispa nombrasqantapas.

¹¹ Chaymantam Elcana kutikurqa Rama sutiyoq llaqtapi wasinman. Warmacha Samuelñataqmi sacerdote Eliywan qeparurqa Tayta Diosta servinanpaq.

Eliypa churinkuna mana allinlla rurasqankumanta

¹² Eliypa churinkunam karqaku mana allinlla ruraqkuna. Paykunaqa Tayta Diostam mana respetarqakuchu

¹³ nitaqmi respetarqakuchu reglamentoman hina runakunapaq sacerdotekuna imam ruranankutapas. Pipas animalta wañuchispan Diosman ofreceptinmi chay sacerdotepa sirvienten trincheyoq rispan aychata yanuchkaptinku

¹⁴ chay trinchiwan horqoq perolmanta, mankamanta otaq sartenmantapas. Chay trinchewan lliw horqosqanqa karqa sacerdotepaqmi. Chaynatam ruraqku Silo llaqtaman riq Israel casta llapallan runakunawan.

¹⁵ Altarpi manaraq wirata kañachkaptinkupas sacerdotepa sirvienten rispanmi Diosman animal ofreceq runata niq: —Sacerdotepaq kankanapaqyá qoway aychata. Manam chaskisunkimanchu yanusqatañaqa aswanqa chawallatam —nispan.

¹⁶ Hinaptinmi chay animal ofreceq runañataq niq: —Wiraraqyá puntata ruparuchun chaymantañayá munasqaykita horqokuykuy —nispa. Chaynata niptinmi sirvienteñataq niq: —Manam. ¡Kunanpunim qowankiqa! Mana chayqa qechurusqaykipunim —nispa.

¹⁷ Chaynapimá chay mozo sacerdotekunaqa llumpa-llumpayta huchallikurqaku Tayta Diospa qayllanpi. Paykunaqa Tayta Diosman qosqanku ofrendakunatamá yanqallapaq hapiqku.

¹⁸ Samuelñataqmi Tayta Diosta servirqa linomanta *f**efodwan pachasqa. Payqa karqa warmallaraqmi.

¹⁹ Mamanmi taksa sotanachanta rurapuq sapa wata. Chaytam apaq Silo llaqtaman qosanwan rispan, chaypim watan-watan animalta wañuchispa Diosman ofreceqku.

²⁰ Chaymi Elcanapaqwan warminpaq sacerdote Eliy Diospa bendicionninta mañakuspan Elcanata niq: —Kay warmikim Tayta Diosmanta mañakusqan wawan Samuelta qoykurqa payman, chaynaqa kay warmikipiyá Dios qosunki churikikunata kay warmapa rantinpi —nispa. Chaymantam kutikuqku wasinkuman.

²¹ Anata Tayta Dios favoreceykuptinmi wiksayakururqa. Chaymi kimsakama wachakururqa qaritakama, wachakurqataqmi iskay warmi wawankunatapas. Samuelñataqmi wiñarqa Tayta Diospa ñawpaqninpi. Payqa karqa warmallaraqmi.

²² Sacerdote Eliymi karqa llumpay machuña. Payqa yacharqam churinkunaqa Israel casta llapallan runakunawan tukuy ima rurasqankuta. Yacharqataqmi Diosman asuykuna karpapa punkunpi serviq warmikunawan puñukusqankutapas.

²³ Chaymi nirqa paykunata: —¿Imanasqataq rurankichik kaykunata? Mana allin rurasqaykichiktam uyarini kay lliw runakunamanta.

²⁴ Amayá chaynaqa kachunchu churillaykuna. Tayta Diospa runankunamanta kay uyarisqaykunaqa manapunim allinchu.

²⁵ Sichum pipas runamasinpa contranpi huchallikuruptinqa Diosmi allinyanachinman. Ichaqa pipas Tayta Diospa contranpi huchallikuruptinqa ¿pitaq paywan allinyanachinman? —nispa. Chaynata taytan niptinpas paykunaqa manam kasurqakuchu. Tayta Diosqa ñam tantearurqaña paykunata wañurachinanpaq.

²⁶ Warma Samuelñataqmi wiñarqa Tayta Diostapas chaynataq runakunatapas agradastin.

²⁷ Huk punchawmi sacerdote Eliyman Diospa runan hamuspan Tayta Diospa nisqanta nirqa: —Egipto nacionpi ñawpa abueloykikuna Rey Faraonta servichkaptinkum paykunaman rikurirqani.

²⁸ Chaymi Israel llapallan ayllukunamanta ñawpa abueloyki Aaronpa castankunata akllarqani sacerdoteykunaña kanankupaq, chaynapi altarniypa hawanpi animalkunata kañapuwanankupaq chaynataq inciensotapas kañapuwanankupaq chaynataq *f**efodwanpas churakuspa ñawpaqniypi serviwanankupaq. Ñawpa sacerdote abueloykikunamanqa qorqanitaqmi Israelpa mirayninkunapa kañasqanku ofrendakunatapas.

²⁹ Chaynaqa ¿imanasqamá kamachisqaytaqa manaqa kasukunkichikchu? Ñoqaqariki kamachirqaykichik animalkunata carpaypa kasqanpi ofrecewanaykichikpaqmi chaynataq ofrendakunatapas presentawanaykichikpaqmi. ¿Imanasqataq ñoqamantapas mastaraq churikikunata hatuncharunki? Israel runaykunapa lliw allinnin ofrendakunawanmi paykunata wirayarachinki.

³⁰ Chayraykum Israelpa yupaychasqan Tayta Dios nini kaynata: Ñoqam nirqani miraynikipas chaynataq abueloykikunapa mirayninpas wiñaypaqña serviwanankupaq. Kunanmi ichaqa mana chaynañachu kanqa. Ñoqaqa reqsisqatam rurasaq haykam yupaychawaqniytaqa. Despreciawaqniykunatam ichaqa ñakasaq.

³¹ Hamuchkanmi punchawkuna kallpaykita chinkarachinaypaq, chinkarachisaqtaqmi abueloykikunapa castanpa kallpantapas chaymi qampa castaykipiqa manaña pipas machuyayman chayanqañachu.

³² Israelpa castan runakunata sumaqllataña favoreceptiymi paykunamanta envidiakunki. Qampa familiaykiqa manañam pipas machuyayman chayanqañachu.

³³ Ichaqa familiaykimantam hukninta puchuchisaq altarniypa hichpanpi kananpaq chaynapim qampas waqasqallaykipi ñawsayarunki hinaptinmi sonqoykipas nanarinqa. Wakin miraynikim ichaqa kallpankupi kachkasparaq lliw wañuchisqa kanqaku.

³⁴ Chaymi kay señal qampaq kanqa: churiki Fineestawan Ofnitam iskayninkuta wañurachinqaku huk punchawllapi.

³⁵ Hinaptinmi ñoqañataq confianza kaq sacerdoteyta churasaq. Ñoqaqa churasaq sonqoyman hinaspa munasqayman hina ruraqtam, paypa aylluntam anchallataña mirachisaq akllakusqay reyta sapa punchaw servinanpaq.

³⁶ Chaymi pipas aylluykimanta kawsasparaqqa payman rinqa limosnero hina hinaspam qonqorakuykuspan ninqa: “Ama hina kaspaykiyá asllaña pagawanayki kaptinpas otaq parten tantallaña qowanayki kaptinpas sacerdotekunaman hina llamkayta qoykullaway chaynapi asllatapas mikunaypaq” nispa.