1~Samuel 16 - Quechua Ayacucho Bible 1987

Rey kananpaq David nombrasqa kasqanmanta

¹ Samueltam Tayta Dios kaynata nirqa: —¿Haykapikamataq Saulmanta waqanki? Ñoqaqa qarqoruniñam Israel runakunapa reynin manaña kananpaq. Hatarispaykiyá waqrachamanta botellaykiman aceiteta huntachiy. Ñoqam munachkani Belen llaqtayoq Isai sutiyoq runapa wasin rinaykita. Paypa huknin churintam akllaruniña rey kananpaq.

² Chaymi Samuelñataq nirqa: —¿Imaynataq risaqqa? ¡Saul yacharuspanqariki wañurachiwanqach! —nispa. Hinaptinmi Tayta Dios nirqa: —Malta vacata pusarikuspayá nimuy: “Kay malta vacata Tayta Diosman ofreceqmi richkani” nispa.

³ Hinaspayá chay animal ofrecewanaykipa kasqanman pusaytaq Isai sutiyoq runata. Ñoqam nisqayki imam ruranaykita, ñoqapa reqsichisqaytam aceitewan tallispa nombranki rey kananpaq —nispa.

⁴ Chaynapimá Samuelqa lliwta rurarqa Tayta Diospa kamachisqanman hina. Belen llaqtaman Samuel chayaruptinmi chay llaqtayoq autoridadkuna payta chaskinankupaq mancharisqallaña lloqsimurqaku hinaspam tapurqaku: —¿Allinpaqchu hamuchkanki taytáy? —nispa.

⁵ Chaymi Samuelñataq nirqa: —Arí, allinpaqmi, hamuchkaniqa Tayta Diosman animalta ofreceqmi. Chaynaqa qamkunapas Diosman asuykunaykichikpaqyá alistakuspa ñoqawan riychik animalta ofrecenapaq —nispa. Diosman asuykunankupaq Isaitawan churinkunata Samuel alistaruspanmi qayarqa animalta ofrecenankupaq.

⁶ Paykuna chayaramuptinmi Samuel qawarqa Isaipa churin Eliabta hinaspam piensarqa: —Segurom kay qaripuni rey kananpaq Tayta Diospa nombrasqanqa —nispa.

⁷ Ichaqa Tayta Diosmi Samuelta nirqa: —Amayá allin rikchaynillantachu qawayqa nitaq sayaynillantachu. Paytaqa manam munanichu. Runapa qawasqanqa manam ñoqapa qawasqay hinachu. Runaqa qawan hawallantam, ñoqam ichaqa qawani sonqonta —nispa.

⁸ Chaymantam Isaiqa qayarqa Abinadab sutiyoq huknin churintaña hinaspam asuykachirqa Samuelman. Hinaptinmi Samuelñataq nirqa: —Manam paychu Tayta Diospa akllasqanqa —nispa.

⁹ Chaymantam Isaiqa asuykachirqa Sama sutiyoq churintaña hinaptinmi Samuel nirqa: —Manam paychu Tayta Diospa akllasqanqa —nispa.

¹⁰ Isaimá asuykachirqa qanchis churinkunata hinaptinmi Samuelñataq nirqa: —Kay churikikunataqa manam Tayta Diosqa akllarqachu —nispa.

¹¹ Chaymantam Samuelqa Isaita tapurqa: —¿Kayllachu churikikuna? —nispa. Hinaptinmi Isaiñataq nirqa: —Kachkanraqmi sullka kaq, payqa oveja michiqmi —nispa. Chaymi Samuel nirqa: —Qayachimuy payta. Manaraq pay chayamuptinqa, manam tiyachwanchu mikunanchikpaq —nispa.

¹² Tayta Isai kamachikuptinmá qayamurqaku. Chay warmaqa kasqa sumaq paqo chukchayoq allin rikchayniyoq buen-mozom. Hinaptinmi Samuelta Tayta Dios nirqa: —Paymi, chaynaqa aceitewan tallispayá nombray rey kananpaq —nispa.

¹³ Chaymi Samuelqa waqrachamanta botellapi kaq aceiteta hapiykuspan wawqenkunapa qayllanpi talliykurqa Davidpa umanman. Chay ratomantapunim Davidta yanaparqa Tayta Diospa Espiritun. Chaymantam Samuelqa kutikurqa Rama llaqtaman.

Rey Saulpaq David arpa tocasqanmanta

¹⁴ Saulmantañataqmi Tayta Diospa Espiritun asurikururqa, paytaqa hapirurqa Tayta Diospa kachamusqan mana allin espirituñam.

¹⁵ Chaymi Saulta serviqninkuna nirqaku: —Qawasqaykipi hinam, qamtaqa hapisuchkanki Diosmanta kaq mana allin espiritu.

¹⁶ Chaynaqa reynillayku, kay serviqnikikunatayá kamachiwayku pitapas arpa tocaqta maskamunaykupaq, mana allin espiritu hapisuptikim arpata tocaptin allinta sientekunki —nispa.

¹⁷ Chaymi Saulñataq nirqa: —Maskamuychikyá pitapas allin tocay yachaqta hinaspayá pusamuwaychik —nispa.

¹⁸ Hinaptinmi huknin serviqnin nirqa: —Ñoqam rikurqani Belen llaqtayoq Isaipa huknin churin allin tocaqta. Payqa yachantaqmi imaynam allin rimaytapas, manataqmi manchakunchu guerrapi peleaytapas. Payqa buenmozo qarim, paytaqa Tayta Diospunim yanapan.

¹⁹ Chaymi Saul comisionta kacharqa Isaiman kaynata nimunankupaq: —Oveja michiq churiki Davidta kachamuway —nispa.

²⁰ Hinaptinmi tayta Isaiqa churin Davidta kacharqa Rey Saulman. Hina kikinwantaqmi apachirqa huk cabrachatapas.

²¹ Chaynapimá Davidqa Saulpa kasqanman chayaruspan payta yanapananpaq chaypiña karqa chaymi Saulpas Davidta llumpayllataña kuyaruspan arman apaqpaq akllaykurqa.

²² Saulqa huk runatam kacharqataq Davidpa taytan Isaita kaynata nimunanpaq: —Davidqa agradoypaqmi, ama hina kaspaykiyá yanapawananpaq saqeykuway —nispa.

²³ Diospa kachamusqan mana allin espiritu Saulta hapiptinmi Davidñataq arpanta tocaq chaymi Saulqa manaña ñakarispan allinyaykuq, mana allin espiritupas paymantam karunchakuq.