1~Samuel 12 - Quechua Ayacucho Bible 1987

Runakunaman Samuel rimarisqanmanta

¹ Chaymantam llapallan Israel casta runakunata Samuel nirqa: —Yachasqaykichikpi hinam ñoqaqa mana negarqaykichikchu tukuy ima mañakuwasqaykichikta, ñam reytapas qoykuykichikña.

² Kayqayá reynikichik. Payñam tukuy imapipas kamachisunkichik. Ñoqaqa yuyaqñam kani. Churiykunam ichaqa qamkunawan kachkan. Arí, ñoqaqariki mozo kasqaymantam kunankama qamkunata kamachirqaykichik.

³ Kayqayá kaypi kachkani. Sichum pipa bueyesnintapas otaq pipa asnontapas hapikuykuptiyqa otaq pitapas ñakarichiptiyqa otaq pitapas yanqapas-yanqa llakichiptiyqa chaynataq yanqamanta imatapas chaskikuykuspa upallakuykuptiyqa kunanyá niwaychik Tayta Diospa ñawpaqninpi hinaspa nombrasqan reypa ñawpaqninpi. Chayna kaptinqa pagapusaqpunim imam debekusqayta —nispa.

⁴ Chaymi paykunañataq nirqaku: —Qamqa taytáy, manam ñakarichiwarqankikuchu haykapipas, manataqmi yanqapas-yanqaqa llakichiwarqankikuchu, manataqmi yanqamantaqa imatapas chaskikurqankichu —nispa.

⁵ Hinaptinmi Samuelñataq nirqa: —Tayta Diosmi testigoyqa akllakusqan reypiwan mana imamantapas culpayoq tariwasqaykichikmanta —nispa. Chaymi paykunañataq nirqaku: —Arí, chaynapunim taytáy —nispanku.

⁶ Samuelqa llapa runakunatam nirqataq: —Tayta Diosmi akllarqa Moisestawan Aaronta chaymi paykuna ñawpa abuelonchikkunata horqomurqaku Egipto nacionmanta.

⁷ Chaynaqa kunanyá anchuykamuychik Tayta Diospa ñawpaqninpi qamkunata rimapayanaypaq. Rimapayasqaykichikqa Tayta Diospa qamkunapaq allinkuna rurasqanmantawan ñawpa abuelonchikkunapaq allinkuna rurasqanmantam.

⁸ Jacobmi mirayninkunapiwan ripukurqa Egipto nacionman. Chaypim ñawpa abuelonchikkunaqa ñakarisqankurayku Tayta Diosta qayakurqaku. Hinaptinmi Tayta Diosqa kacharqa Moisestawan Aaronta. Paykunam Egipto nacionmanta abuelonchikkunata horqomuspan kay sitioman churarqa *f**yachanankupaq.

⁹ Ichaqa chay abuelonchikkunaqa karunchakururqakum yupaychasqanchik Tayta Diosmanta hinaptinmi paykunataqa Sisara sutiyoq runapa munaychakuyninmanña qoykurqa. Chay runaqa karqa Hazor llaqtayoq lliw tropakunapa kamachiqninmi. Diosqa qoykurqataqmi Filistea runakunamanpas chaynataq Moab casta runakunamanpas chaynapim paykunaqa ñawpa abuelonchikkunawan pelearqaku.

¹⁰ Ichaqa abuelonchikkunam Tayta Diosta qayakuspa nirqaku: “Dios Taytallayku, ñoqaykuqa qanmanta karunchakuruspam huchallikuruniku, Baal sutiyoq taytachakunatawan Astarot sutiyoq mamachakunatañam adorarqaniku. Qamñayá kunanqa enemigoykumanta libraykullawayku, chaynapim ñoqaykuqa qamllataña adorasqaykiku” nispa.

¹¹ —Hinaptinmi Tayta Dios kachamurqa Jerobaalta, Baracta, Jefteyta hinaspa ñoqa Samueltapas chaynapi enemigoykichikkunamanta librasunaykichikpaq. Hinaptinñam qamkunaqa hawka kawsakurqankichik.

¹² Ichaqa Amonpa mirayninkunapa reynin Nahasta contraykichikpi peleaq hamuqta rikuruspam mañakuwarqankichik huk reyta qonaypaq, yupaychasqanchik Tayta Diospuni reyninchik kachkaptinmi huk gobiernaqtaraq mañakuwarqankichik.

¹³ Chaynaqa kayqayá kaypi kachkan qamkunapa akllakusqaykichik reyqa. Tayta Diosmi qoykusunkichik mañakusqaykichik reyta.

¹⁴ Kunanqa Tayta Diosta respetaspayá paytaña adoraychik, payta uyarispayá kasukuychik nisqankunatapas. Yupaychasqanchik Tayta Diosta qatispaqa qamkunapas chaynataq gobiernasuqnikichik reypas allinmi kanqa.

¹⁵ Ichaqa Tayta Diosta mana uyarispa kamachikuyninkunatapas mana kasukuptikichikqa paymi castigasunkichik, castigasunkichikqa ñawpa abuelonchikkunata hinam.

¹⁶ —Chaynaqa kunan suyaspayá qawaychik Tayta Diospa hatu-hatun señal rurasqanta.

¹⁷ Yachasqaykichikpi hinam kay trigo rutuy tiempopiqa mana paramunchu. Ichaqa kunanmi Tayta Diosta mañakusaq hinaptinmi pay kachaykamunqa rayokunatawan parata. Chayraqmi cuentata qokuruspa entiendenkichik Tayta Diospa qawasqanman hinaqa chay rey mañakusqaykichikqa llumpay mana allin kasqanta.

¹⁸ Samuelmi chaynata rimaruspan qayakurqa Tayta Diosta. Hinaptinmi Tayta Dios chaypunilla kachaykamurqa rayokunatawan parata. Llapa runakunam anchallataña manchakurqaku Tayta Diostawan Samuelta.

¹⁹ Chayraykum llapallan runakuna Samuelta nirqaku: —Ama wañurunaykupaqyá kay sirvientekikunapaq mañapuwayku yupaychasqanchik Tayta Diosta. Arí, huchasapallaña kachkaspapas aswanraqmi huchallikuruniku reyniyoq kanaykupaq mañakuspayku —nispa.

²⁰ Chaymi Samuelñataq nirqa: —Amayá manchakuychikchu, cheqaptam qamkunaqa kay hatun mana allinta rurarunkichik. Ichaqa Tayta Diosmantaqa amayá karunchakuychikchu, tukuy sonqoykichikwanyá payta adoraychik.

²¹ Amayá mana valeq taytachakunamanqa hapipakuychikchu, chaykunaqa mana valeq kasqanraykum mana yanapasunkichikmanchu nitaq librasunkichikmanchu.

²² Tayta Diosmi ichaqa hatun sutinrayku runankunataqa mana saqesunkichikchu. Payqariki runankunaña kanaykichiktam munarqa.

²³ Arí, ñoqaqa mañapusqaykichikmi Tayta Diosta, mana chayta ruraspayqa paypa contranpich huchallikuyman. Chaynaqa paypuniyá librawachun contranpi huchallikunaymanta. Ñoqaqa yachachisqaykichikmi imaynam allin sumaq kawsakuyta.

²⁴ Qamkunaqa Tayta Diosta respetaspayá payta adoraychik. Chaytaqa ruraychik cheqap sonqowanyá. Amayá qonqaruychikchu imapas tukuy allinkuna qamkunapaq rurasqantaqa.

²⁵ Sichum mana allinllapi kawsaspaqa chinkachisqam kankichik, hina chinkachisqataqmi kanqa reynikichikpas.