1~Samuel 11 - Quechua Ayacucho Bible 1987Amon casta runakunata Rey Saul vencerusqanmanta 1 Amon casta runakunapa reynin Nahasmi rirqa Galaad lawpi Jabes llaqtata hinaspam chaypi campamentonta churarqa ichaqa chay llaqtayoq runakunam kaynata nirqaku: —Contratota ruraptinchikyá ñoqaykuqa kasaqku qamkunapa sirvientekichikña —nispa. 2 Hinaptinmi chay Amon casta runakunapa reynin Nahasñataq nirqa: —Sapakamapa alleq ñawikichikta horqonay kaptinqa allinmi, qamkunawanmi contratota rurasaq. Chayta ruraspayqa munachkani lliw Israel casta runakuna penqayman churaytam —nispa. 3 Chaymi Jabes llaqtayoq ancianokunañataq nirqaku: —Qanchis punchawyá suyaykuwayku chaynapi enteron Israel nacionpi willachimunaykupaq. Sichum pipas manaña yanapaqniyku hamuptinqa qampañach kasaqku —nispa. 4 Chay noticia willakuqkunam chayarurqaku Saulpa *f**yachasqan Gabaa sutiyoq llaqtaman. Chaypi llapa runakunaman willakuptinkum chaypi llapallan runakuna qapariyllawanña waqarqaku. 5 Chay ratoñataqmi Saul kutimuchkarqa chakramanta bueyeskunata qatirikuspa, paymi nirqa: —¿Imanasqataq llapa runakunaqa waqachkanku? —nispa. Chaymi Saulman willarqaku Jabes llaqtayoq runakunapa noticia apamusqankuta. 6 Chayta uyariykuptinmi Saulman Diospa Espiritun huntaykurqa hinaptinmi chay ratopi payqa llumpa-llumpayta piñakururqa. 7 Chaymi iskay bueyesta hapiykuspan chika-chikanta kuchuparurqa. Hinaspam chay kuchupasqa bueyespa partenkunata willakuqkunawan apachirqa enteron Israel nacionman. Chay willakuqkunam kaynata nirqaku: —Saultawan Samuelta yanapananpaq mana lloqsimuq runapa bueyesninkunaqa kayna kuchupasqam kanqa —nispan. Llapallan runakuna llumpayllataña mancharikuruspankum chulla runa hinalla lloqsirqaku. 8 Saulmi chay huñunakuq qarikunata yuparqa Bezec llaqtapi. Israel law runakunam karqa kimsa pachak waranqa qarikuna, Juda law runakunañataqmi karqa kimsa chunka waranqa qarikuna. 9 Chayman hamuq willakuqkunatam Saul nirqa: —Jabes llaqtapi *f**yachaqkunata kaynata nimuychik: “Paqarinmi yaqa chawpi punchawta librasqa kankichik” nispa. Hinaptinmi chay willakuqkuna pasaspanku chayta willamurqaku Jabes llaqtayoqkunaman chaymi paykunaqa kusikuspanku 10 Amon casta runakunapa reynin Nahasta nirqaku: —Paqarinmi qampa makikiman churakusaqku munasqaykiman hina ñoqaykuwan ruranaykipaq —nispa. 11 Paqarinninmanmi tropankunata Saul rakirurqa kimsa grupoman hinaspam manaraq achikyamuchkaptin Amon casta runakunapa campamentonman yaykuruspanku nana-nanaqta wañurachirqaku yaqa chawpi punchawkama. Puchuqkunañataqmi lliw cheqerurqaku. Manam iskayllapas kuskaqa puchurqañachu. 12 Hinaptinmi wakin runakunañataq Samuelta nirqaku: —¿Pikunataq nirqa: “¿Yaqachum Saulqa reyninchik kanman?” nispa? ¡Qomuwayku chay runakunata wañuchinaykupaq! —nispa. 13 Chaymi Saulñataq nirqa: —Kunan punchawqa manam pipas wañunqachu. Kunanqariki Tayta Diosmi libraykuwanchik lliw Israel casta runakunata —nispa. 14 Samuelñataqmi nirqa chaypi llapallan runakunata: —Hakuchik Gilgal llaqtaman. Chaypiyá Saulpa gobiernonta takyachimusunchik —nispa. 15 Chaymi llapallan runakuna pasarqaku Gilgal llaqtaman. Chaynapimá Tayta Diospa ñawpaqninpi Saulta chaskirqaku paykunapa reynin kananpaq hinaspam Tayta Diosman ofrecerqaku animalkunata chaykunataqa ofrecerqaku paywan allinlla kasqankumantam. Hinaptinmi Saul llumpayllataña kusikurqa, kusikurqakutaqmi Israel casta llapallan runakunapas. |