1~Samuel 10 - Quechua Ayacucho Bible 1987

Israel runakunapa reynin kananpaq Saulta nombrasqanmanta

¹ Samuelmi huk botella aceiteta hapiykuspan Saulpa umanman talliykurqa hinaspam muchaykuspan nirqa: —Tayta Diosmi kunan nombrasunki Israel runakunapa kamachiqnin kanaykipaq. Qanmi gobiernaspayki libranki muyuriqninpi enemigonkunamanta. Runankuna gobiernanaykipaq Tayta Dios nombrasusqaykitam yachanki kay señalwan:

² Kunan ñoqawan rakinakuruptinchikmi iskay runakunawan tupanki Raquelpa sepulturanpa hichpanpi. Chayqariki kachkan Benjamin casta runakunapa allpan Selsa lawpim. Chay iskaynin runakunam nisunki: “Maskasqayki asnokunataqa tarirunkuñam. Taytaykiqa manañam llakikunchu asnokunamantaqa aswanqa qamkunamanta llakikuspam kaynata nichkan: ‘¿Imatataq ruraykullasaq churillaymanta?’ nispa”.

³ Chaymanta pasaspam Tabor sutiyoq lugarpi encina sachaman chayarunki, chaypim taripaykamusunki kimsa runakuna. Chay runakunaqa seqanqaku Diosta Betel llaqtapi adoranankupaqmi. Hukninmi kimsa cabrata pusanqa, hukninñataqmi apanqa kimsa tantakunata, hukninpas apanqataqmi huk odre vinota.

⁴ Paykunam rimaykususpayki qoykusunki iskay tantata. Chaytaqa chaskikunkimá.

⁵ Chaymanta pasaspaykim chayarunki Gabaa sutiyoq Diospa llaqtanman. Chaypim kachkan Filistea tropakunapa cuartelnin. Chay llaqtaman yaykuspaykim tuparunki Diosmanta willakuqkunawan. Paykunaqa moqomantam achkallaña uraykamuchkanku Diosmanta willakustin. Paykunapa ñawpaqnintañataqmi hamuchkanqa mandolina tocaqkuna, tinya tocaqkuna, qena tocaqkuna hinaspa arpa tocaqkuna.

⁶ Chaymi qamtapas Tayta Diospa Espiritun huntaykusuptiki paykuna hinaña qallaykunki Diosmanta willakuyta. Chay ratoqa tikrakurunki huk runamanñam.

⁷ Kay señalkuna hamusuptikiqa atisqaykiman hinayá imatapas ruray, Diosmi yanapasunki.

⁸ Chaykuna pasakuruptinmi puntachkanki Gilgal llaqtaman. Chaypi tupaptinchikmi lliw kañana ofrendata ofrecesaq, ofrecesaqtaqmi Dioswan allinlla kasqanchikmanta animal ofrendatapas. Chaynapimá chayamunaykama suyawanki qanchis punchaw hinaptinmi willasqayki imam ruranaykita —nispa.

⁹ Samuelmanta rakikuykuspan pasakunanpaq Saul muyuriykuptillanmi paypa sonqonta Dios tikrarurqa hinaptinmi hina chay punchawllapi tukuy chay señalkuna cumplikururqa.

¹⁰ Chaymantam Saulqa sirvientenpiwan pasaspa chayarurqaku Gabaa sutiyoq llaqtaman chaymi paykunawan tupanankupaq lloqsimurqa Diosmanta willakuqkuna. Saulmanpas Diospa Espiritun huntaykuptinmi paypas Diosmanta willakuqkunawan kuskaña willakurqa.

¹¹ Ñawpaqmanta llapallan reqsiqninkunañataqmi Diosmanta willakuqkunawan willakuqta qawaspanku ninakurqaku kaynata: —¿Imataq pasarun Cispa churintaqa? ¿Saulpas kasqa Diosmanta willakuqñachus? —nispa.

¹² Chaymi huk kaqnin nirqa: —¿Pitaq paykunapa taytanqa? —nispa. Chaymantapunim runakunaqa rimakuqku: —¿Saulpas kasqa Diosmanta willakuqñachus? —nispa.

¹³ Saulqa Diosmanta willakuyta tukuruspanmi moqoman rirqa.

¹⁴ Paytawan sirviententam tion tapurqa: —¿Maytataq rirqankichik? —nispa. Hinaptinmi Saulñataq nirqa: —Asnokuna maskaqmi chaymi manaña tarispa Samuelmanña rirqaniku —nispa.

¹⁵ Chaymi Saulpa tion nirqa: —Chaynaqa ama hina kaspaykiyá willaykuway ¿imatataq nimusurqanki Samuelqa? —nispa.

¹⁶ Hinaptinmi tionta Saul nirqa: —Cheqapllatam willaykuwarqaku asnokunaqa ña rikurirusqantaña —nispa. Ichaqa Samuelpa rimapayasqan imaynam gobiernananmantaqa manam imallatapas willarirqachu.

¹⁷ Chaymantam Samuel huñunachirqa Israel casta runakunata Mizpa llaqtapi Tayta Diosta adoranankupaq.

¹⁸ Chaypim Israelpa mirayninkunata Samuel nirqa: —Israelpa yupaychasqan Tayta Diosmi nin kaynata: “Israel casta runakunataqa ñoqam horqomurqaykichik Egipto nacionmanta. Qamkunataqa libramurqaykichik Egipto runakunapa makinmantam, libramurqaykichiktaqmi huklaw nacionkunapa munaychakuyninmantapas” nispa.

¹⁹ Kunanqariki Diosnikichiktam wischupakuchkankichik, payqa ima sasachakuynikichikpipas hinaspa ima llakikichikpipas yanapaqnikichikmi karqa. Ichaqa huk reytaraq mañakuwaspaykichikmi paytaqa wischupakurunkichik. Chaynaqa kunanyá Tayta Diospa qayllanman hamuychik aylluntin hinaspa castantin —nispa.

²⁰ Israel llapallan aylluykunata Samuel asuykachiptinmi Benjamin ayllu akllasqa karurqa.

²¹ Chaymantam Samuel kamachirqa Benjamin aylluqa castankunaman hina asuykunankupaq. Hinaptinmi Matripa castan akllasqa karurqa. Chay castamantañataqmi akllasqa karqa Cispa churin Saul chaymi payta maskaspa mana tarirqakuchu.

²² Hinaptinmi huktawan Tayta Diosta tapurqaku: —¿Chayaramunñachu chay runaqa? —nispa. Chaymi Tayta Dios nirqa: —Payqa cargakunapa qepanpim pakarayachkan —nispa.

²³ Paykunañataqmi kallpaspanku chay pakakusqanmanta horqoramurqaku. Runakunapa chawpinpi sayaykuptinmi hatunsu kasqanrayku pipas hombronkamalla hayparqa.

²⁴ Chaymi llapallan runakunata Samuel nirqa: —¿Qawachkankichikchu reynikichikpaq Tayta Diospa akllasqanta? ¡Qamkuna ukupiqa manam pipas kanchu pay hinaqa! —nispa. Hinaptinmi runakuna qaparirqaku: —¡Kawsachun reyninchik! —nispa.

²⁵ Chaymi Samuelqa llapa runakunaman willayta qallaykurqa imaynam nacionninku gobiernananpaq reglamentokunata. Huk libropi qellqaspanmi churaykurqa Tayta Diospa santuarionpi. Chaymantam Samuelqa llapa runakunata kamachirqa wasinkuman kutikunankupaq.

²⁶ Saulpas kutikurqataqmi Gabaa sutiyoq llaqtapi wasinman, paytam compañarqaku peleay yachaq qarikuna. Chay qarikunataqa Diospunim kallpanchaykurqa.

²⁷ Ichaqa mana allin runakunam kamirqaku: —Imaynataqsi kay runaqa salvawachwanchik —nispa. Manam ima regalollatapas aparqakuchu. Saulmi ichaqa upallakuykuspan mana uyariqpas tukurqachu.