1~Samuel 1 - Quechua Ayacucho Bible 1987

Samuelpa nacesqanmanta

¹ Efrain Orqokunapim karqa Rama sutiyoq llaqta, chaypim *f**yacharqa Elcana sutiyoq runa. Paymi karqa Jerohampa churin. Jerohamñataqmi karqa Eliupa churin. Eliuñataqmi karqa Tohupa churin, Tohuñataqmi karqa Efrainpa castan Zufpa churin.

² Elcanam karqa iskay warmiyoq, hukninpa sutinmi karqa Ana, hukninpañataqmi karqa Penina. Peninapam karqa wawankuna, Anapañataqmi mana karqachu.

³ Elcanam llaqtanmanta sapa wata riq Silo llaqtaman Llapallan Kamachiq Tayta Diosta adorananpaq chaynataq animalkunata wañuchipunanpaq. Chaypim *f**yacharqa sacerdote Eliy. Paypam karqa iskay qari churinkuna, hukninpa sutinmi karqa Ofni, hukninpañataqmi karqa Finees. Paykunapas karqaku Tayta Diospa sacerdotenkunam.

⁴ Tayta Diospaq animalkunata Elcana wañuchispanmi tocaqninta qoq warmin Peninaman chaynataq llapallan churinkunamanpas chaynapi mikunankupaq.

⁵ Anamanmi ichaqa kuyasqanrayku huk chaynatawanraq qoykuq Tayta Diospa munayninman hina mana wachakuq kachkaptinpas.

⁶ Anataqa mana wachakuqta Tayta Dios rurarusqanraykum Penina paypa contranpi kaspan piñachiq hinaspa llakichiq.

⁷ Chaynatamá ruraq sapa wata Tayta Diospa wasinman riptinku. Anañataqmi chaynata piñachiptin waqaspan mana mikuqchu.

⁸ Chaymi qosan Elcana nirqa: —Ana ¿imanasqataq waqachkanki? ¿Imanasqataq mana mikunkichu? ¿Imanasqataq llakisqa kachkanki? ¿Manachum ñoqaqa chunka wawaykikunamantapas aswan allinraq qampaq kani? —nispa.

⁹ Chaymi Silo llaqtapi Ana mikuykuspan hinaspa tomaykuspan hatarirqa. Eliy sutiyoq sacerdoteñataqmi Tayta Diospa templonpa punkunpi sillapi tiyachkarqa.

¹⁰ Anam llumpayta waqastin llakisqallaña Tayta Diosta mañakurqa.

¹¹ Prometekuspanmi kaynata nirqa: —Llapallan Kamachiq Tayta Dios, kay sirvientaykipa ñakarisqayta qawaykuspaykiyá ama qonqaruwaychu. Qari wawata qoykuwaptikiqa ñoqam qam Tayta Diospaq sapaqchapusqayki kawsanankama. Chayraykum chukchanpas kanqa mana rutuna —nispa.

¹² Tayta Diospa ñawpaqninpi unaysu Ana mañakuptinmi paypa siminta sacerdote Eliy qawarqa.

¹³ Sonqollanpi mañakuptinmi Anapaqa simillan kuyurqa, rimasqanqa manam uyarikurqachu hinaptinmi Sacerdote Eliyñataq sinkapaq hapirqa.

¹⁴ Chaymi sacerdote Eliy nirqa: —¿Haykapikamataq machasqa kanki? ¡Mallaqyayñayá! —nispa.

¹⁵ Chaymi Anañataq nirqa: —Manam vinotaqa nitaq poqosqa aqatapas tomarqanichu, ñoqaqa Tayta Diosmanmi sonqoymanta willakuchkani tukuy llakiyta.

¹⁶ Amayá hapillawaychu mana allin warmipaqqa. Llumpay llakisqa kaspaymi kunankama mañakuchkani —nispa.

¹⁷ Chaymi Eliyñataq nirqa: —Ripukuy hawkalla. Israelpa Diosninyá imam mañakusqaykita qosunki —nispa.

¹⁸ Hinaptinmi Anañataq nirqa: —Gracias favoreceykuwasqaykimanta —nispa. Kutikuspanmi mikurqaña chaymi uyanpas manaña hukmanyasqachu karqa.

¹⁹ Tutapayta hatarispankum Tayta Diosta adorarqaku hinaspam kutirqaku Rama llaqtapi wasinkuman. Elcanam warmin Anawan puñurqa hinaptinmi Anapa mañakusqanta Tayta Dios rurarqa.

²⁰ Tiempopa risqanpim Ana wiksayakuruspan wachakururqa qari wawata hinaspam Samuelwan suticharqa. Chaynatam suticharqa mañakusqanta Tayta Dios uyariykusqanrayku.

²¹ Chaymantam Elcana lliw familiantin rirqa Silo llaqtaman costumbrenman hina Tayta Diosman animalkunata ofrecenanpaq chaynataq imam prometekusqantapas chaypi qomunanpaq.

²² Anam ichaqa mana rispan qosanta nirqa: —Manam ñoqaqa risaqchu wawata anukanaykama. Chaymantañam apaspay Tayta Diosman presentasaq chaypiña wañukunankama *f**yachananpaq —nispa.

²³ Hinaptinmi qosan Elcanañataq nirqa: —Munasqaykiman hinayá ruray. Hinapiyá kakuy wawata anukanaykikama. Tayta Diosyá cumplichun imam prometekusqanta —nispa. Chaynapim Anaqa quedaruspan wawanta uywarqa anukanankama.

²⁴ Wawata anukaruspanmi taksachallaraq kachkaptin aparqa Silo llaqtapi Tayta Diospa wasinman. Anaqa pusarqataqmi kimsa watayoq torillotapas hinaspam aparqataq iskay chunka iskayniyoq kilo harinatapas. Aparqataqmi huk odre vinotapas.

²⁵ Torillota Diosman ofreceykuspanmi warmachata qoykurqa sacerdote Eliyman.

²⁶ Paytam nirqa: —Taytáy, chullachalla almayki hawam yuyarichiki, ñoqaqariki kachkani Tayta Diosta qampa ñawpaqnikipi mañakuqmi.

²⁷ Kay wawata qowananpaqmi mañakurqani, kayqayá mañakusqaytaqa Tayta Dios qoykuwan.

²⁸ Chaymi ñoqapas payman qochkani wañukunankama Tayta Diosta servinanpaq —nispa. Hinaptinmi sacerdote Eliy qonqoranpa kumuykuspan Tayta Diosta yupaycharqa.