1~Reyes 1 - Quechua Ayacucho Bible 1987

Rey Davidta Abisaq sutiyoq doncella servisqanmanta

¹ Rey David llumpay machuña kaptinmi qatakunawan qataptinkupas manaña qoniqchu.

² Chaymi serviqninkuna reyta nirqaku: —Reynillayku, qampaqyá doncellata maskamuchunku cuidasuspayki yanapasunaykipaq hinaspa qanwan puñuspa qonichisunaykipaq —nispa.

³ Enteron Israel nacionpi maskamuspankum tariramurqaku Sunem llaqtayoq Abisag sutiyoq sumaq buenamoza sipasta, paytam reyman pusamurqaku.

⁴ Chay sipasqa karqa ancha buenamozallañamá, paymi reyta servispa yanaparqa, reymi ichaqa mana haykapipas paywanqa puñurqachu warminwan hinaqa.

Davidpa rantinpi Adonias gobiernay munasqanmanta

⁵ Davidpa warmin Haguitpa wawan Adoniasmi hoqarikururqa: —Ñoqam gobiernasaq —nispa. Carretakunatawan caballopi sillakuqkunatam huñukururqa, huñukururqataqmi kikinta waqaychananpaq pichqa chunka soldadokunatapas.

⁶ Taytanmi ichaqa haykapipas mana anyarqachu: —¿Imanasqataq chaytaqa rurachkanki? —nispaqa. Adoniasmi karqa Absalonpa sullkan ancha buenmozo.

⁷ Sarviapa wawan Joabmi sacerdote Abiatarwan rimanakuspa Adoniasta yanaparqaku.

⁸ Ichaqa sacerdote Sadocpas nitaq Joiadapa churin Benaiapas nitaq Diosmanta willakuq Natanpas nitaq Simeipas nitaq Rei sutiyoq runapas nitaq Rey Davidpa valeroso soldadonkunapas manam Adoniaspa favorninpichu karqaku.

⁹ Zohelet sutiyoq rumipa kasqanpi Adonias convidota rurachispanmi ovejakunata, vacakunata hinaspa wirayachisqan animalkunata nakachirqa. Chay Zohelet sutiyoq rumiqa kachkan Rogel Pukyupa hichpanpim. Qayachirqamá reypa llapallan churinkunatapas hinaspa Juda castamanta kaq reypa llapallan serviqninkunatapas.

¹⁰ Ichaqa manam qayachirqachu Diosmanta willakuq Natantapas nitaq Benaiatapas nitaq valeroso soldadokunatapas nitaq wawqen Salomontapas.

¹¹ Chaymi Salomonpa maman Betsabeyta Natan nirqa: —¿Manachum yachanki Haguitpa wawan Adonias reypaq churakurusqanta? Chaytaqa reyninchik Davidqa manam yachanchu.

¹² Chaynaqa vidaykitapas chaynataq wawayki Salomonpa vidantapas salvayta munaspaqa consejoytayá chaskiy.

¹³ Rey Davidman rispayá nimuy kaynata: “Reynilláy, kay serviqnikimanmi jurawarqanki: ‘Wawayki Salomonmi ñoqapa rantiypi gobiernanqa’ nispa. Chayna kaptinqa ¿imanasqamá Adoniasqa gobiernachkan?” nispa.

¹⁴ Reyman chaykunata nichkaptikim ñoqapas qepaykita yaykuramusaq hinaspam rimasqaykiman hina nisaq.

¹⁵ Reypa cuartonmanmi Betsabey yaykururqa, reyqa ancha yuyaqñam karqa, Sunem llaqtayoq Abisag sutiyoq doncellam payta yanapachkarqa.

¹⁶ Betsabey reypa qayllanpi qonqoranpa pampaman kumuykuptinmi reyñataq nirqa: —¿Imatataq munanki? —nispa.

¹⁷ Chaymi Betsabey nirqa: —Reynilláy, yupaychasqanchik Tayta Diosraykum jurawarqanki: “Wawayki Salomonmi ñoqapa rantiypi gobiernanqa” nispa.

¹⁸ Ichaqa mana yachasqallaykitam Adoniasña gobiernachkan.

¹⁹ Nakarachinmi bueyesninkunata wirayachisqan animalninkunata chaynataq achka ovejankunatapas, qayarachintaqmi churikikunatapas, sacerdote Abiatartapas chaynataq llapallan tropakuna kamachiq Joabtapas ichaqa manam qayachirqachu churiki Salomontaqa.

²⁰ Chaynaqa reynilláy, Israel nacionpi lliw runakunam suyachkanku qampa rantikipiqa gobiernaq pim kasqan ninaykita.

²¹ Mana chayna kaptinqa, reynilláy, qam wañukuptikim ñoqapas chaynataq waway Salomonpas traicionaqpaq hapisqa kaymanku —nispa.

²² Chaynata reyman Betsabey nichkaptinmi chayaramurqa Diosmanta willakuq Natan

²³ hinaptinmi reyman willarqaku: —Diosmanta willakuq Natanmi kaypi kachkan —nispa. Diosmanta willakuq Natanmi reypa qayllanpi qonqoranpa pampaman kumuykuspan

²⁴ nirqa: —Reynilláy ¿kamachirqankichu: “Adoniasmi ñoqapa rantiypi gobiernanqa” nispayki?

²⁵ Adoniasmi nakarachin bueyeskunata, wirayachisqan animalkunata chaynataq achka ovejakunatapas. Qayarachintaqmi qampa lliw churikikunatapas, tropakunapa kamachiqninkunatapas chaynataq sacerdote Abiatartapas. Paykunaqa Adoniaswan kuska mikuspankum hinaspa upyaspankum nichkanku: “Kawsachun Rey Adonias” nispa.

²⁶ Ichaqa kay serviqnikitaqa manam qayachiwarqachu nitaq sacerdote Sadoctapas nitaq Joiadapa churin Benaiatapas nitaq churiki Salomontapas.

²⁷ Chaynaqa reynilláy ¿qampa kamachisqaykichum tukuy kaykunaqa? Qampa rantikipi gobiernaqmantaqa manam niwarqankichu —nispa.

Salomonta reypaq David churasqanmanta

²⁸ Rey Davidmi qayachimurqa Betsabeyta. Betsabey reypa kasqanman yaykuruspanmi paypa qayllanpi sayaykurqa.

²⁹ Chaymi reyñataq nirqa: —Llapa llakikuymanta libraqniy kawsaq Tayta Diosraykum jurayki.

³⁰ Israelpa yupaychasqan Tayta Diosrayku juraspaymi nirqayki: “Wawayki Salomonmi ñoqapa rantiypi gobiernanqa” nispa, chay nisqayman hinam kunan rurasaq —nispa.

³¹ Betsabeyñataqmi reypa qayllanpi qonqoranpa pampaman kumuykuspan nirqa: —Reynilláy David, qamqa wiñaypaqyá kawsakuy —nispa.

³² Chaymantam Rey David qayachimurqa sacerdote Sadocta, Diosmanta willakuq Natanta hinaspa Joiadapa churin Benaiata. Paykuna reypa qayllanman yaykuruptinkum

³³ paykunata nirqa: —Serviqniykunawan compañachikuspa churiy Salomonta mulaypi sillaykachispa pusaychik Gihon Pukyu lawman.

³⁴ Chaypim sacerdote Sadocwan Diosmanta willakuq Natan aceitewan tallispa Salomonta churanqaku Israel nacionpi rey kananpaq cornetata tocachispam: “¡Kawsachun Rey Salomon!” ninkichik.

³⁵ Qamkunawan hamuspanmi palacioypi tiyaspan rantiypi gobiernanqa, paytaqa kamarachiniñam Israel castatapas chaynataq Juda castatapas gobiernananpaq —nispa.

³⁶ Chaymi reyta Joiadapa churin Benaia nirqa: —Chaynayá kachun, chaynatayá kamachichun qam reyniypa yupaychasqan Tayta Diospas.

³⁷ Imaynam qam reyniywanpas Tayta Dios karqa, chaynayá kachun Salomonwanpas, hinaspayá paypa gobiernontapas qam reyniy Davidpa gobiernonmantapas aswan mastaraq hatunchachun —nispa.

³⁸ Sacerdote Sadocmá Diosmanta willakuq Natanpiwan, Joiadapa churin Benaiapiwan, Ceret casta soldadokunapiwan, Pelet casta soldadokunapiwan Rey Davidpa mulanpi sillaykachispa Salomonta pusarqaku Gihon Pukyu lawman.

³⁹ Sacerdote Sadocmi Diospa karpanmanta waqrachapi aceiteta horqomuspan Salomonman talliykurqa chaymi cornetata tocachiptinku llapa runakuna qaparirqaku: —¡Kawsachun Rey Salomon! —nispa.

⁴⁰ Llaqtapi llapa runakunam qatirqaku qenata tocastin, paykunaqa hatu-hatuntam kusikurqaku. Paykunapa qaparisqankuwanmi allpapas kicharikuykuqmanña rikchakurqa.

⁴¹ Adoniasmi llapallan convidasqan runakunapiwan mikuyta tukuruchkaspankuña bulla rurasqankuta uyarirurqaku. Corneta waqasqanta Joab uyariruspanmi nirqa: —¿Imanasqataq runakunaqa llaqtapi llumpayllataña alborotachkanku? —nispa.

⁴² Chaynata rimachkaptinmi sacerdote Abiatarpa churin Jonatan chayarurqa chaymi Adoniasñataq nirqa: —Qamqa valeroso qarim kanki, yaykuykamuyá, allin noticiatach apamuwachkankiku —nispa.

⁴³ Chaymi Jonatanñataq nirqa: —Cheqaptaqariki reyninchik Davidmi Salomonta reypaq churarun.

⁴⁴ Paywantaqmi kacharqa sacerdote Sadoctapas, Diosmanta willakuq Natantapas, Joiadapa churin Benaiatapas, Ceret casta soldadokunatapas chaynataq Pelet casta soldadokunatapas, paykunam Salomonta sillaykachirqaku Rey Davidpa mulanpi

⁴⁵ hinaptinmi sacerdote Sadocwan Diosmanta willakuq Natanpas Gihon Pukyu lawpi Salomonta aceitewan tallispanku reypaq churarunku. Hatun kusikuywan runakuna kutimuspankum bullallataña rurachkanku, chay alborototamiki qamkunaqa uyarichkankichik.

⁴⁶ Salomonpas reypa tiyananpim tiyaykurunña.

⁴⁷ Reypa serviqninkunapas riruspankum reyninchik Davidta alabaramunku: “Diosyá Salomontaqa qanmantapas aswan mas reqsisqataraq rurachun hinaspayá gobiernontapas qampamanta aswantaraq hatunyachichun” nispa. Rey Davidpas camanpi kumuykuspam Diosta adoraspan

⁴⁸ nirqa: —Israelpa yupaychasqan Tayta Diosqa alabasqayá kachun, kunan punchawmi qawachkaptiy churiyta palacioypi tiyaykachin —nispa.

⁴⁹ Adoniaspa convidasqankuna chayta uyariruspankum mancharikururqaku, llapallankum hatariruspanku sapakama ripukurqaku.

⁵⁰ Adoniaspa Salomonta manchakuspanmi rispan altarpa waqrachankunaman hapipakururqa.

⁵¹ Salomonmanmi willaramurqaku: —Adoniasmi manchakususpayki altarpa waqrachankunaman hapipakurun: “Kunanpuni Rey Salomon jurawachun ama wañuchiwananpaq” nispa.

⁵² Chaymi Salomonñataq nirqa: —Allinllata kawsaptinqa manam huk chukchallanpas pampaman wichinqachu, faltakuruspanmi ichaqa wañuchisqa kanqa —nispa.

⁵³ Chaymi Rey Salomon kacharqa altarpa kasqanmanta Adoniasta pusamunankupaq. Rey Salomonpa qayllanpi qonqoranpa kumuykuptinmi Rey Salomon nirqa: —Ripukuy wasikiman —nispa.