Hebreos 8 - K'iche'

Waral cäkil wi chi ri Jesús are cojol tzij ri xuban jun c'ac' trato

¹ Are c'u ri nim na u banic che ri tajin cäkabij, are wa': Ri Jesucristo, ri qui nimal sacerdotes ri c'o pa ka wi' uj, t'uyul ri Are' pa ru wiquiäk'ab ri Dios chila' chicaj.

² Are sacerdote wa' ri cäpatänin pa ri kas Lok'alaj Ja ri xban rumal ri Kajaw Dios, man cumal tä ri winak.

³ Ronojel qui nimal sacerdotes are cojom chuya'ic sipanic xukuje' che qui cämisaxic awaj ri quesipax cho ri Dios, rumal c'u ri' ri Jesucristo rajwaxic chi ri Are' xukuje' c'o jas cuya che sipanic cho ri Dios.

⁴ We ta ri Cristo xak are c'o waral cho we uwächulew, mat oquinak ri' che sacerdote rumal chi c'ä e c'o na sacerdotes ri cäquiya sipanic cho ri Dios jas ri cätakan wi ri Pixab ri xutz'ibaj ri ka mam Moisés.

⁵ We sacerdotes ri', aretak quepatäninic quequicoj jastak ri e c'utbal chquij ri jastak ri kas e c'o chila' chicaj. Ketam chi xa e c'utbal, rumal chi ri Dios xubij che ri ka mam Moisés aretak xuchomaj u yaquic ri rachoch Dios: “Kas chawila', je' caban na che ronojel jas ri xinc'ut chawäch pa ri nimalaj juyub,” —xcha che.

⁶ Are c'u ri ka sacerdote uj ri cojom che qui nimal sacerdotes, are utz na ri patäninic ri cubano rumal chi are cojol tzij ri xuban ri jun c'ac' trato ri utz na chuwäch ri nabe, rumal chi cuchi'j wi ri Dios nimak tak tewchibal ri kas e utz na.

⁷ We ta kas utz xel ri nabe trato, mat rajwaxic ri' xban chi jun trato chic.

⁸ Ri Dios c'ut xrilo chi man utz tä ri qui c'aslemal ri winak aj Israel, je' jas ri xubij pa ru Lok' Pixab ri Tz'ibtalic: Ri Kajaw Dios cubij: Cäpe na ri k'ij aretak quinban na jun c'ac' trato cuc' ri winak aj Israel, cuc' ri winak aj Judá, —cächa ri Kajaw Dios.

⁹ Man junam tä c'u ri' ruc' ri trato ri xinban cuc' ri qui mam ojer pa ri k'ij ri xinc'am qui be rech queinwesaj lok pa ri nim tinimit Egipto. Man xca'n tä c'ut jas ri cubij ri trato ri xinban cuc', rumal c'u ri' xeinya canok, cubij ri Kajaw Dios, —cächa ri'.

¹⁰ Ri trato ri quinban na cuc' ri winak aj Israel pa tak ri k'ij ri quepetic are wa', cubij ri Kajaw Dios: Quinya na ri nu Pixab pa tak ri qui chomabal, quintz'ibaj c'u na wa' pa tak ri canima'. Quinoc chi na che qui Dios, are c'u ri e are' queboc na che ri nu winak in.

¹¹ Man c'o tä na jun winak rajwaxic cuya tijonic che jun winak chic. Man cuya tä tijonic che ri rachi'l, man cuya tä c'u tijonic che ri rachalal rech kas cäretamaj u wäch ri Dios rumal chi conojel winak cäquetamaj na nu wäch, chi ac'alab, chi ri'jab.

¹² Quincuy na ri etzelal ri ca'nom, man c'o tä c'u jubik' ri qui mac ri cäna'taj chi na chwe, —cächa ri Kajaw Dios.

¹³ Aretak cubij ri Dios chi c'o chi jun c'ac' trato, quel cubij chi ri nabe trato ya xoc'owic, man c'o tä chi u patän. Ri ojer trato ri ya xoc'owic, cäsach na u wäch chanim.