Salmos 95 - Tayta Diosninchi Isquirbichishan

Tayta Diosta cushisha alabashun

¹ Shamuy-llapa, llapanchi Tayta Diosta cushisha alabashun. Chapämajninchïta alabashun. Salbamajninchïta alabashun.

² Tayta Diosta agradësicoj aywashun. Payta alabansacunawan alabashun.

³ Tayta Diosga fiyupa munayniyojmi. Paymi llapan dioscunapa raynin.

⁴ Paypa munaynillanchömi allpa rurincho cajpis. Paypa munaynillanchömi altunnin puntacunapis.

⁵ Lamarpis payllapami. Lamartaga paymi camaranpis. Quiquin maquinwanmi ruraran cay pachatapis.

⁶ Shamuy-llapa, gongurpaycärir Tayta Diosta adurashun. Paypa ñaupanman gongurpacushun ari. Paymi ruramaranchïpis.

⁷ Paymi Diosninchi. Noganchïnami canchi acrashan runacuna. Noganchëga caycanchi tajta pampacho caycaj uyshancunanömi. Tayta Dios nishanta canan wiyacuy-llapa. Paymi nin:

⁸ «Ama caychu Meriba particho rurashayquicunano mana wiyacöga. Ama caychu chunyaj Masah particho

⁹ unay caj awiluyquicuna musyapämänanpaj rurashannöga. Paycunaga rurashäta ricaycarpis musyapämaytaraj munaran.

¹⁰ Chay wichan cawaycajcunapäga chuscu chunca watami rabyashalla cacurä. Chaymi nirä: ‹Cay runacunaga pantacashami puricurcaycan. ¡Manami mandamintöcunata wiyacunchu!›

¹¹ Chaypitami rabyar nirä: ‹Jamayta tarinanpaj aunishämanga manami yaycuchishächu› nir.»