Salmos 87 - Tayta Diosninchi Isquirbichishan

Jerusalén siudäta Tayta Dios cuyashan

Corëpita mirajcuna isquirbishan alabansa.

¹ Quiquin Tayta Diosmi Jerusalén siudäninta camacächisha rispitädu lömacho.

² Tayta Dios cuyan Jerusalén siudätami. Jerusalentaga Israel nasyuncho caycaj siudäcunapita masmi cuyan.

³ Diospa siudänin, gampäga fiyupa allicunatami parlan. Selah

⁴ Tayta Diosmi parlasha: «Rejsimaj nasyun runacunaga carcaycan Egipto, Babilonia, Tiro, Etiopía, Filistea runacunami. Chay nasyun runacunaga Jerusalén runacunanömi.»

⁵ Jerusalenpäga waquin nenga: «Paymi maman. Payllapitami tagay nasyunpis cay nasyunpis yurisha. Quiquin Tayta Diosmi camacächishapis» nir.

⁶ Chay nasyuncunapa jutinta Tayta Dios isquirbir nenga: «Llapanpis chay nasyuncunaga Jerusalenllachömi yurisha» nir. Selah

⁷ Llapanmi cantashpan dansashpan nenga: «Jerusalenchömi yurishcä» nir.