Salmos 76 - Tayta Diosninchi Isquirbichishan

Tayta Diosga llapancho allimi llojshin

Cuerdasniyoj instrumentuwan cantananpaj Asaf isquirbishan alabansa.

¹ Judäcunaga llapanmi Tayta Diospaj parlan. Israelcunaga llapanmi musyan pï Tayta Dios cashantapis.

² Jerusalenchömi Wasenga caycan. Chaychömi tiyanan.

³ Chaychömi paquiran guërracho chapacuna escüducunata, sablicunata, lëchacunatapis. Selah

⁴ ¡Fiyupa munayniyojmi canqui Tayta Dios! ¡Mana ushacaj puntacunapitapis mas munayniyojmi canqui!

⁵ Chaynöpami fiyupa callpayojcunapis ima ruraytapis mana puydishachu. Manami gänasninpis cashanachu. Mananami jatarimonganachu.

⁶ Tayta, Jacobpa Diosninmi canqui. Gam rabyacurcuptiquega carrëtancuna ni cawalluncunapis mananami cuyucunnachu.

⁷ ¡Gamga canqui fiyupa puydej y manchanami! ¿Piräshi ichipäshunquiman rabyacurcuptiquega?

⁸ Tayta Dios syëlupita-pachami jusganquipaj. Chaymi cay pachapis mancharir mana cuyucunchu.

⁹ Chaynöga caycan jusganayquipaj jatariptiquimi, cay pachacho ñacaycajcunata salbanayquipaj captinmi. Selah

¹⁰ Gam rabyacurcuptiquega mas ollgojnin runapis upällacur rispitarmi alabashunqui.

¹¹ Aunishanchïcunataga Tayta Diosninchïta cumlishun. Ñaupancho caycajcuna, gamcunapis almiraypaj caycaj Tayta Diospaj garayniquicunata apamuy.

¹² Payga mandajcunatapis wañurachinmi. Munducho caycaj raycunatapis mancharachinmi.