Salmos 75 - Tayta Diosninchi Isquirbichishan

Tayta Diosga llapantami jusgan

Asaf isquirbishan alabansa.

¹ Nogacuna gamta agradësicömi Tayta Dios. Almiraypajcunata rurashayquipitami alabä.

² Tayta Dios caynömi nin: «Imaypäpis nishä junajmi Nogaga alli arriglashaj.

³ Cay pacha cuyuriptin runacuna manchariptinpis nogami chararaycä tuncarajtaga.» Selah

⁴ Alabacojcunatami në: «Ama alabacuychu.» Fiyucunatami në: «Ama alli-tucuychu.»

⁵ Paycunataga në: «Ama munayniyoj-tucuychu. Ama runa-runa parlaychu.»

⁶ Alliman churamänapäga manami shamunchu inti yagamunanpita, ni inti yagananpitapis, chunyajpita ni puntacunapitapis.

⁷ Tayta Diosmi llapantapis jusgan. Waquintami manacajman churan. Waquintanami alliman churan.

⁸ Tayta Diosga jusgar castigananpaj cöpan aptashami caycan. Fiyupa pogusha bïnutanömi chararaycan. Chay cöpata jicharamuptin cay pachacho caj juchasapacunaga gonchuntintami upucarcärenga.

⁹ Nogaga imaypis willacuycäshaj Jacobpa Tayta Diosnillanpämi. Alabansacunatapis payllapämi cantaycäshaj.

¹⁰ Tayta Diosmi illgächenga fiyucuna alli-tucuycajta. Alli runatami ichanga mas munayniyojyächenga.