Salmos 64 - Tayta Diosninchi Isquirbichishan

Chapänanpaj Diosta mañacushan

David isquirbishan alabansa.

¹ Tayta Dios, llaquicur mañacamushäta wiyaycamay ari. Chiquimajcunapita chapaycamay.

² Fiyucuna yarpapaycämashanpita pacaycamay. Shuntacarcur fiyu runacuna parlacushanpita chapaycamay.

³ Paycuna parlashanga fïnu sabli nanächicushannörämi nanächicunpis. Paycuna parlashanga benënuyoj lëchanömi nanächicunpis.

⁴ Pacaraycashallanpitami juchaynaj runataga lëchanwan illapan. Mana pitapis manchacuypami illajpita chayachin.

⁵ Quiquin-purami parlacur shacyächinacun mana allita rurananpaj. Pitapis togllata churapänanpaj parlacun. Paycunaga yarpan pipis mana ricashantami,

⁶ mana alli rurashancunata pipis mana taripänantami. ¡Runacuna yarpashanga tantiyaytapis mana atipaypämi!

⁷ Ichanga paycunata Tayta Diosmi lëchanwan illaparenga. Illajpitami mana alliman chayachenga.

⁸ Quiquincuna rimashanpitami mana allimanpis chayanga. Chayno caycajta ricajcunaga paycunata asipangami.

⁹ Chayrämi Tayta Diosta llapan rispitanga. Tayta Dios imata rurashancunatapis willaconga. Tantiyaconga Tayta Dioslla llapantapis camacächishanta.

¹⁰ Alli runaga cushicongami Tayta Dios chayno rurashanpita. Juchaynajcunaga Pay chapänanpaj yäracongami y alabangami.