Salmos 62 - Tayta Diosninchi Isquirbichishan

Tayta Diosllami pacacunaga

David isquirbishan alabansa. Jedutún cantashan.

¹ Tayta Diosllami alli goyächiman. Payllami salbaman.

² Payllami salbaman y chapäman. Pay pacacunä captinmi ima mana allimanpis mana chayashächu.

³ ¿Imaycamaraj juchunaycaj tapyata-jina tangaypa tangaycämanqui? ¿Imaycamaraj amicaycaj guenchata-jina tangar-ushaycämanqui?

⁴ Gamcunaga mana alliman chayachimayllatami yarpanqui. Llullacorga mishquillami parlanqui. Janan shongullami alli parlapämanqui; shonguyquicho ichanga chiquiycämanqui. Selah

⁵ Tayta Diosllami alli goyächiman. Payllamanmi nogaga yäracö.

⁶ Payllami salbaman y chapäman. Pay pacacunä captinmi ima mana allimanpis mana chayashächu.

⁷ Tayta Diosllami salbamajnëga. Paymi munayniyoj cayman churaman. Paymi chapacunä. Tayta Diosllami pacacunä.

⁸ Marca-masëcuna payllaman yäracuyga ari. Mana manchacuypa willapay mañacushayqui öra. ¡Tayta Diosmi pacacunanchëga! Selah

⁹ Runacunaga ricayllanmi caycan. Llullacuynöpis yangallami caycan. Llapanta jucllacharcur balansacho pësaptin manami ni aycapis lasanmanchu.

¹⁰ Mana allita rurashayquicunamanga ama yäracuychu. ¡Runapa ima-aycantapis guechushpayqui ama alabacuychu! Rïcuyashpayqui guellayniquimanga ama yäracuychu.

¹¹ Yaparir yaparirmi wiyashcä Tayta Diospaj parlajta.

¹² Payllami munayniyoj y cuyacöga. Paymi cada runata cutichin rurashanman-tupu.