Salmos 61 - Tayta Diosninchi Isquirbichishan

Tayta Dios chapänanpaj mañacushan

David isquirbishan alabansa.

¹ Tayta Dios, gayacaycämushäta wiyaycamay ari. ¡Mañacaycämushäta wiyaycamay ari!

² Callpaynajnönami caycä. Chaymi cay pachapa juc cuchunpita-pacha gayacaycämö. Salbacunäpaj altunnin gagaman pushamay.

³ Gammi canqui pacacunä. ¡Gamga mana juchoj törrinömi chiquimajcunapita chapämanqui!

⁴ Gampa wasiquichömi imaycamapis goyayta munä. Älayqui rurinman pacaycamay ari. Selah

⁵ Tayta Dios, gamga wiyamashcanquimi imata ruranäpaj aunishätapis. Chaymi rispitashoj runacunata aunishayquita nogatapis gomashcanqui.

⁶ Raytaga unaycama cawaycachiy ari. Payga unay-unaycama cawachun ari.

⁷ Gampa bindisyunniquiwan ray cachun unaycama. Cuyacoj, llapantapis cumlej cashayquimanno ricaycuy ari.

⁸ Chaynöpami imaypis alabaycäshayqui. Aunishäcunatapis waran-waranmi cumlishaj.